Fida, October 17
Hom nnantsew dɛ kan mba.—Eph. 5:8.
Yehia Nyankopɔn no sunsum krɔnkrɔn no ama yeetum akɔ do abɔ hɛn bra “dɛ kan mba.” Ebɛnadze ntsi a? Osiandɛ ɔyɛ dzen paa dɛ obi bɔbɔ bra a no ho tsew wɔ wiadze a efifidze na ndwamansɛm ahyɛ mu ma yi mu. (1 Thess. 4:3-5, 7, 8) Nyankopɔn no sunsum krɔnkrɔn no botum aboa hɛn ma yaapow wiadze adwen. Bi nye wiadze nyansapɛ nye nsusui ahorow a ɔnye Nyankopɔn ne dze nnhyia no. Afei so, sunsum krɔnkrɔn no botum aboa hɛn ma yaayɛ ‘papa nye dza ɔtsen’ aber nyina. (Eph. 5:9) Kwan kor a yebotum afa do enya sunsum krɔnkrɔn nye dɛ yɛbɛserɛ efi Nyankopɔn hɔ. Jesus kaa dɛ Jehovah ‘dze sunsum krɔnkrɔn bɛma hɔn a wobisa no no.’ (Luke 11:13) Afei so, sɛ yɛnye hɛn nuanom bɔ mu yi Jehovah ayɛw wɔ asafo nhyiamu ase a, yenya sunsum krɔnkrɔn. (Eph. 5:19, 20) Nyankopɔn no sunsum krɔnkrɔn no bɔboa hɛn ma yaayɛ dza ɔsɔ n’enyi. w24.03 23-24 ¶13-15
Memenda, October 18
Hom nkɔ do mbisa, na wɔdze bɛma hom; hom nkɔ do nhwehwɛ, na hom bohu; hom nkɔ do mbɔ mu, na wobobue hom.—Luke 11:9.
Ihia abotar paa anaa? Sɛ dɛm a, serɛ Jehovah ma ɔmma wo bi. Abotar ka sunsum no aba no ho. (Gal. 5:22, 23) Ntsi yebotum abɔ mpaa aserɛ Jehovah dɛ ɔmfa no sunsum krɔnkrɔn no mboa hɛn ma yennya dɛm su yi bi. Sɛ yehyia tsebea bi a ɔsɔ hɛn abotar hwɛ a, yɛbɔkɔ do aserɛ Jehovah dɛ ɔmfa no sunsum krɔnkrɔn no mboa hɛn ma yennya abotar. (Luke 11:13) Yebotum so aserɛ Jehovah dɛ ɔmboa hɛn ma yenhu ndzɛmba dɛ mbrɛ ohu no no. Sɛ yɛbɔ mpaa a ɔtse dɛm wie a, ɔsɛ dɛ yɛyɛ hɛn afamudze dze da abotar edzi da biara. Sɛ yɛkɔ do serɛ Jehovah dɛ ɔmma hɛn abotar, na yɛyɛ dza yebotum biara da abotar edzi a, ɔnodze ɔbɛgye ndwow wɔ hɛn akoma mu na ɔbɛba abɛyɛ hɛn suban. Afei so, sɛ edwendwen Bible mu nhwɛdo ahorow ho a, ɔbɔboa wo ma eenya abotar. Bible no ka nyimpa pii a wɔdaa abotar edzi ho asɛm. Sɛ yɛdwendwen dza wɔyɛe no ho a, ɔbɔboa hɛn ma yeehu akwan a hɛn so yebotum afa do ada abotar edzi. w23.08 22-23 ¶10-11
Kwesida, October 19
Hom ntow hom eboa no mfa mpa nam.—Luke 5:4.
Jesus maa ɔsomafo Peter awerɛhyɛmu dɛ Jehovah bɛma ne nsa aka dza ohia no. Jesus no wusoɛr ekyir no, ɔsanee faa anwanwa kwan do maa Peter nye asomafo a nna wɔka no ho no paa nam. (John 21:4-6) Ekyingye biara nnyi ho dɛ dɛm anwanwadze yi maa Peter hun dɛ Jehovah bɔhwɛ no. Nna Jesus edzi kan aka dɛ ‘hɔn a wodzi kan hwehwɛ Ahenman’ no, Jehovah bɔhwɛ hɔn. Obotum aba dɛ Peter kaa dɛm asɛm a Jesus kae no. (Matt. 6:33) Dɛm ntsi, Peter dze asɛnka edwuma no dzii kan wɔ n’asetsena mu na nnyɛ afar edwuma no. Pentecost 33 H.B. no, Peter dze akokodur kaa asɛmpa no kyerɛɛ nyimpa mpempem pii na ɔboaa hɔn ma wɔbɛyɛɛ agyedzifo. (Andw. 2:14, 37-41) Ɔno ekyir no, ɔboaa Samariafo nye Amanamamfo ma wosuaa Christ ho adze na wodzii n’ekyir. (Andw. 8:14-17; 10:44-48) Ɔda edzi dɛ Jehovah dze Peter dzii dwuma paa dze boaa nyimpa ahorow nyina ma wɔbaa Christianfo asafo no mu. w23.09 20 ¶1; 23 ¶11