« Mia bebién topghane [. . .] é môr mia ye sèhane ñe »

1. Za dzam bia yiène bo naa bi bele ña mevakh, amu dzé ki ? (Esaïe 48:17, 18).

ÉSAA waa a ne a dzôp été a bira bia dzing, a kômô fe naa, bi tobe mevakh éndagha ye melu ma zu (Eccl. 3:12, 13). A nga vele bia ya mekeng mézing, ve, éé dzi ki bia ve ngu’u naa, bi ne djié bia bebién nge ki naa, bia bebién bi top é mam me ne mbeng ye éma me ne abé (Eccl. 8:9 ; Jér. 10:23). A yem naa, naa bi bele ña mevakh, bia yiène sèhane ñe, ye dzale metsing mèñ bining bia (a lang Esaïe 48:17, 18).

2. Za dzam Satan a kômô naa bi tem, aval avé ki Jehôva a nga yalane minaa mièñ ?

² Satan a kômô naa, bi tem naa, bi ne tobe mevakh été, kaa sèhane Jehôva, ye naa, boan be-bôr be ne yem djié bébién (Atar. 3:4, 5). Jehôva a nga yalane minaa satan, é likh naa, boan be-bôr be djié bébién ngum éyong. Ému, bii se ki sôô naa, édjié boan be-bôr da so abuiñ mindzukh. Vedaa, Biblia a bele abuiñ bifônane befam ye binenga be nga ning mevakh été, amu be nga sèhane Jehôva. Éfônane da dang mbeng ébe bôr beté, a ne édi Yésu Krist. Ôsusua, ntareghane yen mekalgha me nga ve naa, a top naa a sèhane Jehôva. Éyong té bia ye fas amu dzé Jehôva a yiène naa, bi sèhane ñe. Asughlan, bia ye yen mekalgha mézing ma ve naa, bi top naa, bia sèhane Jehôva.

AMU DZÉ YÉSU A NGA TOP NAA A SÈHANE JEHÔVA

3. Za dzam Satan a nga kômô ve Yésu, éde, za dzam Yésu ñe a nga top naa a bo ?

³ Éyong Yésu a mbe a si va, a mbe mban a lere naa a nga top naa a sèhane Jehôva. Ôyôm tam niène a nga duban, Satan a nga dzô ñe naa, a ye ñe ve bidjié bise bi ya si, nge Yésu a yebe naa a ve ñe ékang éyong évoo. Ve, Yésu a nga yalane ñe naa : « Keng ô wéñ, a Satan ! Amu é ne ntsilane naa : “Jehôva é Nzame wiè éñe wa yiène kang, éñe étam wa yiène ve nfufup ékang” » (Mat. 4:8-10). Amu dzé Yésu a nga ñong nkighane té ? Ntamane yen mekalgha mézing me ye été.

4-5. Za mekalgha mézing me nga ve naa, Yésu a ñong nkighane naa a sèhane Jehôva ?

⁴ Akalgha da dang éban é nga ve naa Yésu a ñong nkighane naa a sèhane Jehôva, é ne édzing. Yésu a bira dzing Ésaa wèñ (Jean 14:31). Yésu a sèhane fe Jehôva amu a yem naa, dzam té éde Jehôva a yiène de (Jean 8:28, 29 ; Mel. 4:11). A yem fe naa, Jehôva éñe a ne tsîn éning, bi ne tobe ñe mebun, ye naa a ne añep (Bya 33:4 ; 36:9 ; Jacq. 1:17). Jehôva a nga kobe Yésu bebela éyong ése, a nga kee fe ñe, é dzôm ésese Yésu a mbe a bele (Jean 1:14). Satan éñe a nga so awu, a ne n’nenaa amu a ne kaa dzèñ ya abim a bele. Ye fe naa, a simane fave émién (Jean 8:44). Yésu a mbe é bira yem Jehôva é bira fe yem Satan. Ôsiman wéé dzi ki ñe ke môs ézing naa a bo ane Satan, ye tebe Jehôva é ngam ayat (Beph. 2:5-8).

⁵ Akalgha éfe é nga ve naa Yésu a ñong nkighane naa, a sèhane Jehôva é mbe naa, a nga bembe ébe é mbemba be-mam me mbe mé yane ñe ôsu nge a tobe sôsôe (Behéb. 12:2). A mbe é yem naa nge a tobe sôsôe, a ye fubu éyôla Ésaa, ye ve naa, nsem ye awu be taa bera bo.

AMU DZÉ JEHÔVA A YIÈNE NAA BI VE ÑE ÉKANG

6-7. Amu dzé abuiñ bôr daa sèhane ki Jehôva ému, ve, amu dzé a yiène naa, bi ve ñe ékang ?

⁶ Abuiñ bôr daa sèhane ki Jehôva ému, amu baa yem ki é mbemba mefulu mèñ, ye naa, baa yen ki é mam a bo akal deba. Be ne ane é bôr Pablo a nga kanghle Atenas béé nga yem ki Nzame (Bisè mintôl 17:19, 20, 30, 34).

⁷ Pablo a nga dzô é bôr a nga kanghle naa, é Nzame a ne bebela « a ve môr asese éning, mvebe, ye mam mesese ». Éde a nga koghle naa : « Nge bia ning ye fonghane a ne akal dèñ ». Nzame éñe a ne Mvele « é bôr besese be ne meyong, ba so ngalan é môr mboo Nzame a nga vele, » éde, da yiène naa bi ve ñe ékang (Bisè mintôl 17:25, 26, 28).

8. Za dzam Jehôva aa ye ki vaghle bo tam ézing ? Vakh ayilgha.

⁸ Amu Jehôva éñe a nga vele bia, ye naa, éñe a ne Sugha Ndjié, a mbe bia yemle naa bi sèhane ñe. Vedaa, Jehôva aa ye ki vaghle bo dzam té tam ézing. Ndaane de, a nga ve bia abuiñ mam ma vole bia naa, bi bele ndzi-n’nem naa a ne, ye naa, a dzing kada môr ye ébe bia. A kômô naa, abim bôr ése é ne de bo, é lar angom ya ñe mbèmbèè (1 Tim. 2:3, 4). Akal dzam té, éde Jehôva a ve bia meyeghle nfa ye naa, bi yeghle é bôr bevoo é mbemba be-mam a ye zu bo akal boan be-bôr melu ma zu, ye aval a ye de bo (Mat. 10:11-13 ; 28:19, 20). A ve fe bia bikôan, é vôm bi ne ñe yem ve ékang ye bele fe avole bemvene (Bisè mintôl 20:28).

9. Meval mevé Jehôva a lereyang naa a dzing boan be-bôr ?

⁹ Édzing Jehôva da tugha lereban ye aval a belan é bôr baa kômô ki yebe naa a ne. Ntamane fas é dzam di : Ébe abuiñ mimbu, abuiñ bôr é va top naa, da bo é mam bébién ba tem naa me ne mbeng nge ki abé, ndaane naa ba bo é mam Jehôva a kômô. Amben naa té, Jehôva a ve bo é dzam ésese ba yi nfa ye naa, be tsini naa ba ning, ye buan éning té (Mat. 5:44, 45 ; Bisè mintôl 14:16, 17). A likh be naa, be bele mbemba mengom, menda me-bôr ma dzing bo, be ne bele boan, be ne fe sèñ ye buan éning (Bya 127:3 ; Eccl. 2:24). Dzam té da tugha lere naa, Jehôva, Ésaa waa a ne a dzôp, a dzing boan be-bôr besese (Akô. 34:6). Ntamane yen mekalgha mézing me nga ve naa, bi ñong nkighane naa bia sèhane Jehôva, ye yen aval Jehôva a boran é bôr ba ñong nkighane té.

AMU DZÉ BI NGA ÑONG NKIGHANE NAA BIA SÈHANE JEHÔVA

10. (a) Za akalgha da dang éban da tsini bia naa bi sèhane Jehôva ? (Matthieu 22:37). (b) Meval mevé Jehôva a ve lere wa ôdzibi ? (Bya 103:13, 14).

¹⁰ Ane Yésu, é dzam da dang éban da tsini bia naa, bi sèhane Jehôva a ne édzing bi bele akal dèñ (a lang Matthieu 22:37). A yeghe mefulu Jehôva, da ve naa, bi kômô ñe yir bébéñ. Éfônan, ntamane fas aval Jehôva a lere bia ôdzibi. Éyong Bisraelitas be nga bo ñe melo, a nga dzaa be naa : « Éngôngoo dzoghane mbia abo-dulu denan » (Jér. 18:11). Jehôva a simane naa, bi ne bôr a bikop ye naa, bi ne metso (a lang Bya 103:13, 14). Éyong wa siman abim biyong Jehôva a lereya wa ôdzibi, ye dzam té daa tsini ki wô naa, ô sèhane ñe mbèmbèè ?

11. Za mekalgha mefe ma ve bia naa bi top naa bia sèhane Ésaa waa a ne a dzôp été ?

¹¹ Akalgha éfe da tsini bia naa bi sèhane Jehôva é ne naa, a yiène de (Mat. 4:10). Bia yem fe é mbemba be-mam a ye bo akal daa éyong bia sèhane ñe ya sôsôe. É sôsôe daa da ve naa, éyôla Jehôva é tobe nfuban, da lere naa, Debele a ne n’nenaa, da ye fe ve Ésaa waa n’nem mbeng. Nge bi top naa, bia sèhane Jehôva ému, bia ye bele maa naa, bia sèhane ñe mbèmbèè ! (Jean 17:3).

12-13. Za dzam bi ne yeghe ébe nlang Jane ye Pam ?

¹² Amben é bôr be ngen édedaa bong, be ne yeghe a bele édzing é ne ngu’u akal Jehôva. Édzing té da ye ke da vem nté ba ye ke ba ke min’nôm. Ntamane yen éfônane bobeñang bebèñ be too biyôla naa, Jane ye Pama. Be mbe be bele mimbu 11 ye 10 éyong be nga sum naa ba yeghe Biblia. Amben bebyèñ beba béé nga kômô ki yeghe Biblia, be nga likh naa Jane ba Pam be tsini naa ba yeghe ya Bengaa Jehôva, fave nge ba tsini naa ba ke é nda-nzame deba kada amane sono. Jane a dzô naa : « É dzam Bengaa Jehôva be nga yeghle ma a Biblia été, é nga vole me naa me tup mbimbia be-mam é bôr bevoo be mbe bé kômô naa me bo a sikôlô, ane a ñu bang, ye bo nsem évakh ».

¹³ Niène abim mimbu é nga lôt, bobinenga beté be nga bo bekare fuèñ. Mimbu ôsu, nté be mbe bé kale bebyèñ beba be mbe beñabôrô, éde be nga ñong ésèñ mpwaghe mefan. Éyong Jane a siman é mam mese Jehôva a nga bo akal deba melu mvus, a dzô naa : « Mamién me nga yeghe naa, Jehôva a baghle mengom mèñ éyong ése. Ye fe naa, ane nten 2 Timothée 2:19 wa dzô de, “Jehôva a yem é bôr bèñ” ». Ôwé, Jehôva a baghle é bôr ba dzing ñe, ye top naa ba sèhane ñe !

14. Aval avé bifiè bia ye mimboane mia mi ne fubu éyôla Jehôva ? (A daghe fe bivaghle).

¹⁴ Bia kômô fubu éyôla Jehôva. Tame fas é dzam di : Ô bele mbemba angom, a too mbemba fulu, añep, ye bidzamegha. Môs ézing, wa wokh ane môr a bôre ñe naa, a ne nget, ye naa, a ne n’nenaa. Wa ye ñong dzam té ya ? Bebela a ne naa, wa ye kame ñe. Aval té fe, éyong Satan ye é bôr bèñ ba dzeng naa, ba ve éyôla Jehôva mvîn bé bôre ñe mam, bia yalane mam meté bi kobe bebela nfa Jehôva, ye kame ya ayokh éyôla dèñ (Bya 34:1 ; Esaïe 43:10). Bia lere naa bia top naa bia sèhane Jehôva, ya é mam bia dzô ye fe é mam bia bo.

15. Za biborane Pablo a nga ñong éyong a nga tsen minsonghane mièñ ? (Bephilippien 3:7, 8).

¹⁵ Bi ne nkoghane naa bia tsen mam mézing bining bia nfa ye naa bi ve Jehôva n’nem mbeng, nge ki, naa bi veme ésèñ bia bo akal dèñ. Éfônan, ntôô Pablo a nga kikh naa a likh é môra éto a mbe a bele, é vôm a mbe a too naa, a béé Krist, ye sèhane Jehôva (Begal. 1:14). Asughlan, a nga bele mbemba éning é sèhane Jehôva, ye bele fe môra maa naa a ke djié a dzôp été ya Krist. Éé dzi ki dzôbane tam ézing ya nkighan a nga ñong naa a sèhane Jehôva, bia biaa ye ki dzôban (a lang Bephilippien 3:7, 8).

16. Za ayeghle bia ñong ya éfônane Julia ? (A daghe évaghle).

¹⁶ Nge bi tele ésèñ Jehôva ôsu éning dèè, bia ye bele mbemba éning éndagha ya melu ma zu. Ntamane fas éfônane kal dzaa ézing a too éyôla naa Julia. Kaa naa a yem bebela, Julia a mbe môr mboo ye nsama bôr ô mbe wé yiè bya é nda nzame dzèñ. A nga sum naa a bo do a too mong. N’yiè bya ézing ya ópera a nga yen akeng Julia a mbe a bele. Éde a nga sum naa a yeghle ñe nfa ye naa, a bera bo édedèè akeng. Julia a nga sum naa a yiè bya é bôra mevôm. Éde bôr be nga sum naa ba yem ñe. Nté Julia a mbe é ke môra sikôlô nfe ba yiè bya, môr mboo ye é bôr ba bebe be mbe bé ke sikôlô té, a nga sum naa a kobe ñe mam nfa Nzame, ye lere ñe naa éyôla Nzame é ne Jehôva. Ôyôm tam vèè, Julia a nga sum naa a yeghe Biblia biyong bibèñ kada sono. Ya tam, a nga kikh naa a tele ésèñ Jehôva ôsu éning dèñ, ndaane naa a yiè bya. Nkighane té wéé mbe ki ñe ébubu a ñong. Émièn a dzô naa : « Abuiñ bôr é mbe dé dzô me naa ma wiñ éning dam ntukh. Ve, me nga kômô ve éning dam ése naa ma sèhane Jehôva ». Atéé ye éyong Julia a nga ñong nkighane té ya zu kuiñ ému, é ntoo mimbu 30. A wôrane yè ému akal nkighan a nga ñong tam té ? Émièn a dzô naa : N’nem ô bôô ma ôsi, ye naa me bele ndzi-n’nem naa, Nzame a ye dzale mekômgha me ne ma a n’nem été melu ma zu » (Bya 145:16).

TSINIGHANE NAA MIA SÈHANE JEHÔVA

17. Aval avé melu me ye asughlan, ma name é bôr be ñonghang nkighane naa ba sèhane Jehôva ya é bôr baa be ki ñong nkighane té ?

¹⁷ Bi ntoo bébéñ amangha ye émo di. Ntôô Pablo a nga tsili naa : « Amu naa, “a ligheyang avitsang tam”, ye naa, “é môr a zu, a ye so, éde, aa ye ki bem naa a zu” » (Behéb. 10:37). Aval avé dzam té da name bia ? Nfa mboo, é tam bôr ba yiène ñong nkighane naa be sèhane Jehôva é ligheyang avitzang (1 Becor. 7:29). Ye naa, nge bi ñonghang nkighane naa bia sèhane Jehôva, bia yem naa, amben bia ye tubane mindzukh melu me ye asughlane ma, « a ligheyang avitsang tam ».

18. Za dzam Yésu ba Jehôva ba kômô naa bi bo ?

¹⁸ Yésu a nga dzô beyeghe bèñ naa, baa yiène ki a sum ve naa ba béé ñe, ba yiène fe tsini naa ba bo do (Mat. 16:24). Éde amben bi sèhaneyang Jehôva ébe abuiñ mimbu, bia yiène tsini naa bia bo do. Bia yiène sèñ ngu’u nfa ye naa, bi tsini naa bia sèhane Jehôva. Bia yem naa, daa ye ki bo ébubu, ve, nge bi ve mengu’u, bia ye tobe mevakh ya bele abuiñ biboran amu bia sèhane ñe ! (Bya 35:27).

19. Za ayeghle bia ñong ébe éfônane Gene ?

¹⁹ Abim bôr bézing ba tem naa nge be sèhane Jehôva, baa ye ki buan éning deba. Nge ô ne étong, ye wa tem naa, nge ô sèhane Jehôva waa ye ki buan éning duè ? Étong moadzang a too éyôla naa Gene, a dzô naa : « Me nga wôrane naa, nge me sèhane Jehôva maa ye ki buan éning. Me mbe mé yen naa, é bong bia be-be bi nga vem, be mbe bé buane mam ane a ke mefet, a kuiñ ya é bôr bevoo, a bo metsap me ne nget, atoo naa, ma me mbe mé ke fave bisulan ya minkanghle ». Aval avé mesimane meté me nga name Gene ? Émièn a dzô naa : « Me nga sum naa ma ning bining bibèñ. Me nga wôrane naa me ne mevakh ébe ôyôm tam. Ve, mevakh meté méé dzi ki bem. Me nga sum naa ma binan ébe abuan me mbe ñong nge me bo é dzam Bible a dzô. Éde me nga ñong nkighane naa ma sèhane Jehôva ya n’nem ôse. Atéé ye tam té, ma wôrane naa Jehôva a yalane meyaghlane mesese ma bo ñe ».

20. Za dzam bia yiène tobe nkoghane naa bia bo ?

²⁰ N’yiè bya ézing a nga yiè Jehôva naa : « Mvom ébe é môr wa top ya so ya ñe ébe wa nfa ye naa a tobe minseng muè » (Bya 65:4). Éde, bia yiène tobe nkoghane naa bia tsini naa bia sèhane Jehôva. Ane Josué, bia dzô fe naa : « Ma ya é nda bôr dzam bia ye sèhane Jehôva » (Jos. 24:15).