José nge ki Joseph, a mbe ndôma dzaa ye bichiè bendôma Jacob a mbe a bele. É bobeñang be mbe ñe ôsu, be nga yen naa, ésaa wôba, a nga dang dzing José a lôr bo. Éde, wa tem naa dzam té é mbe be a tobe ya ? Be nga sum naa ba ñamle José ya fem ñe. Éyong José a nga yen aval biyeyem bizing, éde a nga kanghle bie bobeñang bèñ. Éde be nga tem naa, biyeyem bité bi nga yili naa, môs ézing, ba ye ñe kur mebong asu. Éyong té éde be nga tugha ñe bera fem !

Môs ézing, bobeñang José be mbe bé kale mintôma bébéñ é kisoan ba luè naa Siquem nge ki Sichem. Jacob a nga lôm José naa, a ke daghe nge be mbe mvoa. Éyong be nga yen ñe é so ôyap, ane be nga sum naa ba dzôhane mboo ya éñi mboo naa : “É moadzang waa a yen biyeyem éñe alé a zu. N’wighane ñe !” Éde be nga wua ñe ébéñ ôsi. Ve, éde Judá, moanñang wèñ nfe, a nga dzô naa : “Mi taa ñe wiñ ! Ndaane de, n’kuanane ñe ane nkôm.” Ane be nga kuane José akal minsang mi mono 20 ébe bebo ôkira be ya Madián be mbe bé ke Egipto.

A kôrô ye vaa, éde bobeñang José be nga du étôp a mbe a baghe mekî me ékela été, ye lôm de ésaa wôba bé dzô naa : “Ye se étôp ndôma duè éde alé ?” Éde Jacob a nga tem naa, tsit ye afan é nga wiñ José. A nga bira wokh n’nem mintéñ. Môr ézing éé mbe ki ñe fôlô.

Éyong be nga kuiñ ya ñe Egipto, ane be nga kuane José ébe môra môr ézing ye wéñ, bé luè ñe naa Potifar. Ve, Jehôva a mbe ya José. Potifar a nga yen naa, José a mbe mbemba mbo-ésèñ, ye naa, a mbe tobe a ñe mebun. Kaa bem, éde a nga kee José ayem naa a kale é biôm bièñ bisese.

É minenga Potifar a nga yen naa, José a mbe mbemba ndôman ô mis, a too fe ngu’u. Za dzam José a nga ye bo ? A nga tep ye dzô ñe naa : “Kaa ! Déé se ki mvèñ. É masa wom a tobe a ma mebun, wa ki, ô ne é minenga wèñ. Nge me kele ya wa binong, ma ye bo nsem é mis Nzame !”

Môs ézing, é minenga Potifar a nga dzeng naa, a biñ José ya ngu’u naa a ke ya ñe binong. A nga kelebe ñe bitôp, ve, ane José a nga tup mbii. Éyong Potifar a nga bulan a nda, éde a nga dzô ñe naa, José a nga biñ ñe ya ngu’u. Éé mbe ki é kobe bebela. Potifar a nga bira de wokh ôlun, éde a nga wua José a nda mimbokh. Vedaa, Jehôva éé dzi ki vuène José.

Nté José a mbe mimbokh, Faraón, kéza ye Egipto, a nga yen biyeyem môr ézing éé mbe ki ñe ve ayilgha. Mbo-ésèñ wèñ ézing a nga dzô Faraón naa, José a mbe ñe ve ayilgha ye biyeyem bièñ. Étéñ té ébién, Faraón a nga lôm naa be ke ñong José.

Faraón a nga sili ñe naa : “Ye ô ne me ve ayilgha ye biyeyem biam ?” Ane José a nga dzô Faraón naa : “Egipto da ye bele abuiñ bidzi tang mimbu zangbwa, éyong té mimbu mi zèñ zangbwa mia ye zu ôsu vèè. Topghe é môr a ne fakh naa a baghle bidzi mengun été, nfa ye naa ayong é taa wu zèñ.” Éde Faraón a nga yalane naa : “Wa ma top ! Wa ye bo é môr bèè a dang ngu’u Egipto !” Za aval José a nga yem ayilgha ye biyeyem Faraón ? Jehôva a nga vole José.

Nté mimbu zangbwa mi nga lôt, José a nga baghle bidzi mengun été. Éyong té zèñ é nga sum si ése ngura aval ane José a nga dzô de. Bôr be mbe bé so mevôm mesese naa ba zu kus bidzi ébe José. Jacob, ésaa José, a nga wokh naa bidzi bi mbe Egipto, éde a nga lôm bendôma awôm bèñ wéñ naa be ke kus bidzi.

Bendôma Jacob be nga ke kuane José, éde a nga dzigha be yem. Ve, bobeñang béé dzi ki yem naa a mbe José. Be nga kur ñe mebong asu, aval ane a nga yen de biyeyem été éyong a mbe étong. José a nga kômô yem nge bobeñang be ngen be bele zing a n’nem été. Éde a nga dzô be naa : “Mi ne bendong si. Mia kômô yem mevôm é si dèè é ne ébubu a ñong.” Be nga dzô naa : “Momo ! Bi ne bobeñang 12, bia so a Canaán. Moadzang mboo wèè éñe a wuang, ye naa mesughlan éñe a va lighi ye tare wèè.” Éyong té José a nga dzô naa : “Zaane ma mesughlane moanñang wônan, éyong té ma ye bunu é dzam mia dzô.” Ane be nga bulan ébe ésaa wôba.

Éyong é nda-bôr dzeba déé dzi ki fe bele bidzi, ane Jacob a nga bera lôm bendôma bèñ Egipto. Tam té, be nga ke ya Benjamín, mesughlane moanñang wôba. Naa a vak bobeñang, José a nga shuale élas dèñ é mbe mboane ya miang nfakh mefes Benjamín, ôsu vèè, a bôre bobeñang naa be wupbang de. Éyong bebo-bisèñ José be nga yen élas nfakh Benjamín été, bobeñang be nga ko wong. Be nga dzaa José naa a ve be akira évang Benjamín.

Tam té, José a nga yem naa, bobeñang be tsenang. José éé mbe ki fe shuale é dzam a mbe é wôran. A nga sum yi ye dzô be naa : “Me ne José, moanñong wônan. Ye tare a ngen a tèè ?” Bobeñang be nga bira de yaghan. A nga dzô be naa : “Mi taa ve mina bebién bidzô amu é dzam mi nga bo ma. Nzame éñe a nga lôm me va naa me kôre bining bienan. Éndagha, avôô zaane tare e va.”

Be nga dughan é nda dzeba naa be ke kare ésaa wôba mbemba fuèñ, ye ke ñe Egipto. José ba ésaa be nga bera yenan, a kuane naa abong té abuiñ mimbu mi lôrang.