Tukutuku Mai na Daukacivaka na Matanitu
‘Lako Mai mo ni Vukei Keimami’
ENA Julai 2000, a kerei o ira na iVakadinadina era kila na vosa vakajamani era vakaitikotiko e Austria, Jamani, kei Suwitisiladi mera gole i Bolivia. Cava na vuna? Rauta ni 300 na kilomita mai na taoni o Santa Cruz, e Bolivia, e levu kina na nodra itikotiko na ilawalawa ni dua na lotu na Mennonite era vosa vakajamani. E laurai nira dau dikeva vagumatua na iVolatabu.
Era ciqoma na veisureti oqori e rauta ni le 140 na iVakadinadina. E so era lako ena vica na macawa, e so tale era lako me dua na yabaki se sivia. Na nodra cakava oqori era sa vakaraitaka tiko kina na yalo e kune vei ira na daukaulotu era rogoca na veisureti ena imatai ni senitiuri: “Lako mai ki Masitonia, mo vukei keimami.”—Cakacaka 16:9, 10.
E vakacava tu na vunau ena yalava oya? E kaya e dua na qase ni ivavakoso e kea: “E rauta ni walu na aua na neimami vodo mai na taoni me yaco ina dua vei ira nodra itikotiko na Mennonite, baleta ni gaunisala ca. E 43 na nodra itikotiko, e va na siga na neimami sikova na kena e tiko sara vakayawa, ena gadrevi kina me keimami dau moce ena valelaca ena so na bogi. Ia e yaga dina na neimami sasaga, ni levu vei ira era se bera vakadua ni rogoca na itukutuku vinaka.”
Era sega ni taleitaki ira na iVakadinadina e levu vei ira na ilawalawa Mennonite ena imatai ni gauna era sikovi kina. Ia ena vuku ni nodra dau sikovi wasoma era sa qai ciqoma kina na veika era lai tukuna tiko yani na iVakadinadina. Kena ivakaraitaki e kaya e dua na dauteitei ni sa via dua na yabaki na nona wilika tiko na Yadra! E kuria: “Au kila ni levu e ke era sega ni duavata kei na nomuni ivakavuvuli, ia au vakabauta ni oqo ga na ka dina.” E kaya e dua na turaga mai na dua tale na itikotiko: “Era kaya e so keimami vakaitikotiko vata ni oni parofita vakailasu, e so tale era kaya ni ka dina ga oni vakatavuvulitaka. Au via vakadinadinataka sara ga vakataki au.”
Ena gauna oqo sa tiko e dua na ivavakoso vosa vakajamani e Bolivia, e 35 na kena dautukutuku, e le 14 vei ira era cakacaka vakatabakidua. Me yacova mai nikua, e le 14 mai vei ira na ilawalawa Mennonite era sa dautukutuku ni Matanitu ni Kalou, sa lewe 9 tale era sa lako tiko mai ena soqoni. E kaya e dua na kena turaga e se qai papitaiso ga oqo: “E vakadinadinataka sara ga na veidusimaki i Jiova. Era talai mai na tacida era vosa vakajamani mera mai vukei keimami. Keimami vakamuduotaka vakalevu.” E kuria na luvena yalewa e yabaki 17: “E veivauqeti dina nodra gugumatua na tacida itabagone era lako mai e ke. E levu vei ira era painia, era vakayagataka nodra gauna kei na nodra ilavo mera veivuke kina. Au vinakata sara ga meu cakava tale ga na ka vata oya.”
E laurai gona kina nodra vakila na marau dina kei na lomavakacegu o ira na soli ira mera ‘lako yani.’