O Tautauvata Kei na Vunisekoula?

RAU lesu tiko i vale e rua na dauvunau, ni oti nodrau cakacaka vakavunau ena dua na koro ena saula kei Port Moresby, mai Papua Niu Kini. Ni rau taubale tiko erau raica sara e dua na vunikau rairai vinaka. “Raica, na sekoula!” e kaya o koya e qase. E vuki vei cauravou, qai tomana: “Na ibalebale ni yaca oya, na ‘kau ni yabaki.’ Na kau oqo e duidui mai na levu tale na kau ni vanua tunumaka, e veiyabaki ena mira na drauna qai vaka me sa mate na kau. Ia ni tau na uca, ena bulabula mai, e se, qai totoka tale na kena irairai.”

Dua na ka e rawa ni vulici mai na vunisekoula, se na royal poinciana, na yaca e kilai kina. E so na kenadau era kaya ni vei ira kece na kau e dau se, na vunikau oqo e ikalima ni kau e vuravura e rairai vinaka na sena. Dina ni dau mira na sena kei na drauna ni mamaca na draki, ia na vunikau qo e dau tu ga na mena wai. E kaukaua na wakana qai rawa ni sala wavokita na vatu e lomaniqele. Oqori gona na vuna ena dei kina ni kaukaua na liwa ni cagi. E rawa ni tukuni ni na bulabula tu ga ena gauna sara mada ga e veisau kina na ituvaki.

De dua eda na sotava e so na ituvaki ena vakatovolei kina na dei ni noda vakabauta. Na cava e rawa ni vukei keda meda vosota? Me vaka ga na vunisekoula, e rawa tale ga nida gunuva da qai katona tu na wainibula, na Vosa ni Kalou. Dodonu tale ga meda kabi dei tiko ga vua na noda vu ni ‘kaukaua’ o Jiova, vaka kina na nona isoqosoqo. (2 Samuela 22:⁠3) Io, e veiuqeti noda vakasamataka na dei ni vunisekoula ena ituvaki dredre sara mada ga, o keda tale ga e rawa nida kaukaua qai dei vakayalo ke da vakayagataka vinaka na ivukevuke e vakarautaka o Jiova. Nida cakava oqori, eda na qai ‘taukena na veika e yalataka,’ okati kina na vosa ni yalayala ni bula tawamudu.​—Iperiu 6:​12; Vakatakila 21:4.