Ra Dau Vakarusa na Veikau

ENA gauna vakaivolatabu, ra dau vakamareqeti na vunikau mera iyaubula. Me kena ivakaraitaki, era bau wili tale ga na vunikau ena veika a volia o Eparama vata kei na tikiniqele me ibulubulu i Sera na watina lomani.​—Vakatekivu 23:15-18.

Ra wili tale ga nikua vakaiyaubula na vunikau ra qai dau vakadreta e levu na matanitu mera maroroi. E kaya na ivola, State of the World 1998, (iTuvaki Kei Vuravura 1998): “Era lomaleqataka e levu ena veivanua draki batabata na veika sa yacova tiko na veikauloa ni veivanua draki katakata, ia e kena irairai nira lecava ni leqa levu sara e tara tiko na nodra veikau.” Na cava e vu ni kena mai tu kina ena ituvaki rivarivabitaki oya na veikauloa kei Urope i cake vaka kina kei Noca Amerika? E levu era beitaka na takau kei na samaki ni veikau, ia e tiko e so na ka e sega soti ni laurai levu e vakarusai ira vakamalua na veivunikau. Na cava beka? Na cagi duka kei na uca kama. Na veika vaka oqo ena vakamalumalumutaki ira vakamalua na veivunikau, era na sega ni vorata rawa kina na manumanu lalai kei na mate e dau vakarusai ira na vunikau.

Ra sa dau vakasalataka ena vicasagavulu vata na yabaki na lewenivanua kei ira na vuku era dau kauai ni vinakati vakabibi me taqomaki na iyaubula kei vuravura. Ena veiyabaki ni 1980, era dikeva kina mai Jamani na saenitisi na ca ni cagi duka kei na uca kama ena vuravura eda bula tu kina oqo, ra qai kaya: ‘Ke sega ni caka e dua na ka, ena yabaki 2000, eda sa na sarava ga na veikau ena itaba makawa kei na iyaloyalo.’ Ka ni marau ni dau vakavinakataki koya ga vakataki koya na vuravura, e bula rawa kina me yacova mai oqo ena vakacaca a nanumi tu ni na yaco.

Ia ena veigauna sa tu mai liu, na Kalou ga ena qai vakabula me tawamudu na noda vuravura oqo kei na kena iyaubula. “Sa vagunuva na veiulu-ni-vanua ko koya mai na nona vale ecake” qai “vakatubura ko koya na co me kedra na manumanu, kei na co eso me yaga vei ira na tamata.” Sa yalataka tale ga me ‘vakarusai ira era vakarusai vuravura tiko.’ (Same 104:13, 14; Vakatakila 11:18, VV) Sa na wacava na totoka ni gauna oya, ni sa na rawa vei ira na lewe i vuravura mera marautaka tawamudu na bula ena vuravura e savasava vakaoti!​—Same 37:9-11.