É kalare Tsin Ékôan

A bobedzang ya bekal bèè :

Édzing bi bele akal Nzame da tsini bia naa « bi ke [. . .] ya bo beyeghe ébe bôt be ye meyong mesese, ya du bo. » (Mat. 28:19, 20 ; Marc 12:28-31) Nge bi bele aval édzing té, bia ye vole « é bôt be bele étèñ ya nsisim da yiène nfa ya bele éning é ne mbèmbèè. »—Bisè mintôl 13:48.

Metam ô mvus, bi nga bembe naa bia baalé é mam bia yiène dzô bii likh mebakh. Ve éndagha, bia yiène sèñ aval bi ne yem lèè minlang ya bôt. Bia kômô lere naa bia dzing é bôt bevoo éyong bia kobe be é mam ma name bo. Dzam té da yili naa biaa yiène ki bembe fave ébe é dzam bi va kôman. Bia yiène fas é mam ma ndaghle bôt nge ki é mam kada môt a yi. Aval avé nso kalare wi wa ye bia vole naa bi bo do ?

Nso kalare wi ô bele meyeghle 12 ma lere bia mefulu bia yi nfa ye naa bi lere édzing ya bo beyeghe. Kada ayeghle da lere aval Yésu, nge ki nkar-fuèñ ye mintet mimbu ôsua a nga lere fulu ézing minkanghle. Biaa kômô ki baalé é dzam bia ye ke dzô bôt, bia kômô tsen meval bi ne lere é bôt bevoo édzing. É ne été naa kada fulu é ne éban akal minkanghle misese miè, ve, bia ye yen aval mefulu m’ézing me ne bo édedèè éban éyong bia sum nlang ya môt, éyong bia bera ke fep môt ya éyong bia bo meyeghle Bible.

Éyong mia ye yeghe kada ayeghle, mi ne binan aval mi ne lere fulu té éyong mia ye kobe ya bôt be ye abeng minkanghle denan. Éyong mia ye yeghe kada ayeghle, vaane mengu’u naa mi veme édzing denan akal Jehôva ya é bôt bevoo. Édzing té, édi da lôt akeng ésese bi ne bele, da ye mia vole naa mi dzale nsôghane wônan ya bo beyeghe.

É ne môra maa naa bia sèñ ya mina. (Soph. 3:9) Jehôva a borane mina abuiñ nté sese mia lere naa mia dzing bôt ya bo beyeghe !