Asomafo Ndwuma

19 Na ɔbaa dɛ aber a nna Apollos wɔ Corinth no, Paul kɛfaa beebi a ɔmmbɛn po na osianee baa Ephesus. Aber a odur hɔ no, ohun esuafo bi 2 na obisaa hɔn dɛ: “Aber a hom bɛyɛɛ agyedzifo no hom nyaa sunsum krɔnkrɔn a?” Nna woyii no ano dɛ: “Ei dɛm a? Yɛnntsee dɛ sunsum krɔnkrɔn bi mpo wɔ hɔ o.” 3 Ntsi ɔsanee bisaa hɔn dɛ: “Nna ɔno hom enuma no, ɔyɛ ebɛn enuma a?” Woyii no ano dɛ: “Ɔyɛ John n’enuma a.” 4 Nna Paul kaa dɛ: “John numaa nkorɔfo ma wɔdze kyerɛɛ dɛ woenu hɔnho, na ɔkaa kyerɛɛ nkorɔfo no dɛ wɔngye obi a odzi n’ekyir reba no ndzi; ɔno nye Jesus.” 5 Aber a wɔtsee iyi no, wɔmaa wonumaa hɔn wɔ Ewuradze Jesus ne dzin mu. 6 Na aber a Paul dze ne nsa guu hɔn do no, sunsum krɔnkrɔn no baa hɔn do, na wɔhyɛɛ ase kaa kasa horow na wɔhyɛɛ nkɔm. 7 Nna hɔn nyina yɛ mbarimba bɛyɛ 12.

8 Na ɔkɔr nhyiamudan no mu abosoom ebiasa, na ɔdze akokodur kasae, na ɔnye hɔn susuu nsɛm ahorow a no mu da hɔ na ɔtɔ asowa mu a ɔfa Nyankopɔn n’Ahendzi no ho. 9 Naaso binom piriim hɔn akoma,* na nna wɔmmpɛ dɛ wɔgye dzi, na wɔkekaa Ɔkwan No ho nsɛmbɔn wɔ nyimpadɔm no enyim. Ntsi Paul twee noho fii hɔn ho, na oyii esuafo no fii hɔn mu,* na da biara nna ɔka asɛm no wɔ Tyrannus skuuldan no mu. 10 Iyi kɔr do mfe ebien, na Jewfo na Greekfo a wɔwɔ Asia mantɔw no mu nyina tsee Ewuradze n’asɛm no.

11 Na Nyankopɔn nam Paul do* yɛɛ ndzɛmba akɛse a ɔyɛ nwanwa bor do 12 araa ma sɛ nna wɔdze ntar na tam* a wɔaka Paul no honam mpo kɛma ayarfo a, nna ɔma hɔn yarba no kɔ na esunsum fi no so puepue fi hɔn mu. 13 Naaso Jewfo bi so a nna wokyinkyin tutu esunsum fi no bɔɔ mbɔdzen dɛ wɔdze Ewuradze Jesus ne dzin botutu esunsum fi efi hɔn a wɔwɔ esunsum fi no mu. Nna wɔka dɛ: “Mehyɛ hom wɔ Jesus a Paul ka no ho asɛm no ne dzin mu.” 14 Nna Jewnyi sɔfopanyin bi a wɔfrɛ no Sceva wɔ mba mbanyimfo beesuon bi a wɔreyɛ dɛm. 15 Naaso sunsum fi no kaa kyerɛɛ hɔn dɛ: “Minyim Jesus na minyim Paul so; na hom dze hom fi hen?” 16 Nna ɔbarimba a ɔwɔ sunsum fi no towee hyɛɛ hɔn do, na ɔboor hɔn pasaa pirapiraa hɔn, na odzii hɔn do konyim nkorkor ma wɔdze hɔn adagyaw guanee fii fie hɔ kɔree. 17 Jewfo na Greekfo a wɔwɔ Ephesus nyina tsee dza osii yi ho asɛm; na hu tɔɔ hɔn nyina hɔn do, na wɔkɔr do yii Ewuradze Jesus ne dzin no ayɛw. 18 Na hɔn a wɔabɛyɛ agyedzifo no hɔn mu pii bae, na wɔbɛpaa mu kaa hɔn bɔn nye hɔn ndzeyɛɛ ho asɛm wɔ bagua mu. 19 Nokwasɛm nye dɛ, hɔn a nna woyi nkongyaa no hɔn mu pii dze hɔn mbuukuu bae na wɔbɛhyeew no ma obiara hunii. Na aber a wɔsesee no, nna no bo yɛ ndwetɛbona 50,000. 20 Na Jehovah* n’asɛm no kɔr do tserɛwee, na onyaa nkorɔfo do tum kɛse wɔ kwan a ɔyɛ nwanwa do.

21 Iyinom ekyir no, Paul yɛɛ n’adwen dɛ ɔbɔkɔ akɛfa Macedonia na Achaia na ɔaakɔ Jerusalem. Na ɔkaa dɛ: “Sɛ mifi hɔ a, mobɔkɔ Rome so.” 22 Ntsi ɔsomaa n’asomfo no mu beenu ma wɔkɔr Macedonia; hɔn nye Timothy na Erastus. Naaso nankasa dze, ɔtsenaa Asia mantɔw no mu kyɛɛr kakra.

23 Dɛm aber no akasakasa bi sii; nna ɔnnyɛ asɛm kakraba. Nna ɔfa Ɔkwan No ho. 24 Dza ɔbae nye dɛ, nna ɔbarimba bi wɔ hɔ a wɔfrɛ no Demetrius. Nna ɔyɛ dwetɛ ho edwuma, na nna ɔdze dwetɛ yɛ Artemis n’abosondan no ne saso. Nna ɔma hɔn a wɔyɛ dwetɛ ho edwuma no nya mfaso pii. 25 Ntsi ɔfrɛfrɛɛ hɔn a wɔyɛ dwetɛ ho edwuma no nye hɔn a wɔyɛ ndwuma a ɔtsetse dɛm no nyina boaa ano, na ɔkaa kyerɛɛ hɔn dɛ: “Mbarimba, homara hom nyim paa dɛ edwuma yi ara na wɔama yeenya hɛnho tam. 26 Naaso seseiara dze, hom ehu na hom atse mbrɛ osi ma dɛm Paul yi rututu gu nkorɔfo hɔn asomu na ɔredan hɔn adwen. Nnyɛ Ephesus ha nkotsee, mbom ɔrohwehwɛ ayɛ dɛ Asia mantɔw no mu nyina so, ɔka dɛ enyame a wɔdze nsa ayɛ no nnyɛ enyame papa. 27 Na musuro dɛ nkorɔfo bɛhyɛ ase akasa etsia hɛn edwuma yi. Naaso sɛ ɔno da nkyɛn mpo a, wobobu nyamebaa kɛse Artemis n’asɔrdan no dɛ ɔyɛ adze gyangyan, na Artemis a wɔsom no wɔ Asia mantɔw yi nyina mu na wiadze yi mu beebiara no, wɔdze n’enyim botwutwuw famu.” 28 Aber a wɔtsee iyi no, hɔn bo fuuw dzendzenndzen na mbarimba no hyɛɛ ase dɛ wɔretseatsea mu dɛ: “Ephesusfo hɛn nyame Artemis yɛ kɛse!”

29 Na kurow no mu nyina yɛɛ begyabegya, na hɔn nyina tuu punkum kɔr agorhwɛbea hɔ, na wɔtwee Gaius na Aristarchus kaa hɔnho kɔree; nna wɔyɛ Macedoniafo a wɔka Paul ho ma wotutu akwan. 30 Paul dze, nna ɔpɛ dɛ ɔkɔ nkorɔfo no mu, naaso esuafo no amma no kwan. 31 Mpanyimfo a nna wɔhwɛ afahyɛ na agodzi do no hɔn mu binom mpo a nna wɔyɛ Paul n’anyɛnkofo no somae ma wɔkɛserɛɛ no dɛ mma ɔmmfa no nkwa nnto esian mu nnkɔ agorhwɛbea hɔ. 32 Yɛreka yi, nna binom retseatsea mu reka dɛm yi, na binom so retseatsea mu reka asɛm fofor; osiandɛ nna nyimpadɔm a woebehyia mu no ama hɔ ayɛ begyabegya, na hɔn mu fa kɛsenara so, nna wonnyim siantsir mpo a woebehyia mu wɔ hɔ. 33 Na wɔdze Alexander fii nyimpadɔm no mu bae, na Jewfo no piapiaa no ma okegyinaa enyim, na Alexander hiim ne nsa dɛ ɔpɛ dɛ ɔkyerɛkyerɛ n’asɛm mu kyerɛ nkorɔfo no. 34 Naaso aber a wohun dɛ ɔyɛ Jewnyi no, hɔn nyina bɔɔ mu tseatseaa mu bɛyɛ ndɔnhwer ebien dɛ: “Ephesusfo hɛn nyame Artemis yɛ kɛse!”

35 Aber a ɔkyerɛwfo panyin a ɔwɔ kurow no mu no maa nyimpadɔm no yɛɛ dzinn no, obisaa hɔn dɛ: “Ephesus mbarimba, woana paa na obotum aka dɛ onnyim dɛ Ephesus kurow yi na ɔhwɛ Artemis ɔkɛse no na honyi a ofi sor bae no n’asɔrdan no do? 36 Dɛm asɛm yi, obiara runntum nngye ho kyim, ntsi hom nyɛ komm na mma hom mmper homho nnyɛ biribiara. 37 Osiandɛ mbarimba a hom dze hɔn aba ha yi, wonnkowiaa biribiara wɔ asɔrdan no mu, na dɛmara so na wɔnnkaa ebususɛm biara nntsiaa hɛn nyamebaa no. 38 Ntsi sɛ Demetrius na hɔn a wɔyɛ dwetɛ ho edwuma a wɔka no ho no wɔ asɛm tsia obi a, nda a wɔdze dzi asɛm no wɔ hɔ na amantɔw asoafo* so wɔ hɔ; ntsi sɛ obi wɔ asɛm tsia obi a wobotum dze aba. 39 Naaso sɛ ɔyɛ biribi fofor bi a ɔkyɛn iyi dze a, ɔno gyedɛ wosi ho gyinae aber a mpanyimfo no nye ɔmamfo no ehyia mu no. 40 Na dza wɔakɔ do ndɛ yi, wobotum egyina do abɔ hɛn sombo dɛ yɛasoɛr etsia aban no, osiandɛ asɛm biara nnyi hɔ a yebotum aka dze eyi hɛn ano wɔ nyimpadɔm a wɔreyɛ begyabegya yi ho.” 41 Na aber a ɔkaa dɛm nsɛm yi wiei no, ɔmaa nyimpadɔm no kɔree.