John Asɛmpa

8 12 Afei Jesus kasaa kyerɛɛ hɔn bio dɛ: “Emi nye wiadze kan no. Na obiara a odzi m’ekyir no rennantsew sum mu da, mbom obenya kan a ɔma nkwa no.” 13 Ntsi Phariseefo no kaa kyerɛɛ no dɛ: “Woara na idzi woho dase ntsi wo dasedzi nnyɛ nokwar.” 14 Nna Jesus yii hɔn ano dɛ: “Sɛ mara na midzi moho dase mpo a, me dasedzi yɛ nokwar, osiandɛ minyim beebi a mifi bae nye beebi a morokɔ. Naaso hom dze, hom nnyim beebi a mifi bae nye beebi a morokɔ. 15 Nyimpa adwen* na hom dze bu atsɛn; naaso emi dze mummbu nyimpa biara atsɛn. 16 Na sɛ mubu atsɛn mpo a, m’atsɛmbu yɛ nokwar, osiandɛ ɔnnyɛ mankotsee na mowɔ hɔ, mbom Egya no a ɔsomaa me no ka mo ho. 17 Afei so, wɔakyerɛw wɔ homara hom Mbra no mu dɛ: ‘Nyimpa beenu hɔn dasedzi yɛ nokwar.’ 18 Mankasa midzi moho dase, na Egya no a ɔsomaa me no so dzi mo ho dase.” 19 Ntsi wobisaa no dɛ: “Henfa na w’Egya wɔ?” Nna Jesus yii hɔn ano dɛ: “Hom nnyim me, na hom nnyim m’Egya so. Sɛ hom nyim me a, nkyɛ hom bohu m’Egya so.” 20 Aber a ɔrekyerɛkyerɛ wɔ asɔrfie hɔ no na ɔkaa iyinom wɔ beebi a woyi ntoboa no. Naaso obiara annkyer no osiandɛ nna ne ber nnyae nnsoe.

21 Ntsi ɔkaa kyerɛɛ hɔn bio dɛ: “Morokɔ, na hom bɔhwehwɛ me, naaso hom bowu wɔ hom bɔn mu. Beebi a morokɔ no, hom runntum mmba hɔ bi.” 22 Nna Jewfo no hyɛɛ ase kaa dɛ: “Orukoku noho anaa? Osiandɛ ɔse, ‘Beebi a morokɔ no, hom runntum mmba hɔ bi.’” 23 Ɔtoaa do kaa kyerɛɛ hɔn dɛ: “Hom fi famu; emi dze mifi sor. Hom fi wiadze yi mu; emi dze mimmfi wiadze yi mu. 24 Iyi ntsi na mekaa kyerɛɛ hom dɛ: Hom bowu wɔ hom bɔn mu no. Sɛ hom anngye enndzi dɛ emi nye no a, hom bowu wɔ hom bɔn mu.” 25 Ntsi wɔhyɛɛ ase bisaa no dɛ: “Eyɛ woana?” Nna Jesus yii hɔn ano dɛ: “Ebɛnadze ntsi koraa na menye hom rekasa? 26 Mowɔ hom ho nsɛm pii ka nye ndzɛmba pii a ɔsɛ dɛ mubu ho atsɛn. Na nokwasɛm nye dɛ, Obi a ɔsomaa me no yɛ ɔnokwafo, na nsɛm a metsee fii no hɔ no, ɔno ara na meka no wɔ wiadze.” 27 Wɔanntse ase dɛ ɔyɛ Egya no ho asɛm na nna ɔreka kyerɛ hɔn no. 28 Na Jesus kaa dɛ: “Sɛ hom nya ma nyimpa Ba no do a, hɔ na hom bohu dɛ emi nye no na mommbɔ me tsirmu nnyɛ biribiara. Mbom dza Egya no dze akyerɛkyerɛ me no, ɔno ara na meka. 29 Na Obi a ɔsomaa me no ka mo ho; na onngyaa mankotsee, osiandɛ meyɛ dza ɔsɔ n’enyi daa.” 30 Aber a ɔreka dɛm nsɛm yi no, nyimpa beberee gyee no dzii.

31 Na Jesus toaa do kaa kyerɛɛ Jewfo a nna wɔagye no edzi no dɛ: “Sɛ hom tsena m’asɛm mu a, ɔno na ɔbɛkyerɛ dɛ hom yɛ m’esuafo ampa. 32 Na hom bohu nokwar no, na nokwar no beyi hom efi nkowaasom mu.”* 33 Nna wɔkaa kyerɛɛ no dɛ: “Yɛyɛ Abraham n’asefo na yɛnnyɛɛ nkowaa mmaa obiara da. Ntsi ɔyɛ dɛn na ereka kyerɛ hɛn dɛ, ‘Wobeyi hɛn efi nkowaasom mu’ yi?” 34 Jesus yii hɔn ano dɛ: “Nokwar, nokwar mese hom dɛ, obiara a ɔyɛ bɔn no, ɔyɛ bɔn n’akowaa. 35 Bio so akowaa nntsena fie no mu daa, mbom ɔba na ɔtsena mu daa. 36 Ntsi sɛ Ɔba no yi hom fi nkowaasom mu a, hom rennyɛ nkowaa bio da. 37 Minyim dɛ hom yɛ Abraham n’asefo. Naaso hom rohwehwɛ me eku me, osiandɛ hom nngye me nkyerɛkyerɛ nnto mu. 38 Dza muhunii aber a mowɔ m’Egya ne nkyɛn no na meka ho asɛm, naaso hom dze, dza hom tsee fii hom egya hɔ no na hom yɛ.” 39 Nna wɔkaa kyerɛɛ no dɛ: “Hɛn egya nye Abraham.” Nna Jesus so kaa kyerɛɛ hɔn dɛ: “Sɛ hom yɛ Abraham ne mba a, nkyɛ hom bɛyɛ ndwuma a Abraham yɛe no bi. 40 Naaso seseiara dze, emi a maka nokwasɛm a metsee fii Nyankopɔn hɔ no akyerɛ hom no, hom rohwehwɛ me eku me. Abraham annyɛ dɛm. 41 Hom reyɛ hom egya no ndwuma.” Nna wɔkaa kyerɛɛ no dɛ: “Ɔnnyɛ edwamambɔ* mu na wɔwoo hɛn;* hɛn Egya yɛ kor, ɔno nye Nyankopɔn.”

42 Nna Jesus kaa kyerɛɛ hɔn dɛ: “Sɛ hom Egya nye Nyankopɔn a, nkyɛ hom bɔdɔ me, osiandɛ mifi Nyankopɔn hɔ na mebae. Ɔnnyɛ mankasa me pɛ na medze bae, mbom Ɔno na ɔsomaa me. 43 Ebɛnadze ntsi na hom nntse dza mereka yi ase? Siantsir nye dɛ hom runntum nntsie me nsɛm. 44 Hom fi hom egya Abɔnsam, na dza hom egya no pɛ no, ɔno na hom pɛ dɛ hom yɛ. Ɔno na ɔyɛ owudzifo fi ahyɛse no, na ɔanntsena nokwar no mu, osiandɛ nokwar nnyi no mu. Sɛ ɔka atorsɛm a, ɔyɛ noara no suban, osiandɛ ɔyɛ ɔtorfo na ator egya. 45 Naaso emi dze, osiandɛ meka nokwar no kyerɛ hom ntsi, hom nngye me nndzi. 46 Hom mu woana na obotum ebu me fɔ dɛ mayɛ bɔn? Sɛ meka nokwar a, nna ɔno ebɛnadze ntsi na hom nngye me nndzi? 47 Obi a ofi Nyankopɔn no tsie Nyankopɔn n’asɛm. Iyi ntsi na hom nntsie no, osiandɛ hom mmfi Nyankopɔn.”

48 Nna Jewfo no kaa kyerɛɛ no dɛ: “Oyiwa! Ntsi sɛ yɛka dɛ, ‘Eyɛ Samarianyi na ewɔ sunsum fi’ a, ɔnnyɛ nokwar a?” 49 Nna Jesus yii hɔn ano dɛ: “Minnyi sunsum fi, mbom midzi m’Egya nyi, naaso hom dze hom gu m’enyim ase. 50 Naaso memmpɛ enyimnyam mma moho; na mbom Obi wɔ hɔ a ɔpɛ dɛ minya enyimnyam, na ɔno na obu atsɛn. 51 Nokwar, nokwar mese hom dɛ, obiara a ɔdze m’asɛm bɛyɛ edwuma no, orunnwu da.”* 52 Nna Jewfo no kaa kyerɛɛ no dɛ: “Afei paa na yeehu dɛ ewɔ sunsum fi. Osiandɛ Abraham wui, na dɛmara na nkɔnhyɛfo no so wuwui, naaso ɔwo dze ese, ‘Obiara a ɔdze w’asɛm bɛyɛ edwuma no, ɔrennka owu nnhwɛ koraa.’ 53 Ɔwo eyɛ kɛse kyɛn hɛn egya Abraham a owui no anaa? Nkɔnhyɛfo no so wuwui. Ntsi ɔwo isusu dɛ eyɛ woana?” 54 Nna Jesus yii hɔn ano dɛ: “Sɛ mehyɛ moho enyimnyam a, ɔno mfaso biara nnyi m’enyimnyam no do. Ɔyɛ m’Egya na ɔhyɛ me enyimnyam. Ɔno na hom se ɔyɛ hom Nyankopɔn no. 55 Naaso hom nnyim no, mbom emi dze minyim no. Na sɛ meka dɛ minnyim no a, nna meyɛ ɔtorfo tse dɛ homara. Naaso minyim no na medze n’asɛm yɛ edwuma. 56 Nna hom egya Abraham rohwɛ kwan dɛ obohu me da no, na iyi maa n’enyi gyee paa. Na ohunii so, na odzii ehurusi.” 57 Nna Jewfo no kaa kyerɛɛ no dɛ: “Inndzii mfe 50 mpo, nna ese ehu Abraham yi a?” 58 Nna Jesus kaa kyerɛɛ hɔn dɛ: “Nokwar, nokwar mese hom dɛ, ansaana Abraham rebɛba no nna mowɔ hɔ.” 59 Ntsi wɔtasee mbobaa dɛ wɔrobɔtotow abɔ no, naaso Jesus dze noho kosumae na ofii asɔrfie hɔ kɔree.