Na Vuli iVolatabu e Yaga Beka Vei Iko?

“ME KUA ni wiliki ke sega ni tiko e dua na bete.” Na ivakaro oqori e kune ena itekitekivu ni so na iVolatabu era taukena na lotu Katolika. “E dau dredre vei keimami na lotu Katolika me keimami kila na iVolatabu,” e kaya o Kay Murdy mai na Catholic Bible Institute mai Los Angeles, “ia sa veisau tiko oqori.” Na gauna era kila kina na lotu Katolika na vakayacoka ni Vosa ni Kalou ina nodra bula, e tukuna, “ra sa tekivu vakasaqaqara ga vakataki ira ena iVolatabu.”

Ena vuku ni veisau oqo, a vola kina na ivoladraudrau na U.S. Catholic na ka e tukuna e dua na iliuliu ni vuli ena veika vakalotu ni o ira na lotu Katolika era curu ina kalasi ni vuli iVolatabu era vakila “nira vakalaboci na lotu Katolika, ni sa dua na ka na veika vakayalo ena iVolatabu. Era vinakata gona mera rawata e so na ka vakayalo era vakuai tu kina.”

Se dina beka oya se sega, na “veika vakayalo” cava e tu ena iVolatabu e rawa ni vakasaqara me kila o koya e vuli iVolatabu? Vakasamataka mada: O na taleitaka li mo na kila na iwali ni lomaocaoca ni veisiga? O na rawata vakacava na bula sautu ena loma ni vuvale? Na cava e sa rui levu kina na ivalavala e sega ni rakorako qai veibeci? Na cava e vu ni ivakarau kaukaua vei ira na itabagone edaidai? Na isau nuitaki ni veitaro oqori kei na so tale na taro vereverea e kune ga ena Vosa ni Kalou, na iVolatabu, ena qai yaga dina na “veika vakayalo” oqo, sega wale ga vei ira na lotu Katolika se na lotu Tawase, vei ira tale ga na lotu Buda, lotu Idu, lotu Musulimi, lotu Shinto, o ira sara tale mada ga era sega ni vakabauta ni bula tiko na Kalou kei ira era sega ni via kila na Kalou. Me vaka ga e kaya na daunisame, ‘Na vosa ni Kalou e cina ina yavana, kei na rarama ina nona sala.’ Ena rawa ni vakatale ga kina vei iko.​—⁠Same 119:105.