Luke Asɛmpa

11 Da bi so nna ɔwɔ beebi robɔ mpaa, na aber a ɔbɔɔ mpaa wiei no, n’esuafo no mu kor kaa kyerɛɛ no dɛ: “Ewuradze, kyerɛ hɛn mbrɛ wosi bɔ mpaa, dɛ mbrɛ John so kyerɛɛ n’esuafo no.”

2 Ntsi ɔkaa kyerɛɛ hɔn dɛ: “Aber biara a hom bɔbɔ mpaa no, hom nka dɛ: ‘Egya, wo dzin ho ntsew. W’Ahendzi* mbra. 3 Ma hɛn edziban da biara da dɛ mbrɛ yebehia wɔ da no mu. 4 Na fa hɛn bɔn kyɛ hɛn, osiandɛ hɛn so obiara a ɔdze hɛn kaw no yɛdze kyɛ no; na mma mmfa hɛn nnkɔ nsɔhwɛ mu.’”

5 Afei ɔkaa kyerɛɛ hɔn dɛ: “Yɛmfa no dɛ hom mu kor wɔ nyɛnko bi, nna ɔkɔr ne nkyɛn esuom kɛkaa kyerɛɛ no dɛ, ‘Me nyɛnko, ma* me paanoo ebiasa, 6 osiandɛ me nyɛnko bi fi akwantu mu aba me nkyɛn seseiara, na minnyi hwee a medze bɛma no.’ 7 Nna ne nyɛnko no kaa kyerɛɛ no dɛ: ‘Mma nnhaw me. Wɔatow abow no mu dada, na menye me mba nkakraba so adeda. Murunntum nnsoɛr mma wo biribiara.’ 8 Mereka akyerɛ hom dɛ, sɛ ɔnnyɛ dɛ ɔyɛ ne nyɛnko ntsi na ɔbɔsoɛr abɛma no biribi mpo a, osiandɛ ɔdze asɛm no ruguan no ho ntsi, ɔbɔsoɛr na ɔdze dza ohia biara abɛma no. 9 Ntsi mereka akyerɛ hom dɛ, hom nkɔ do mbisa, na wɔdze bɛma hom; hom nkɔ do nhwehwɛ, na hom bohu; hom nkɔ do mbɔ mu, na wobobue hom. 10 Na obiara a obisa no ne nsa bɛka, na obiara a ɔhwehwɛ no obohu, na obiara a ɔbɔ mu no, wobobue no. 11 Na hom mu woana na ɔyɛ egya na sɛ ne ba bisa no nam* a, ɔdze ɔwɔ bɛma no, na ɔremma no nam? 12 Anaa obisa no kyirefuwa a ɔbɛma no nyankoma-ketsebowa?* 13 Na sɛ hom a hom yɛ ndzebɔnyɛfo mpo nyim mbrɛ hom dze akyɛdze pa ma hom mba a, ɔno hom Egya a ɔwɔ sor no so ɛ, hom hwɛ a ɔremmfa sunsum krɔnkrɔn mma hɔn a wobisa no no ma ɔmmbor do anaa?”

14 Ekyir yi otuu sunsum fi bi a ɔama ɔbarimba bi ayɛ mmum no fii no mu. Na aber a sunsum fi no fii no mu no, ɔbarimba no kasae, na ɔyɛɛ nyimpadɔm no nwanwa. 15 Naaso hɔn mu binom kaa dɛ: “Ɔnam Beelzebub* a ɔyɛ esunsum fi hɔn panyin no tum do na otu esunsum fi.” 16 Nna binom so pɛ dɛ wɔsɔ no hwɛ, ntsi wɔkaa kyerɛɛ no dɛ ɔnyɛ asɛnkyerɛdze bi a ofi sor nkyerɛ hɔn. 17 Naaso nna onyim adwen a wɔrodwen, ntsi ɔkaa kyerɛɛ hɔn dɛ: “Ahendzi biara a ɔsoɛr tsia noho no, ɔbɛsɛɛ, na fie biara a ɔsoɛr tsia noho no, ɔbɔhwe ase. 18 Ntsi sɛ Satan soɛr tsia noho a, n’ahendzi besi dɛn egyina? Osiandɛ hom ka dɛ menam Beelzebub no tum do na mutu esunsum fi. 19 Sɛ menam Beelzebub do na mutu esunsum fi dze a, ɔno woana na hom mba* nam no do tu hɔn? Iyi ntsi na hom mba bobu hom atsɛn no. 20 Naaso sɛ menam Nyankopɔn ne nsatseaba do na mutu esunsum fi a, ɔno Nyankopɔn n’Ahendzi no aba naaso hom ennhu. 21 Sɛ ɔbarimba hoɔdzenfo bi roweɔn ne fie, na n’akodze hyehyɛ noho a, n’egyapadze biara rennyew. 22 Naaso sɛ obi a noho yɛ dzen kyɛn no bɔtow hyɛ no do na odzi no do konyim a, ɔbɛfa n’akodze a ɔdze no ho too do no nyinara akɔ, na ɔaakyekyɛ ndzɛmba a ɔgyee fii ne nsamu no ama nkorɔfo. 23 Obiara a onnyi m’afa no soɛr tsia me, na obiara a ɔnnye me mmboaboa ano no hotse mu.

24 “Sɛ sunsum bɔn fi obi no mu a, okekyinkyin asaase wesee do kɔhwehwɛ beebi a ɔbɛgye n’ahom, na sɛ oennya bi a, ɔka dɛ, ‘Mebɛsan akɔ me fie a mifii mu bae no mu.’ 25 Na sɛ okodu hɔ a, obohu dɛ wɔaprapra fie hɔ esiesie hɔ kama. 26 Afei ɔkɔ kɛfa esunsum fi esuon a wɔnnyɛ koraa kyɛn no ma wɔkɛtsena fie no mu. Na sɛ ɔba no dɛm a, asetsena a nyimpa no bɔkɔ mu no bɛkyɛn dza nna ɔwɔ mu dada no.”

27 Na aber a ɔreka dɛm nsɛm yi no, ɔbaa bi fi nyimpadɔm no mu maa ne ndze do kaa kyerɛɛ no dɛ: “Enyigye nye yafun a onyinseen wo nye enumfo a inumii!” 28 Naaso ɔkaa kyerɛɛ no dɛ: “Oho, mbom enyigye nye hɔn a wotsie Nyankopɔn n’asɛm na wɔdze yɛ edwuma!”

29 Aber a nyimpadɔm no roboaboa hɔnho ano no, ɔhyɛɛ ase kaa kyerɛɛ hɔn dɛ: “Dɛm ebusuasantsen yi yɛ ebusuasantsen ndzebɔnyɛfo; wɔhwehwɛ asɛnkyerɛdze. Naaso wɔremma hɔn asɛnkyerɛdze biara, gyedɛ Jonah n’asɛnkyerɛdze no. 30 Na dɛ mbrɛ Jonah bɛyɛɛ asɛnkyerɛdze maa Ninevehfo no, dɛmara na nyimpa Ba no so bɛyɛ asɛnkyerɛdze ama dɛm ebusuasantsen yi. 31 Anaafo afamu hembaa no nye nyimpa a wɔwɔ dɛm ebusuasantsen yi mu no bɔsoɛr na oeebu ebusuasantsen yi fɔ wɔ atsɛmbu no mu. Osiandɛ ofi ekyirekyir tɔnn betsiee Solomon ne nyansaa. Naaso hwɛ, obi a ɔso sen Solomon wɔ ha. 32 Atsɛmbu no mu no, nyimpa a wɔwɔ Nineveh no nye ebusuasantsen yi bɔsoɛr na woeebu ebusuasantsen yi fɔ, osiandɛ aber a Jonah kaa asɛm no kyerɛɛ hɔn no, wonuu hɔnho. Naaso hwɛ, obi a ɔso sen Jonah wɔ ha. 33 Sɛ obi sɔ kandzea a, ɔmmfa nnsuma, na dɛmara so na ɔmmfa nnhyɛ kɛntsɛn ase, mbom ɔdze si kandzeadua do, ama hɔn a wɔbɛba dan no mu no eehu kan no. 34 Wo nyimpadua ne kandzea nye w’enyiwa. Ntsi sɛ w’enyiwa hwɛ tsenn a, wo nyimpadua nyinara so hyerɛn; naaso sɛ w’enyiwa ber adze a, wo nyimpadua so yɛ sum. 35 Dɛm ntsi hom nhwɛ yie, na wɔammba no dɛ kan a ɔwɔ hom mu no yɛ sum. 36 Ntsi sɛ wo nyimpadua nyinara hyerɛn, na ne fa beebiara nnyɛ sum a, nyimpadua no nyinara bɛhyerɛn, dɛ mbrɛ kandzea hyerɛn na ɔma wo kan no.”

37 Aber a Jesus kasae wiei no, Phariseenyi bi serɛɛ no dɛ ɔnye no mbedzidzi. Ntsi ɔkɔr ne fie nye no kedzidzii. 38 Naaso aber a Phariseenyi no hun dɛ ɔannhohor ne nsa ho ansaana oridzidzi no, ɔyɛɛ no nwanwa. 39 Nna Ewuradze kaa kyerɛɛ no dɛ: “Hom Phariseefo, hom twutwuw kɔɔpow na prɛtse ho, naaso no mu dze, edzifodzepɛ na bɔn ara nko twom. 40 Hom a hom nnyi ntseasee!* Obi a ɔyɛɛ n’ekyir no, ɔnnyɛ ɔnoara na ɔyɛɛ no mu no so a? 41 Ntsi sɛ hom reyɛ adɔyɛ a, hom mfi hom akoma mu nyɛ. Sɛ hom yɛ dɛm a, hom ho bɛtsew wɔ adze nyinara mu. 42 Naaso hom Phariseefo dze, hom ndue, osiandɛ hom yi mint* na peganoni* na nhabanhaban nyinara ho ebupɛn du, naaso Nyankopɔn n’atsɛntsenenee na no dɔ dze, hom mmbu no hwee. Ɔsɛ dɛ hom yi ebupɛn du no dze, naaso ɔno nnkyerɛ dɛ ɔsɛ dɛ hom bu hom enyi gu ndzɛmba a no ho hia paa no do. 43 Hom ndue hom Phariseefo, osiandɛ sɛ hom kɔ nhyiamudan mu a, dza hom pɛ ara nye ngua a ɔwɔ enyim.* Na hom pɛ dɛ nkorɔfo dze nkyia soronko bi ma hom wɔ guado. 44 Hom ndue, osiandɛ hom tse dɛ nda a nyimpa nnhu, nda a sɛ nkorɔfo nantsew do mpo a wonnhu!”

45 Nna hɔn a wonyim Mbra no yie no mu kor kaa kyerɛɛ no dɛ: “Kyerɛkyerɛnyi, sɛ eka dɛm a, nna erehyehyɛ hɛn so ahorba o.” 46 Nna ɔkaa kyerɛɛ no dɛ: “Hom a hom nyim Mbra no yie no so hom ndue, osiandɛ hom dze ndzesoa a no soa yɛ dzen soa nkorɔfo, naaso homankasa dze, hom mmfa hom nsatseaba kor mpo nnka ndzesoa no.

47 “Hom ndue, osiandɛ hom tow nkɔnhyɛfo no hɔn nda do, naaso hom egyanom na wokunkum hɔn! 48 Hom nyim dza hom egyanom yɛe no paa, na hom pen do so, osiandɛ hɔn na wokunkum nkɔnhyɛfo no dze, naaso hom na hom rotow nkɔnhyɛfo no hɔn nda no do. 49 Iyi ntsi na Nyankopɔn ne nyansaa so ka dɛ: ‘Mobɔsoma nkɔnhyɛfo na asomafo akɔ hɔn nkyɛn, na woboku hɔn mu binom, na wɔaatan binom so enyi. 50 Na osian iyi ntsi, wobebisa nkɔnhyɛfo hɔn bɔgyaa a ofitsi wiadze ahyɛse wɔaka egu nyinara efi ebusuasantsen yi hɔ. 51 Ofitsi Abel no bɔgyaa do araa kesi Zechariah a wokum no wɔ afɔrmbukyia no na asɔrdan no ne ntamu no bɔgyaa do.’ Nyew, mereka akyerɛ hom dɛ, wobebisa no wɔ dɛm ebusuasantsen yi hɔ.

52 “Hom a hom nyim Mbra no yie, hom ndue, osiandɛ hom agye nyimdzee saafee no efi nkorɔfo nsamu. Hom a hom annkɔ mu, hɔn a wɔrokɔ mu no so a, hom siw hɔn kwan!”

53 Ntsi aber a opuei fii hɔ no, akyerɛwfo na Phariseefo pii botwaa no ho hyiae na wɔhyɛɛ ase dɛ woribisabisa no ndzɛmba pii ho nsɛm, 54 mbrɛ ɔbɛyɛ a wobegyina asɛm bi a ɔbɛka do abɔ no sombo.