iKarua ni Veigauna

21 E qai davo kei ira na tukana o Josafati, e bulu kei ira na tukana ena Koro i Tevita, e tui sara o Jorami na luvena tagane me sosomitaki koya.+ 2 O ira na tacina na luvei Josafati, o Asaraia, o Jieli, o Sakaraia, o Asaraia, o Maikeli kei Sefataia, o ratou kece qo na luvei Tui Josafati e Isireli. 3 E qai solia vei ratou o tamadratou e levu na iloloma ena siliva, na koula, na ka vivinaka, kei na veikoro vakabai e Juta,+ ia e solia na matanitu vei Jorami+ ni ulumatua.

4 Ni lewa ga o Jorami na matanitu i tamana e vakataudeitaka na nona veiliutaki ni vakamatei ratou kece na tacina+ ena iseleiwau kei na so na turaga e Isireli. 5 E tui o Jorami ni sa yabaki 32, e veiliutaki e Jerusalemi me walu na yabaki.+ 6 E muria na nodra ivalavala na tui Isireli+ me vaka era cakava na vuvale i Eapi, ni watina na luvena yalewa o Eapi+ qai cakava tiko ga na ka ca ena mata i Jiova. 7 Ia e sega ni via vakarusa na vuvale i Tevita o Jiova ena vuku ni nona veiyalayalati kei Tevita,+ ni yalataka me solia vua kei ira na luvena tagane e dua na cina me sega ni mudu.+

8 Ena nona gauna, e bese ni vakarorogo vei Juta+ o Itomi, e mani bulia ga e dua na kena tui.+ 9 E qai lako i kea o Jorami, o ira na nona tamata turaga kei na nona qiqinivalu kece, e tucake ena bogi me ravuti ira na Itomi era wavokiti koya tu kei ira na turaga ni qiqinivalu. 10 Ia e vorati Juta tiko ga o Itomi me yacova mai na siga qo. E vorati koya tale ga o Lipina+ ena gauna qori ni biuti Jiova na nodra Kalou na tukana.+ 11 E cakava tale ga o koya na vanua cecere+ ena veiulunivanua e Juta me uqeti ira na lewe i Jerusalemi mera saqamua vakayalo, mani vakacalai ira na Juta.

12 E kau yani vua na ivola nei Ilaija+ na parofita, e kaya: “Qo na ka e kaya o Jiova na Kalou i Tevita na tukamuni, ‘Oni sega ni muria na ivalavala i Josafati+ na tamamuni se na ivalavala i Tui Esa+ e Juta. 13 Ia oni muria na nodra ivalavala na tui Isireli+ oni qai uqeti ira na Juta kei ira na lewe i Jerusalemi mera saqamua vakayalo+ me vaka na saqamua ni vuvale nei Eapi,+ oni vakamatei ratou mada ga na tacimuni+ ena vuvale i tamamuni eratou vinaka sara vei kemuni. 14 O koya gona, o Jiova ena mokuti ira na nomuni tamata ena imoku levu, o ira na luvemuni, o ira na watimuni, kei na nomuni iyau kece. 15 Ena tauvi kemuni e levu na mate, wili kina na mate ni nomuni wawa me yacova ni lutu mai tuba na nomuni wawa ena vuku ni mate, ena veisiga.’”

16 E qai uqeta+ o Jiova mera saqati Jorami o ira na kai Filisitia*+ kei ira na kai Arapea+ era tiko volekati ira na kai Iciopea. 17 Era mani lako i Juta, era curuma vakaukaua ra qai kauta na iyau taucoko e kune ena valenitui,+ o ira na luvena kei ira na watina, e vo ga vua na luvena tagane o Jioasi,*+ na nona itini. 18 Oti kece qori, e vakatubura vua o Jiova na mate ni wawa e sega na kena iwali.+ 19 Ni toso na gauna, ni oti vinaka e rua na yabaki e qai lutu mai tuba na nona wawa ena vuku ni kena mate, e mani mate ni vakararawataki koya vakalevu na kena mate, era sega ni vakamakama ena vukuna na nona tamata me vaka na vakamakama era cakava vei ira na tukana.+ 20 E tui o koya ni sa yabaki 32, e veiliutaki e Jerusalemi me walu na yabaki. E sega ni dua e rarawataka na nona mate. Era buluti koya ena Koro i Tevita,+ sega ni nodra ibulubulu na tui.+