E Bibi Meda Dau Loloma

SE MANI vakacava na yabaki ni nodra bula na tamata, na nodra itovo vakavanua, se na roka ni yagodra, era gadreva kece ga mera lomani. Ia era na sega ni marau ke ra sega ni lomani. A vola e dua na daunivakadidike vakavuniwai: “Na loloma kei na veikilai e rawa ni vakatau kina na noda tauvimate kei na bula vinaka, na ka e vakavuna meda rarawa kei na ka meda marau kina, na ka e vakavuna na noda lomaleqa kei na ka e veivakabulai. Ke dua na wainimate vou e vaka oya na ka e rawa ni cakava, era na rairai vinakata na vuniwai mera taurivaka kece na tauvimate. Ena rawa ni vakaleqa na nona veiqaravi na vuniwai ke sega ni vakadonuya mera taurivaka na tauvimate.”

Ia, ena ivakarau ni bula oqo, vakauasivi na tabana ni dau vakauitukutuku kei ira na tamata kilai levu, e kunei nira vakabobulataki ga ena qara iyau, kaukaua, rogo kei na gagadre ni via veiyacovi, era sega kina ni vakaceguya na ka era gadreva dina, oya me vinaka na nodra dau veimaliwai. Era dau vakabibitaka e vuqa na dauniveivakavulici na isausau vakayago kei na cakacaka saumi, ni nodra rai ena veika oqori ena rawati kina na tiko vinaka. E dina ni bibi na vuli, na rawaka, kei nona vakayagataka vinaka e dua na taledi e tu vua, ia me qarai beka ga oqori me sa lai guilecavi kina na nona vuvale kei ira nona itokani? E dua na dauvolaivola makawa, e tamata vuku qai dau dikeva tale ga na veika bula, e vakatauvatana na tamata sega ni dau loloma ina “kaukamea sa rorogo, se na lali sa tataqiriqiri.” (1 Korinica 13:1) O ira na vaka oqo era na rairai vutuniyau se ra tamata rogo, ia era na sega ga ni kunea na marau dina.

O Jisu Karisito e kilai ira vinaka na tamata qai dau marautaki ira tale ga, e vakabibitaka ena nona ivakavuvuli na nona lomana na Kalou kei ira na wekana. E kaya: “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kecega. . . . Mo lomana na kai nomu me vaka ko lomani iko.” (Maciu 22:​37-39) O ira ga na muria na vosa oqo era imuri dina i Jisu. E kaya kina: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.”​​—Joni 13:35.

E rawa vakacava vua e dua me bucina na loloma ena vuravura oqo? E rawa vakacava vei ira na itubutubu mera vakavulica na luvedra mera dau loloma? Na taro oqori ena qai veivosakitaki ena ulutaga e tarava.

[iYaloyalo ena tabana e 3]

E ka ni bolebole na kena bucini na loloma ena vuravura kocokoco oqo