John Asɛmpa
16 “Maka dɛm nsɛm yi akyerɛ hom mbrɛ ɔbɛyɛ a biribiara ronnto hom fintsidua. 2 Nkorɔfo bɛpam hom efi nhyiamudan mu. Nokwasɛm nye dɛ, ber bi reba a obiara a oboku hom no, n’adwen bɛyɛ no dɛ ɔreyɛ dɛm dze asom Nyankopɔn. 3 Naaso wɔbɛyɛ dɛm ndzɛmba yi osiandɛ wonnyim emi anaa Egya no. 4 Na maka dɛm nsɛm yi akyerɛ hom mbrɛ ɔbɛyɛ a sɛ ber so na osisi a, hom bɛkaa dɛ mekaa kyerɛɛ hom.
“Ahyɛse no dze mannka dɛm nsɛm yi annkyerɛ hom, osiandɛ nna mowɔ hom nkyɛn. 5 Seseiara dze, morokɔ Nyia ɔsomaa me no nkyɛn; naaso hom mu kor mpo mmbisaa me dɛ, ‘Henfa na erokɔ?’ 6 Na osiandɛ maka dɛm nsɛm yi akyerɛ hom ntsi, awerɛhow ahyɛ hom akoma ma. 7 Mereka nokwar akyerɛ hom, kɔ a morokɔ no, ɔbɔboa hom. Osiandɛ sɛ mannkɔ a, ɔboafo no remmba hom nkyɛn. Mbom sɛ mokɔ dze a, mobɔsoma no ma ɔaaba hom nkyɛn. 8 Na sɛ ɔba a, ɔbɛma wiadze no enya dase a odzi mu afa bɔn nye tsenenee nye atsɛmbu ho. 9 Odzi kan, ɔbɛma dase afa bɔn ho, osiandɛ wɔnngye me nndzi. 10 Bio so, ɔbɛma dase afa tsenenee ho, osiandɛ morokɔ Egya no nkyɛn na hom runnhu me bio. 11 Afei, ɔbɛma dase afa atsɛmbu ho, osiandɛ woebu obi a odzi wiadze yi do tum no atsɛn.
12 “Meda ho ara wɔ nsɛm pii ka kyerɛ hom, naaso hom runntum nnsoa ne nyina seseiara. 13 Naaso sɛ ɔno* ba a, mekyerɛ, sɛ nokwar sunsum no ba a, ɔbɛkyerɛ hom kwan akɔ nokwar no nyina mu, osiandɛ ɔrommbɔ nankasa ne tsirmu nnkasa, mbom dza ɔtse na ɔbɛka, na ɔbɛkyerɛ hom ndzɛmba a ɔbɛba no. 14 Ɔno na ɔbɛhyɛ me enyimnyam, osiandɛ dza ne nsa bɛka efi mo hɔ no, ɔno na ɔbɛka akyerɛ hom. 15 Dza Egya no wɔ nyina yɛ medze. Ɔno ntsi na mekaa dɛ dza ne nsa bɛka efi mo hɔ no, ɔno na ɔbɛka akyerɛ hom no. 16 Aka kakraabi hom runnhu me bio, na aka kakraabi hom bohu me bio.”
17 Nna n’esuafo no mu binom kekaa kyerɛɛ hɔnho dɛ: “Ɔse, ‘Aka kakraabi hom runnhu me bio, na aka kakraabi hom bohu me bio,’ afei so ɔkaa dɛ, ‘osiandɛ morokɔ Egya no nkyɛn.’ Dɛm nsɛm yi kyerɛ dɛn?” 18 Afei so wobisabisaa hɔnho dɛ: “‘Aka kakraabi’ a ɔkae no, ɔkyerɛ dɛn? Yennyim dza ɔreka ho asɛm no.” 19 Nna Jesus nyim dɛ wɔpɛ dɛ wobisa no asɛm, ntsi ɔkaa kyerɛɛ hɔn dɛ: “Asɛm a mekaa dɛ: ‘Aka kakraabi hom runnhu me bio, na aka kakraabi hom bohu me’ no, ɔno ntsi na hom ribisabisa homho dɛm nsɛm yi a? 20 Nokwar, nokwar mese hom dɛ, hom bosu na hom eedzi yaw,* naaso wiadze no bedzi ehurusi; hom bedzi awerɛhow, naaso hom awerɛhow no bɛdan enyigye. 21 Sɛ ɔbaa rowo a, ɔtse yaw* osiandɛ ne ber aso, naaso sɛ onya wo abofra no wie a, ɔnnkaa ne yaw no bio osiandɛ n’enyi gye dɛ ɔawo ba aba wiadze. 22 Dɛmara na hom so sesei hom ridzi awerɛhow; naaso mubohu hom bio, na hom akoma bedzi ehurusi, na obiara runntum nngye hom enyigye no mmfi hom nsamu. 23 Na dɛm da no hom rimmbisa me asɛm biara. Nokwar, nokwar mese hom dɛ, biribiara a hom bebisa Egya no, ɔdze bɛma hom wɔ me dzin mu. 24 Naaso ɔdze besi dɛm aber yi, hom mmbisaa adze kor mpo wɔ me dzin mu. Hom mbisa na hom nsa bɛka, na hom enyigye aabor do.*
25 “Medze ntotoho aka nsɛm yi akyerɛ hom. Na ber bi reba a meremmfa ntotoho nnkasa nnkyerɛ hom bio, mbom mebɛka Egya no ho asɛm akyerɛ hom pefee. 26 Dɛm da no hom bebisa Egya no biribi wɔ me dzin mu. Sɛ meka dɛm a, ɔnnkyerɛ dɛ mibebisa biribi wɔ Egya no hɔ ama hom. 27 Siantsir nye dɛ Egya no ankasa pɛ hom asɛm, osiandɛ hom pɛ m’asɛm na hom agye edzi dɛ mebaa dɛ Nyankopɔn n’ananmusinyi.* 28 Mebaa wiadze dɛ Egya no n’ananmusinyi.* Naaso seseiara mirifi wiadze akɔ Egya no nkyɛn.”
29 Nna n’esuafo no kaa kyerɛɛ no dɛ: “Hwɛ, seseiara dze enye hɛn rekasa pefee na erennyɛ ntotoho biara. 30 Afei dze yeehu dɛ inyim biribiara na no ho nnhia mpo dɛ etweɔn ma obi bisa wo asɛm. Iyi ntsi yɛagye edzi dɛ ifi Nyankopɔn hɔ bae.” 31 Nna Jesus bisaa hɔn dɛ: “Seseiara dze hom gye dzi a? 32 Hwɛ, ber bi reba, na ampa woenya edu mpo, dɛ hom nyina bɔbɔ apetse akɔ hom efie na hom aadan me egya ma aaka manko. Naaso ɔnnkaa manko, osiandɛ Egya no ka mo ho. 33 Maka dɛm nsɛm yi akyerɛ hom ama hom nam mo do eenya asomdwee. Wiadze yi mu dze, homho behiahia hom, naaso hom nnya akokodur! osiandɛ medzi wiadze no do konyim.”