Taro na Dauwiliwili
Nona ivola vei ira e Iperiu, a cavuta kina na yapositolo o Paula “na veitabaki liga.” E vosa tiko beka o koya ena nodra lesi na qase se baleta e dua tale na ka?—Iper. 6:2.
E sega ni dua na vuna vinaka meda vakadeitaka kina qori, ia a rairai vakaibalebaletaka tiko o Paula na veitabaki ni liga ena kena sobuti ira na qase na isolisoli ni yalo tabu.
Ena iVolatabu na veitabaki ni liga e vakaibalebaletaki tale ga ena nodra lesi ena itavi dokai na dauveiqaravi i Jiova. O Mosese a ‘tabaka na ligana’ vei Josua me lesi koya me kena isosomi. (Vkru. 34:9) Ena ivavakoso vaKarisito, e so na tagane era lesi ena veitabaki ni liga nira rawata na kena ivakatagedegede. (Caka. 6:6; 1 Tim. 4:14) E veivakasalataki o Paula me kua ni vakusakusataki na tabaki ni liga vua e dua.—1 Tim. 5:22.
Ia, e uqeti ira na lotu vaKarisito mai Iperiu o Paula mera ‘torocake mera matua sara’ nira sa biuta na ‘ivakavuvuli taumada.’ A qai vakaraitaka tale ga mera “veivutuni e na vuku ni valavala eda mate kina, e na vakabauta talega na Kalou, ai vakavuvuli ni veipapitaisotaki, kei na veitabaki liga.” (Iper. 6:1, 2) Na nodra lesi na qase e dua beka ga na ivakavuvuli taumada mera toroya cake na lotu vaKarisito? Sega. Nodra itavi na qase ni ivavakoso e itavi bibi dina, era sauva ga o ira na tagane matua, era qai vakaraitaka tale ga nira doka.—1 Tim. 3:1.
Ia, na veitabaki ni liga e dusia tale e dua na ka. Ena imatai ni senitiuri, a sega ni okati ira na Isireli vakayago o Jiova mera nona tamata, e vakalougatataki ira ga na Isireli vakayalo, qori na ivavakoso lotu vaKarisito lumuti. (Maciu 21:43; Caka. 15:14; Kala. 6:16) E mai vakadeitaka na veisau qori na kena yaco na isolisoli ni yalo tabu me vaka na duivosavosa. (1 Kor. 12:4-11) Ni ratou tavuki ena vakabauta o Konilio kei na nona vuvale, e sovaraki vei iratou na yalo tabu, kilai rawa qori ena nodratou “vosataka na vosa ni veivanua tani.”—Caka. 10:44-46.
Ena so na gauna, na isolisoli ni yalo tabu e okati kina na veitabaki ni liga. Na nona vunautaka na itukutuku vinaka e Samaria o Filipi, yaco kina mera papitaiso e levu. Na ilawalawa dauvakatulewa a qai talai rau na yapositolo o Pita kei Joni ena vanua qori. Na vuna? Eda wilika: “A rau sa tabaki ira [sa qai papitaiso vou] e na ligadrau, a sa yaco kina kivei ira na Yalo Tabu.” E rairai dusia qo na nodra ciqoma na isolisoli ni yalo tabu, na taledi era raica rawa na tamata. Eda kila qo vei Saimoni, a kenadau ena kena vakayagataki na ilawaki vakatevoro. E vakadinata o koya na kaukaua ni yalo tabu, ia ena yalokocokoco e qai saga me volia na isolisoli qo, me lai tabaki ira kina na tamata ena ligana me rawa ni sobuti ira tale ga na yalo tabu mera cakamana. (Caka. 8:5-20) Era qai papitaiso tale ga e Efeso era le 12. Eda wilika: “Ni sa tabaki ira ko Paula e na ligana, sa yaco kivei ira na Yalo Tabu; a ra sa vosataka na vosa ni veivanua tani, ka dauvakatavuvuli.”—Caka. 19:1-7; vakatauvatana 2 Timoci 1:6.
O koya gona, ena Iperiu 6:2, na veitabaki ni liga e vakaibalebaletaka o Paula oya na kena dewa na isolisoli ni yalo tabu vei ira na vakabauta vou.