John Asɛmpa
10 “Nokwar, nokwar mese hom dɛ, obiara a ɔammfa abow no mu ammba nguambuw no mu, na mbom ɔbɔfow akɛfa beebi fofor aba mu no, dɛm nyimpa no, ɔyɛ ewi na epoobɔnyi. 2 Naaso obi a ɔfa abow no mu ba mu no, ɔno nye nguan no hɔn hwɛfo. 3 Ɔno na abowanohwɛfo no bue no, na nguan no tsie ne ndze. Ɔbɔ nankasa no nguan dzin frɛ hɔn na ɔdze hɔn pue. 4 Sɛ ɔdze no nguan no nyina pue a, odzi hɔn enyim na nguan no dzi n’ekyir osiandɛ wonyim ne ndze. 5 Ɔhɔho dze worinndzi n’ekyir da na mbom woboguan efi ne nkyɛn, osiandɛ wonnyim ahɔho hɔn ndze.” 6 Jesus yɛɛ dɛm ntotoho yi kyerɛɛ hɔn, naaso wɔanntse dza nna ɔreka akyerɛ hɔn no ase.
7 Ntsi Jesus kaa kyerɛɛ hɔn bio dɛ: “Nokwar, nokwar mese hom dɛ, emi nye abow a nguan no fa mu no. 8 Hɔn a wɔdze me dzin bae no nyina yɛ ewifo na epoobɔfo; na nguan no enntsie hɔn. 9 Emi nye abow no, na obiara a ɔfa mo do kɔ mu no wɔbɛgye no nkwa, na ɔbɔkɔ mu na oeepue na obenya edzidzibea. 10 Owifo remmba gyedɛ orubowia adze na oeedzi ewu na ɔaasɛɛ adze. Maba mbrɛ ɔbɛyɛ a wobenya nkwa na woeenya no mbordo. 11 Emi nye oguanhwɛfo pa no; oguanhwɛfo pa no dze no nkwa* to hɔ ma nguan no. 12 Ɔpaanyi a ɔnnyɛ oguanhwɛfo, na nguan no nnyɛ nedze no, sɛ ohu dɛ pataku reba a, oguan gya nguan no hɔ, na pataku no bɛkyer nguan no na ɔbɔ hɔn petse. 13 Siantsir a ɔpaanyi no guan nye dɛ, ɔno dze paa ara na wɔdze abɔ no, na nguan no ho nnhia no. 14 Emi nye oguanhwɛfo pa no. Minyim mo nguan na mo nguan so nyim me, 15 dɛ mbrɛ Egya no nyim me na mo so minyim Egya no, na medze mo nkwa* to hɔ ma nguan no.
16 “Na mowɔ nguan fofor bi so a wonnyi buw yi mu; hɔn so ɔsɛ dɛ medze hɔn ba buw yi mu, na wobetsie me ndze na wɔaayɛ nguankuw kor, na woeenya ɔhwɛfo kor. 17 Egya no dɔ me osiandɛ medze mo nkwa* to hɔ mbrɛ ɔbɛyɛ a me nsa bɛsan aka no bio. 18 Obiara renngye mmfi me nsamu osiandɛ mara na medze to hɔ. Na mowɔ hokwan* dɛ medze to hɔ, na mowɔ hokwan* so dɛ me nsa ka no bio. Dɛm ahyɛdze yi, m’Egya na ɔdze maa me.”
19 Osian dɛm nsɛm yi ntsi Jewfo no hɔn mu kyɛɛ bio. 20 Na hɔn mu pii kaa dɛ: “Ɔwɔ sunsum fi na ɔabɔ dam. Ebɛnadze ntsi na hom tsie no?” 21 Naaso binom so kaa dɛ: “Iyi nnyɛ nsɛm a ofi obi a ɔwɔ sunsum fi hɔ. Hom hwɛ a sunsum fi botum ebue enyifurafo hɔn enyiwa a?”
22 Dɛm aber no, nna woridzi Asɔrfie No Ne Ntsewho Afahyɛ no wɔ Jerusalem. Nna ɔyɛ awɔwber, 23 na nna Jesus nam Solomon Abrandaa no mu wɔ asɔrfie hɔ. 24 Na Jewfo no botwaa no ho hyiae na wɔhyɛɛ ase bisaa no dɛ: “Ebɛma hɛn adwen mu ayɛ hɛn konsee ekodu dabɛn?* Sɛ ɔwo nye Christ no a, ka no pen kyerɛ hɛn ɛ.” 25 Nna Jesus yii hɔn ano dɛ: “Maka akyerɛ hom, naaso hom nngye nndzi. Ndwuma a mereyɛ no wɔ m’Egya ne dzin mu no, ɔno na odzi mo ho dase. 26 Naaso hom nngye nndzi osiandɛ hom nnyɛ mo nguan. 27 Mo nguan tsie me ndze, na minyim hɔn, na wodzi m’ekyir. 28 Mema hɔn onnyiewiei nkwa, na wɔrennsɛɛ hɔn da, na obiara runnhwim hɔn mmfi me nsamu. 29 Dza m’Egya dze ama me no, ɔsom bo kyɛn biribiara, na obiara runntum nnhwim mmfi Egya no ne nsamu. 30 Emi na Egya no yɛ kor.”*
31 Dɛm aber yi so, Jewfo no tasee mbobaa dɛ wɔdze ribesiw no abo. 32 Nna Jesus kaa kyerɛɛ hɔn dɛ: “Ndwuma pa piigyan a m’Egya kaa dɛ menyɛ no nyina mayɛ akyerɛ hom. Ntsi ndwuma no mu hendze na hom pɛ dɛ hom siw me abo wɔ ho yi?” 33 Nna Jewfo no yii no ano dɛ: “Ɔnnyɛ edwuma pa bi a ayɛ ntsi na yeribesiw wo abo no, mbom ebususɛm a aka no ntsi a; osiandɛ eyɛ nyimpa dasanyi, naaso eyɛ woho dɛ eyɛ nyame bi.” 34 Nna Jesus bisaa hɔn dɛ: “Wɔnnkyerɛwee wɔ hom Mbra no mu dɛ, ‘Maka dɛ: “Hom yɛ enyame”’?* 35 Na yenyim dɛ kyerɛwsɛm no so dze worunntum nnsesa no ma ɔnnyɛ yie. Ntsi sɛ Nyankopɔn frɛɛ hɔn a n’asɛm kasae tsiaa hɔn no mpo ‘enyame’ a, 36 nna ɔno emi a Egya no atsew mo ho na ɔasoma me aba wiadze no, sɛ meka dɛ ‘Meyɛ Nyankopɔn ne Ba’ a, ebɛnadze ntsi na hom se maka ebususɛm? 37 Sɛ ɔnnyɛ m’Egya no ndwuma na mereyɛ a, ɔno mma hom nngye me nndzi. 38 Na sɛ ɔno ara na mereyɛ yi, na sɛ emi mpo na hom nngye me nndzi a, ɔnodze hom ngye ndwuma no ndzi. Iyi bɛma hom ebohu na hom aakɔ do ehu dɛ Egya no nye me yɛ kor na emi so menye Egya no yɛ kor.” 39 Ntsi wɔsanee yɛɛ dɛ wɔrekyer no bio, naaso ofii hɔ kɔree na hɔn nsa annka no.
40 Na ɔsanee kɔr Jordan Esutsen no n’ekyir, beebi a nna John numa nkorɔfo no, na ɔkɛtsenaa hɔ. 41 Na nyimpa pii baa ne nkyɛn na wɔhyɛɛ ase kaa dɛ: “John annyɛ asɛnkyerɛdze kor mpo, naaso dza John kae faa ɔbarimba yi ho no nyina yɛ nokwar.” 42 Na nyimpa pii gyee no dzii wɔ hɔ.