Matthew Asɛmpa

24 Afei aber a Jesus rifi asɔrfie hɔ akɔ no, n’esuafo no baa ne nkyɛn bɛkyerɛɛ no asɔrfie no nyinara. 2 Nna ɔkaa kyerɛɛ hɔn dɛ: “Hom ehu iyinom nyinara? Nokwar mese hom dɛ, wobodwuruw ne nyinara egu famu, na worinngya ɔbo kor mpo wɔ ɔbo fofor do.”

3 Na aber a ɔtsena Ngodua Bepɔw no do no, esuafo no baa ne nkyɛn wɔ nsumaa mu bebisaa no dɛ: “Ka kyerɛ hɛn, ebɛn aber na iyinom besisi, na ebɛnadze na ɔbɛma yeehu dɛ aba,* na wiadze* n’ewiei ho asɛnkyerɛdze bɛyɛ dɛn?”

4 Jesus kaa kyerɛɛ hɔn dɛ: “Hom nhwɛ yie na obiara aanndaadaa hom, 5 osiandɛ nyimpa beberee dze me dzin bɛba abɛka dɛ, ‘Emi nye Christ no,’ na wɔbɛdaadaa dodowara. 6 Hom bɛtse akodzi nye ɔko ho amandzɛɛbɔ. Hom nhwɛ yie na hom akoma eenntu, osiandɛ otwar dɛ iyinom nyinara sisi. Naaso nna ɔno nnkyerɛ dɛ ewiei no aba.

7 “Na ɔman bɔsoɛr etsia ɔman, na ahendzi bɔsoɛr etsia ahendzi, na ɔkɔm na asaasewosow besisi wɔ mbeambea. 8 Iyinom nyinara yɛ awoo mu yaw* n’ahyɛse.

9 “Na nkorɔfo bɛtan hom enyi* na woeeku hom na me dzin ntsi aman nyinara bɛtan hom. 10 Afei so, nyimpa pii hɔn gyedzi bɛyɛ mberɛw* na wobeyiyi hɔnho ama na wɔaatentan hɔnho. 11 Nkɔnhyɛfo atorfo beberee bɛba na wɔaadaadaa nyimpa pii; 12 na osian emumuyɛ* a ɔbɔdɔɔ so ntsi, nyimpa beberee hɔn dɔ n’ano bɔdwe. 13 Naaso obi a obemia n’enyi* egyina mu ekodu ewiei no, ɔno na wɔbɛgye no nkwa. 14 Na Ahendzi ho asɛmpa yi, wɔbɛka wɔ wiadze nyinara dze edzi amanaman nyinara dase, na ɔno ekyir no, ewiei no bɛba.

15 “Dɛm ntsi, sɛ hom hu ekyiwadze a ɔsɛɛ ɔman a nkɔnhyɛnyi Daniel kaa ho asɛm no dɛ ogyina krɔnkrɔn bea hɔ a (ma obi a ɔrekenkan no mfa nhumu nyɛ edwuma), 16 ɔno hɔn a wɔwɔ Judea no nhyɛ ase nguan nkɔ mbepɔw no do. 17 Mma obi a ɔwɔ dan sor no nnsian mmbɛfa ndzɛmba wɔ ne fie, 18 na mma obi a ɔwɔ haban mu no mmba fie mmbɛfa n’atar ngugudo. 19 Dɛm aber no, mbaa a wonyinsen nye hɔn a wɔma mbofraba enumfo no ndue. 20 Hom nkɔ do mbɔ mpaa na aber a hom boguan no ammba wɔ awɔwber mu anaa Ahomgyeda; 21 osiandɛ dɛm aber no, ahohiahia kɛse a ofitsi wiadze ahyɛse besi ndɛ bi mmbaa da, na bi so remmba bio bɛba. 22 Nokwasɛm nye dɛ, sɛ woenntwa nda no do a, ɔhonam biara nnyi hɔ a wɔbɛgye no nkwa; naaso osian hɔn a woeyi hɔn no ntsi wobotwa nda no do.

23 “Na sɛ obi ka kyerɛ hom dɛ, ‘Hwɛ! Christ no wɔ ha,’ anaa ‘Ɔwɔ hɔ!’ no a, mma hom nngye nndzi. 24 Osiandɛ ator Christ nye ator nkɔnhyɛfo bɛba, na wɔbɛyɛ nsɛnkyerɛdze nye anwanwadze akɛse dze adaadaa nkorɔfo, na sɛ ɔbɛyɛ yie mpo a, wɔbɛdaadaa hɔn a woeyi hɔn no. 25 Hwɛ, medzi kan abɔ hom kɔkɔ. 26 Ntsi sɛ nkorɔfo ka kyerɛ hom dɛ, ‘Hwɛ! Ɔwɔ sar no do’ a, mma hom nnkɔ hɔ; anaadɛ ‘Hwɛ! Ɔwɔ pia mu’ a, mma hom nngye nndzi. 27 Na dɛ mbrɛ enyinam tsew fi boka na ɔhyerɛn kɔ anee no, dɛmara na nyimpa Ba no so ne mbae* bɛyɛ. 28 Beebiara a fun wɔ no, hɔ na nkɔr so bɔboaboa hɔnho ano.

29 “Ahohiahia a ɔbɛba wɔ dɛm nda no mu no n’ekyir pɛɛ no, ewia bɛdan sum, bosoom rennhyerɛn, nworaba befi sor abɔhwehwe famu, na wɔbɔwosow etum a ɔwɔ sor no. 30 Na nyimpa Ba no n’asɛnkyerɛdze bopue wɔ wimu, na asaase do mbusuakuw nyinara bedzi awerɛhow, wobohu dɛ nyimpa Ba no nam ɔsor mununkum mu dze tum nye enyimnyam kɛse reba. 31 Na ɔdze totorobɛnto ngyegyee a n’ano yɛ dzen bɔsoma n’abɔfoe, na wɔbɔboaboa hɔn a woeyi hɔn no ano efi mframa anan no mu, ofi sor ano kor do kesi kor do.

32 “Hom nsua biribi mfi adɔmbadua ho mfatoho yi mu: Sɛ no nkorbata fefɛw na oyi haban ara pɛ a, hom hu dɛ ɔhyewber abɛn. 33 Dɛmara na hom so, sɛ hom hu dɛm ndzɛmba yi nyinara a, hom nhu dɛ ɔabɛn na ogyina abow no ano. 34 Nokwar mese hom dɛ dɛm ebusuasantsen yi runntwa mu nnkɔ da, gyedɛ iyinom nyinara esisi ansaana. 35 Ɔsor na asaase botwa mu akɔ, naaso me nsɛm dze orunntwa mu nnkɔ dabiarada.

36 “Na da no nye dɔn* no dze obiara nnyim, abɔfo a wɔwɔ sor nye Ɔba no mpo nnyim, gyedɛ Egya no nkotsee. 37 Na dɛ mbrɛ nna ɔtse wɔ Noah n’aber do no, dɛmara na nyimpa Ba no ne mbae* no so bɛyɛ. 38 Ansaana Nsuyirii no rebɛba wɔ dɛm aber no mu no, wodzidzii, wɔnomee, mbarimba warwaree na wɔdze mbaa so maa awar kesii da a Noah kɛhyɛɛ adaka no mu. 39 Na woennhu kesi dɛ Nsuyirii no bae bɛpraa hɔn nyinara kɔree. Dɛmara so na nyimpa Ba no ne mbae no bɛyɛ. 40 Dɛm aber no nyimpa beenu bɔkɔ haban mu; naaso wɔbɛfa kor na woeegya kor. 41 Mbaa beenu bɛyam adze wɔ ewuyambo do; naaso wɔbɛfa kor na woeegya kor. 42 Dɛm ntsi hom nkɔ do nweɔn, osiandɛ hom nnyim da a hom Wura no bɛba.

43 “Naaso hom nkaa dɛ: Sɛ fiewura no nyim ber* a owifo no bɛba a, nkyɛ ɔkɔr do weɔnee na ɔamma oemmbu ne dan no annkɔ mu. 44 Dɛm ntsi hom so hom nyɛ krado, osiandɛ aber a hom enyi nnda na nyimpa Ba no bɛba.

45 “Woana paa nye akowaa nokwafo nye nyansafo* a no wura eyi no dɛ ɔnhwɛ n’asomfo do na ɔmma hɔn edziban wɔ ber a ɔsɛ mu no? 46 Enyigye nye akowaa a no wura bɛba abɔto no dɛ ɔreyɛ dɛm no! 47 Nokwar mese hom dɛ, ɔbɛma ɔahwɛ dza ɔwɔ nyinara do.

48 “Naaso sɛ akowaa bɔn no ka wɔ n’akoma mu dɛ, ‘Mo wura akyɛr,’ 49 na sɛ ɔhyɛ ase bobɔ no wura no nkowaa no na ɔnye akɔwensafo dzidzi we nsa a, 50 dɛm akowaa no no wura bɛba wɔ da a ɔnnhwɛ kwan nye aber a onnyim. 51 Na ɔbɔtwe n’aso dzendzenndzen na ɔama ɔaakɛka nyaatwemfo no ho. Na hɔ na obosu na ɔaaka ne se esi do dzendzenndzen.*