Henry VIII Kei na iVolatabu
E VOLA o Winston Churchill ena nona ivola na History of the English-Speaking Peoples (Volume 2): “Na veiveisau levu vakalotu a yaco ena ika16 ni senitiuri, e veisautaka sara ga na rai ni lotu. Sa tekivu rai na tamata ina ivakavuvuli ni iVolatabu me veidusimaki ina vuqa na basoga ni bula. Ia, ni bera oya era dau nanuma o ira na itabaqase ni dodonu mera wilika ga na iVolatabu na bete, ni vakarerevaki ke lutu e ligadra na sega ni vuli.”
E kuria na ivakamacala oqo: “Erau vakadewataka ina vosa vakavalagi na iVolatabu taucoko o Tyndal kei Coverdale, qai tabaki ena imatai ni gauna ena icavacava ni vulaitubutubu ni 1535, ia e sega ni kena levu ga oya, a levu tale na kena itabataba a tabaki. E tukuna tale ga na Matanitu vei ira na bete mera veiuqeti ena wiliki ni iVolatabu.” Ni oti e vica vata na senitiuri ni kena sega ni kilai tu na lewe ni iVolatabu, sa vakarau me kilai e Igiladi na iVolatabu, ia e sega ni vu ena nona veiuqeti na lotu, ena matanitu ga i Henry VIII.a
“E kuria na vakacalai ni nodra rai na itabaqase ni vakadonuya na Matanitu me tabaki e Parisi e dua na iwiliwili levu ni iVolatabu Vakavalagi, e rairai vinaka sara mai na itabataba era se tabaki taumada. Ena Sepiteba 1538, a vakarota tale ga na matanitu mera volia na veivalenilotu e Igiladi e yadua na iVolatabu Vakavalagi levu duadua me biu ena valenilotu kece, mera lai wiliwili kina na lewenilotu. E ono na itabataba a biu ena valenilotu levu na St Paul ena korolevu mai Lodoni, ra qai tabili yani kina ena veisiga mera lai wilika, vakauasivi, e tukuni, ke kunei e dua e domolevu me wilika.”
Ka ni rarawa, ni levu na matanitu era sega ni vakayagataka vinaka na itavi dokai mera wilika wasoma na iVolatabu. E dodonu me vakasamataki vakabibi ni “Kalou sa vakavuna nai Vola Tabu kecega, sa yaga oqo mei vakavuvuli, me vunauca na ca, me ia kina na vakadodonutaki, me ia kina na vakatavuvuli e na ka e dodonu.”—2 Timoci 3:16.
[iVakamacala e ra]
a E veiliutaki mai Igiladi o Henry VIII ena yabaki 1509 ina 1547.
[iTaba ni Credit Line ena tabana e 32]
Henry VIII: Painting in the Royal Gallery at Kensington, from the book The History of Protestantism (Vol. I)