Brɛ Woho Adze Na Gye To Mu Dɛ Ɔnnyɛ Biribiara Na Inyim

1. Mbrɛ Jehovah bɔɔ hɛn no, ɔma yetum yɛ dɛn, na ebɛnadze ntsi na ɔbɔɔ hɛn dɛm?

MBRƐ Jehovah sii bɔɔ hɛn no yɛ nwanwa. Ɔma yetum dwen ndzɛmba ho, yesua ndzɛmba afofor, na yehu mbrɛ yebesi dze dza yesua no ayɛ edwuma. Ebɛnadze ntsi na ɔbɔɔ hɛn wɔ dɛm kwan yi do? Siantsir nye dɛ, ɔpɛ dɛ yenya “no ho nyimdzee” na yetum dze nyimdzee a yenya no sisi gyinae pa aber a yɛrosom no no.—Mbɛ. 2:​1-5; Rom. 12:1.

2. (a) Biribiara na yenyim anaa? (Job 37:​23, 24) (Ibotum ahwɛ mfonyin no so.) (b) Sɛ yɛgye to mu dɛ ɔnnyɛ biribiara na yenyim a, ebɛn mfaso na yebenya?

² Ɔwɔ mu dɛ mbrɛ Jehovah sii bɔɔ hɛn no ma yetum sua ndzɛmba pii dze, naaso ɔnnyɛ biribiara na yenyim. (Kenkan Job 37:​23, 24.) Ma yɛmfa Job n’asɛm no dɛ mfatoho. Jehovah bisaa Job nsɛm ahorow bi, na iyi maa Job bohun dɛ saana ndzɛmba pii wɔ hɔ a, onnyim. Nkɔmbɔ a Jehovah nye Job bɔe no boaa no ma obohun dɛ ɔsɛ dɛ ɔbrɛ noho adze na ɔsesa adwen a nna ɔwɔ no. (Job 42:​3-6) Hɛn so, sɛ yɛbrɛ hɛnho adze na yɛgye to mu dɛ ɔnnyɛ biribiara na yenyim a, ɔbɔboa hɛn paa. Sɛ yɛwɔ suban a ɔtse dɛm a, ɔbɔboa hɛn ma yeenya awerɛhyɛmu dɛ Jehovah bɛma yeehu ndzɛmba pɔtsee a ɔsɛ dɛ yehu ama yeetum esisi gyinae pa aber biara.—Mbɛ. 2:6.

3. Ebɛnadze na yebosusu ho wɔ adzesua yi mu?

³ Adzesua yi mu no, yebosusu ndzɛmba ahorow bi a yennyim ho na yaahwɛ nsɛndzendzen a dɛm ndzɛmba no botum ama yeehyia. Afei so, yɛbɔhwɛ siantsir a oye paa dɛ yennyim ndzɛmba ahorow pɔtsee bi. Jehovah nye “Nyia odzi mu wɔ nyimdzee mu,” na yɛwɔ ahotodo dɛ ɔbɛma yeehu ndzɛmba pɔtsee a ɔsɛ dɛ yehu no. Dza yerubosusu ho wɔ adzesua yi mu no bɔboa hɛn ma yaahyɛ dɛm ahotodo no mu dzen.—Job 37:16.

YENNYIM ABER A EWIEI NO BƐBA

4. Dɛ mbrɛ Matthew 24:36 no ma yehu no, ebɛnadze na yennyim?

⁴ Kenkan Matthew 24:36. Yennyim aber a dɛm wiadze yi bɛba n’ewiei. Jesus mpo, aber a nna ɔwɔ asaase yi do no, nna onnyim “da no nye dɔn no.”a Ekyir yi, ɔkaa kyerɛɛ n’asomafo no dɛ Jehovah yɛ Obi a odzi ne ber do pɛpɛɛpɛ na otum hyehyɛ mber a nsɛm ahorow bi besisi no to hɔ. (Andw. 1:​6, 7) Jehovah ahyɛ ber a dɛm wiadze yi bɛba n’ewiei no ato hɔ. Naaso yerunntum nnkyerɛ ber pɔtsee a dɛm da no bɛba.

5. Osiandɛ yennyim ber a ewiei no bɛba ntsi, obotum ama yaatse nka dɛn?

⁵ Dɛ mbrɛ Jesus kae no, yennyim ber tsentsen a ɔsɛ dɛ yɛtweɔn ansaana dɛm wiadze yi aba n’ewiei. Dɛm ntsi, annhwɛ a hɛn abaw mu bobu nkanka aber a yɛatweɔn Jehovah ne da no akyɛr no. Afei so, osiandɛ ewiei no mmbae ntsi, sɛ hɛn ebusuafo anaa afofor dzi hɛn ho fɛw a, bi a ɔbɛyɛ dzen ama hɛn dɛ yebegyina ano. (2 Pet. 3:​3, 4) Bi a yebenya adwen dɛ sɛ yenyim da pɔtsee a ewiei no bɛba a, nkyɛ yebenya abotar dze atweɔn na sɛ wodzi hɛnho fɛw mpo a, yɛremma ɔnnhaw hɛn.

6. Ebɛnadze ntsi na oye dɛ yennyim aber a ewiei no bɛba?

⁶ Nokwasɛm nye dɛ, Jehovah nnkaa da pɔtsee a ewiei no bɛba no nnkyerɛɛ hɛn, na iyi ma yenya hokwan dze da no edzi dɛ yɛdɔ no na yɛgye no dzi ntsi na yɛsom no no. Sɛ yɛrosom Jehovah a, ɔnnsɛ dɛ yɛdze da bi hyɛ hɛn adwen mu ma ɔkɛyɛ dɛ sɛ dɛm da no twa mu a, yɛronnsom no bio. Ntsi ɔnnsɛ dɛ yɛma ‘Jehovah ne da’ no gye hɛn adwen nyina, mbom ndzɛmba papa a dɛm da no dze bɛba no na ɔsɛ dɛ yɛbɔ mbɔdzen dze hɛn adwen si do. Sɛ yɛyɛ dɛm a, ɔbɔboa hɛn ma yaadɔ Nyankopɔn paa, yeefi hɛn akoma mu asom no, na yaayɛ dza yebotum biara dze asɔ n’enyi.—2 Pet. 3:​11, 12.

7. Ebɛnadze na yenyim?

⁷ Ɔsɛ dɛ yɛdze hɛn adwen si dza yenyim no do. Yenyim dɛ 1914 na ewiei mber no hyɛɛ ase. Jehovah nam nkɔnhyɛ ahorow a ɔwɔ Bible no mu no do ama yeehu dɛ dɛm afe no na ewiei mber no hyɛɛ ase. Afei so, ɔama yeehu nsɛm ahorow bi a obesisi wɔ wiadze nyina wɔ ewiei mber no mu. Dɛm nkɔnhyɛ ahorow yi aba mu, ntsi yɛgye dzi paa dɛ ‘Jehovah ne da kɛse no abɛn.’ (Zeph. 1:14) Afei so, yenyim dɛ edwuma a Jehovah pɛ dɛ yɛyɛ nye dɛ yɛbɛka ‘Ahendzi no ho asɛmpa’ akyerɛ nyimpa dodow biara a yebotum. (Matt. 24:14) Ndɛ, yɛreka asɛmpa yi wɔ nsaase bɛyɛ 240 do wɔ kasa bɔbor 1,000 mu. Onnhia dɛ yehu “da no nye dɔn no” ansaana yɛdze ahokeka ayɛ dɛm edwuma a no ho hia yi bi.

YENNYIM MBRƐ JEHOVAH BESI ABOA HƐN

8. Sɛ wɔka ‘nokwar Nyankopɔn no n’edwuma’ a, ɔkyerɛ dɛn? (Ɔsɛnkafo 11:5)

⁸ Ɔnnyɛ aber nyina na yɛtse ‘nokwar Nyankopɔn no n’edwuma’ ase. (Kenkan Ɔsɛnkafo 11:5.) Dza ‘nokwar Nyankopɔn no n’edwuma’ kyerɛ nye biribiara a Jehovah ma osi anaa ɔma kwan ma osi mbrɛ ɔbɛyɛ a n’apɛdze bɛyɛ hɔ. Sɛ asɛm bi si a, bi a yerunntum nnhu siantsir pɔtsee ntsi a Jehovah maa kwan ma osii anaa adze pɔtsee a ɔbɛyɛ dze aboa hɛn. (Ndw. 37:5) Bible no dze nokwar Nyankopɔn n’edwuma toto mbrɛ abofra si nyin wɔ ne maame ne yamu no ho. Dze besi ndɛ, abɔdzenyansahufo mpo nntsee dɛm anwanwadze yi ase nnwiei. Dɛmara na hɛn so, yerunntum nntse mbrɛ Jehovah si yɛ n’adze no ase nnwie.

9. Osiandɛ yennyim mbrɛ Jehovah besi aboa hɛn ntsi, ebɛnadze na bi a ɔbɛyɛ dzen ama hɛn dɛ yɛbɛyɛ?

⁹ Osiandɛ yennyim mbrɛ Jehovah besi aboa hɛn ntsi, obotum ayɛ dzen ama hɛn dɛ yebesisi gyinae ahorow bi wɔ no som mu. Bi a ɔyɛ dzen ma hɛn dɛ yɛdze ndzɛmba bi bɔbɔ afɔr ama yeetum ayɛ pii. Dɛ mfatoho no, bi a ɔyɛ dzen ma hɛn dɛ yɛbɛtsetsew ndzɛmba do anaa yebotu akɛtsena beebi a wohia adawurbɔfo pii ama yeetum ayɛ pii wɔ asɛnka edwuma no mu. Anaadɛ yɛdze botae bi esi hɛn enyi do wɔ Jehovah no som mu naaso yenntumii nndur ho, ntsi bi a hɛn adwen yɛ hɛn dɛ hɛn som nnsɔ Jehovah n’enyi. Anaaso dɛ yɛyer hɛnho yɛ asɛnka edwuma no paa naaso yennyi Bible suanyi kor mpo. Anaa yeefi hɛn akoma mu roboa asafo edwuma bi naaso ndzɛmba nnkɔ yie mma hɛn.

10. Osiandɛ yennyim mbrɛ Jehovah besi aboa hɛn ntsi, ebɛn suban pa na obotum aboa hɛn ma yeenya?

¹⁰ Ɔyɛ nokwar dɛ yennyim mbrɛ Jehovah besi aboa hɛn, naaso iyi botum aboa hɛn ma yeenya suban pa ahorow bi tse dɛ ahobrɛadze. Iyi bɛma yɛagye ato mu dɛ ɔnnyɛ biribiara na yenyim na mbom Jehovah na onyim biribiara. (Isa. 55:​8, 9) Afei so, ɔbɔboa hɛn ma yɛdze hɛnho aato Jehovah do korakora na yeegyaa biribiara mu ahyɛ ne nsa. Sɛ asɛnka edwuma anaa asafo edwuma bi a yɛreyɛ no rokɔ yie a, yɛdze ho nkamfo ma Jehovah. (Ndw. 127:1; 1 Cor. 3:7) Naaso sɛ ndzɛmba annkɔ dɛ mbrɛ yɛhwɛ kwan no so a, ɔsɛ dɛ yɛkaa dɛ Jehovah hu dza ɔrokɔ do no nyina. Sɛ yɛma dɛm asɛm yi tsena hɛn adwen mu a, ɔbɔboa hɛn ma hɛn asomu aadwe hɛn. (Isa. 26:12) Yɛbɛyɛ hɛn afamudze na yaakɔ do enya awerɛhyɛmu dɛ Jehovah so bɛyɛ n’afamudze dze aboa hɛn. Tsetse no, nna ɔtɔ da a, Jehovah yɛ anwanwadze dze kyerɛ n’asomfo kwan. Naaso sɛ ɔannyɛ dɛm ndɛ mpo a, yebotum enya awerɛhyɛmu dɛ akwankyerɛ biara a yebehia no, ɔdze bɛma hɛn.—Andw. 16:​6-10.

11. Ebɛn nokwasɛm ahorow na yenyim?

¹¹ Yenyim dɛ Jehovah dɔ hɛn, ɔyɛ dza ɔtsen aber biara, na onyim nyansa so kyɛn hɛn. Afei so, yenyim dɛ dza yɛyɛ wɔ no som mu, nye dza yɛyɛ dze boa hɛn nuanom Christianfo no, n’enyi sɔ papaapa. Na yɛsan so nyim dɛ hɔn a wɔdze nokwardzi som no no nyina, ohyira hɔn.—Heb. 11:6.

YENNYIM DZA OBESI ƆKYENA

12. Ebɛnadze na James 4:​13, 14 no se yennyim?

¹² Kenkan James 4:​13, 14. Nokwasɛm nye dɛ, hɛn mu biara nnyim ɔkyena asɛm, na wɔ dɛm wiadze yi mu so dze ‘mber na esian tum to hɛn aber a yɛnnhwɛ kwan.’ (Ɔsɛnk. 9:11) Dɛm ntsi, dza yɛpɛ dɛ yɛyɛ no, sɛ yebotum ayɛ o, sɛ yerunntum nnyɛ o, yerunntum nnkyerɛ. Afei so, sɛ yebotum ewie ansaana yeewu o, sɛ yerunntum nnwie o, ɔno so yennyim.

13. Osiandɛ yennyim daakye asɛm ntsi, obotum ama yaatse nka dɛn?

¹³ Osiandɛ yennyim daakye asɛm ntsi, obotum ama ndzɛmba mu aayɛ dzen ama hɛn wɔ hɛn asetsena mu. Ebɛn kwan do? Bi a yɛbɔdwendwen dza obotum ato hɛn no ho araa ma wɔaatra do na iyi remma hɛn enyi nngye. Afei so, biribi bɔn bi botum ato hɛn mpofirmu anaa hɛn asetsena botum asesa prɛko pɛr, na iyi botum ama hɛn werɛ ahow paa na yaayɛ basaa. Bio so, sɛ hɛn nsa annka biribi a nna yɛrohwɛ kwan no a, obotum ayɛ hɛn yaw paa na obotum so ama hɛn abaw mu eebu.—Mbɛ. 13:12.

14. Ebɛnadze na yɛyɛ a ɔbɛma hɛn enyi agye paa? (Ibotum ahwɛ mfonyin ahorow no so.)

¹⁴ Ɔmmfa ho dza ɔbɔto hɛn wɔ asetsena mu biara no, sɛ yemia hɛn enyi gyina ano a, nna yɛreda no edzi dɛ yɛdɔ hɛn sor Egya no ntsi na yɛsom no, na ɔnnyɛ ndzɛmba a yenya fi no hɔ no ntsi a. Bible no ma yehu dɛ ɔnnsɛ dɛ yɛhwɛ kwan dɛ Jehovah bɔbɔ hɛnho ban efi ɔhaw ahorow a yebehyia no nyina ho. Na dɛmara so na Jehovah nnhyehyɛɛ dza ɔbɔto hɛn wɔ asetsena mu no nntoo hɔ. Onyim dɛ ɔnnyɛ daakye asɛm a yebohu no na ɔbɛma hɛn enyi agye wɔ hɛn asetsena mu, na mbom sɛ hɛn enyi bɛgye a, ɔsɛ dɛ yɛhwehwɛ n’akwankyerɛ na yɛdze bɔ hɛn bra. (Jer. 10:23) Sɛ yɛdze Jehovah n’akwankyerɛ yɛ edwuma aber a yerisisi gyinae no a, kwan bi do no, nna yɛreka dɛ, ‘Sɛ ɔyɛ Jehovah ne pɛ na yɛtse ase a, yɛbɛyɛ iyi anaa yɛbɛyɛ iyi.’—Jas. 4:15.

15. Ebɛnadze na yenyim fa daakye ho?

¹⁵ Ɔwɔ mu dɛ yennyim ɔkyena asɛm dze, naaso dɛ yɛwɔ enyidado dɛ yɛbɛtsena sor o, dɛ yɛbɛtsena asaase yi do o, yenyim dɛ Jehovah ahyɛ hɛn bɔ dɛ ɔbɛma hɛn daa nkwa. Afei so, yenyim dɛ orunntum nndzi ator na biribiara so nnyi hɔ a obotum esiw no kwan dɛ ɔbɛma no bɔhyɛ ahorow no nyina aba mu. (Titus 1:2) Jehovah nkotsee na otum ‘ka ewiei no kyerɛ, na ofi tsetseber do ka dza wonnyae nnyɛe no kyerɛ.’ Tsetse no, nsɛm a ɔkaa dɛ obesisi no nyinara baa mu, na dɛmara so na nsɛm a ɔaka dɛ obesisi daakye no so bɛba mu. (Isa. 46:10) Yenyim paa dɛ biribiara nnyi hɔ a obotum atsew hɛn efi Jehovah no dɔ ho. (Rom. 8:​35-39) Yɛgye dzi dɛ ɔmmfa ho dza ɔbɔto hɛn biara, Jehovah bɔboa hɛn ma yeehu dza ɔsɛ dɛ yɛyɛ, ɔbɛkyekye hɛn werɛ, na ɔbɛhyɛ hɛn dzen so ma yeetum egyina ano. Afei so, yɛwɔ awerɛhyɛmu dɛ Jehovah bɔboa hɛn na obehyira hɛn so.—Jer. 17:​7, 8.

MBRƐ JEHOVAH SI NYIM HƐN NO, YERUNNTUM NNTSE ASE NNWIE DA

16. Dɛ mbrɛ Ndwom 139:​1-6 ma yehu no, ebɛnadze na Jehovah nyim fa hɛn ho a yerunntum nntse ase nnwie da?

¹⁶ Kenkan Ndwom 139:​1-6. Jehovah na ɔbɔɔ hɛn, ntsi onyim hɛn ho biribiara. Dza yɛafa mu wɔ asetsena mu a ɔno ntsi ɔama yeenya suban ahorow bi nye mbrɛ yesi susu ndzɛmba ho no, onyim ne nyinara. Onyim nsɛm a yɛka nye dza yɛpɛ dɛ yɛkyerɛ. Ɔsan so nyim dza yɛyɛ biara nye siantsir a yɛyɛ dɛm no. Dɛ mbrɛ Ɔhen David kae no, beebiara a yɛwɔ no, Jehovah n’enyi wɔ hɛn do na ɔayɛ krado aber biara dɛ ɔbɔboa hɛn. Mbrɛ Amansan Hen, adze nyina do Tumfo, Nyia a ɔbɔɔ ɔsor nye asaase no si pɛ w’asɛm na ɔdwen wo ho no, ɔma etse nka dɛn? David kaa dɛ: ‘Dɛm nyimdzee yi yɛ me nwanwa dodow; ɔkrɔn, munntum nntse ase.’—Ndw. 139:6.

17. Ebɛnadze ntsi na obotum aayɛ dzen dɛ yɛbɛgye ato mu dɛ Jehovah nyim hɛn yie paa?

¹⁷ Bi a osian ebusua a yefi mu, hɛn amambra, anaa gyedzi bi a nna yɛwɔ ansaana yerubohu nokwar no ntsi, obotum ayɛ dzen ama hɛn dɛ yɛbɛgye ato mu dɛ Jehovah yɛ Egya bi a ɔdɔ hɛn na hɛn asɛm hia no. Anaadɛ bi a yɛtse nka dɛ mfom bi a yedzii mber bi a etwa mu no enyi soso araa ma Jehovah atwe noho efi hɛn ho na ɔmmpɛ hɛn enyim ahwɛ bio. David mpo nna ɔtɔ da a, ɔtse nka dɛmara. (Ndw. 38:​18, 21) Anaadɛ bi a obi robɔ mbɔdzen dɛ ɔbɛyɛ nsesa wɔ n’abrabɔ mu na ɔdze Nyankopɔn ne mbra abɔ ne bra. Dɛm nyimpa no botum ebisa noho dɛ, ‘Sɛ Nyankopɔn tse me ase dze a, nna ɔno ebɛnadze ntsi na suban bi a wɔaka mo hɔ no, ɔpɛ dɛ migyaa na ɔmmfa me dɛmara?’

18. Sɛ yɛgye to mu dɛ Jehovah nyim hɛn yie kyɛn mbrɛ hɛnankasa nyim hɛnho no a, ebɛn mfaso na yebenya? (Ibotum ahwɛ mfonyin ahorow no so.)

¹⁸ Ɔsɛ dɛ yɛgye to mu dɛ Jehovah nyim hɛn yie kyɛn mbrɛ hɛnankasa nyim hɛnho no. Na ndzɛmba papa so a ohu wɔ hɛnho no, hɛnankasa mpo nnhu. Ɔwɔ mu dɛ ohu mfom ahorow a yedzi, na mbrɛ yesi yɛ hɛn adze no so ɔtse ase, naaso osiandɛ onyim dza yebotum ayɛ ntsi, ɔdɔ hɛn. (Rom. 7:15) Sɛ yɛgye to mu dɛ Jehovah hu biribi papabi wɔ hɛn ho na onyim ndzɛmba pa a yebotum ayɛ a, obotum ahyɛ hɛn dzen ma yɛdze nokwardzi na enyigye aasom no ekesi ase.

19. Ebɛnadze paa na yenyim fa Jehovah ho?

¹⁹ Nokwasɛm nye dɛ, yenyim dɛ Jehovah yɛ ɔdɔ. (1 John 4:8) Yenyim dɛ Jehovah ne mbra a ɔdze ama hɛn no ma ɔda edzi dɛ ɔdɔ hɛn, na ɔpɛ dɛ osi hɛn yie wɔ asetsena mu. Afei so, yenyim dɛ Jehovah pɛ dɛ yɛtsena ase daa. Ɔno ntsi na ɔdze werdam no maa hɛn no. Yebotum enya awerɛhyɛmu dɛ ɔmmfa ho dɛ bɔn wɔ hɛnho no, osian Jesus no werdam afɔrbɔ no ntsi, yebotum asom Jehovah dɛ mbrɛ ɔpɛ. (Rom. 7:​24, 25) Yɛsan so nyim dɛ “Nyankopɔn so kyɛn hɛn akoma, na onyim adze nyina.” (1 John 3:​19, 20) Jehovah nyim hɛn ho biribiara, na ɔwɔ hɛn mu ahotodo dɛ yebotum ayɛ dza ɔpɛ.

20. Ebɛnadze na ɔbɔboa hɛn amma yaanndwendwen ndzɛmba bi ho ammfa annhaw hɛnho?

²⁰ Biribiara a ɔsɛ dɛ yehu no, Jehovah ama yeehu. Sɛ yɛbrɛ hɛnho adze na yɛgye dɛm asɛm no to mu a, ɔremma yɛnndwendwen ndzɛmba bi a yerunntum nnyɛ ho hwee no ho mmfa nnhaw hɛnho. Mbom ɔbɔboa hɛn ma yɛdze hɛn adwen esi ndzɛmba a no ho hia paa no do. Sɛ yɛyɛ dɛm a, nna yɛrekyerɛ dɛ yɛwɔ awerɛhyɛmu dɛ Jehovah nye “Obi a odzi mu wɔ nyimdzee mu.” (Job 36:4) Ndɛ, ɔwɔ mu dɛ ndzɛmba ahorow bi wɔ hɔ a yɛnntse ase, naaso yɛrohwɛ kwan dɛ Jehovah bɛkyerɛkyerɛ hɛn ndzɛmba afofor pii. Afei so, ɔyɛ hɛn dɛw paa dɛ yebenya hokwan esua ndzɛmba pii afa hɛn Nyame Kɛse no ho afebɔɔ.—Ɔsɛnk. 3:11.