Taro na Dauwiliwili

Ena ituvaki cava ena rawa ni papitaiso tale kina e dua?

Eso na ituvaki ena rairai vinakata tale e dua me papitaiso, ena nona nanuma ni a sega ni vakaibalebale nona papitaiso e liu. De dua a cakava lo tiko eso na ivalavala a rawa ni sivo kina e dua ena gauna a papitaiso kina. Koya gona, ena ituvaki qo ena rawa beka ni yalataki koya vua na Kalou? Ena vakaibalebale ga nona yalayala vei Jiova ke tinia na ivalavala e sega ni vakaivolatabu. Ni dua e papitaiso qai cakava tiko na ivalavala ca, ena rairai vakasamataka me papitaiso tale.

Vakacava ke dua e sega ni ivalavala ca bibi ena gauna e papitaiso kina, ia e qai ivalavala ca bibi ni oti nona papitaiso, vinakati kina me rogoci nona kisi vei ratou na komiti ni veilewai? Kaya mada ke tukuna ni sega ni matata vua na ibalebale ni nona papitaiso qai tukuna tale ga ni sega ni vakadeitaki dina nona papitaiso ya. Nira veivosaki kei koya e cala, me ratou kua ni taroga na qase ni ivavakoso na veika e baleta nona papitaiso, kua tale ga ni taroga ke sega ni vakadeitaki nona papitaiso ena gauna ya. A sa rogoca o koya na ivunau yavutaki vakaivolatabu me baleta na bibi ni papitaiso. A sauma vakadomoilevu tale ga na taro ni yalayala kei na papitaiso. Qai vakaisulu ena isulu vou ena nona tabadromuci ena wai. E ka vakayalomatua gona me vakabauti ni sa kila vinaka tu o koya na bibi ni ka e cakava. Era na raici koya na qase ni ivavakoso me dua e papitaiso oti.

Ke mani vakaraitaka e dua ni sega ni vakadeitaki nona papitaiso, me ratou qai veidusimaki na qase ena nodratou raica vata na Watchtower ni 1 Maji, 1960, tabana e 159 kei na 160, kei na Watchtower ni 15 Feperueri, 1964, ena tabana e 123 ina 126, e vakamacalataki kina vakamatata na veika me baleta na papitaiso. Ena vuku ni so na ituvaki (me vaka na kena sega ni matata vua na ivakavuvuli vakaivolatabu ena gauna e papitaiso kina) ena vakatau sara ga vua e dua ke via papitaiso tale.

Na cava mera nanuma na lotu vaKarisito nira tiko vata kei ira na so ena dua na itikotiko?

Eda vinakata kece e dua na vanua meda vakaitikotiko kina. Levu nikua era sega ni taukena e dua na vale. Eso tale na ituvaki me vaka na bula dredre vakailavo kei na tautauvimate e rawa ni vakavuna mera mai vakaitikotiko vata e vica na vuvale, okati kina eso tale na weka. Ena so na vanua e vuravura era na tiko vata ga na weka ena dua na rumu qai sega na gauna vakataki ira.

E sega ni nona itavi na isoqosoqo i Jiova me vakarautaka ena ivavakoso na lawa me baleta na noda tiko vata ena dua na itikotiko. Ia era uqeti na lotu vaKarisito mera nanuma na ivakavuvuli vakaivolatabu, mera vakalewa kina se vakadonuya na Kalou nodra ivakarau ni bula ena dua na itikotiko se sega. Na cava eso na ivakavuvuli qori?

iMatai, nida vakaitikotiko kei ira tale na so, me nanumi tiko na ka e rawa ni yaco vei keda vaka kina ena noda bula vakayalo. Na cava e kilai me baleti ira? Era qaravi Jiova beka? Era muria na ivakatagedegede vakaivolatabu? E vola o Paula “Ni kua ni vakaisini kemuni. Na ilala ca e vakacacana na itovo vinaka.”​—1 Kor. 15:33.

E vakamacalataki ena iVolatabu ni cata o Jiova na veibutakoci kei na veidauci. (Iper. 13:4) Koya gona e sega ni taleitaka o Jiova na nodrau moce vata ena dua ga na rumu na yalewa kei na tagane rau sega ni veiwatini. Ena sega ni vinakata e dua na lotu vaKarisito me tiko ena vanua e vakayacori kina na ivalavala vakasisila va qori.

Ia na iVolatabu e uqeti ira na vinakata me vakadonui ira na Kalou mera “dro tani mai na veidauci.” (1 Kor. 6:18) E ka vakayalomatua gona vei ira na lotu vaKarisito mera kua ni tiko ena itikotiko ena rawa nira temaki ina ivalavala vakasisila. Kena ivakaraitaki, e vica toka na lotu vaKarisito era tiko vata ena dua na itikotiko. Ena rawa ni vakavuna qo me yaco kina eso na leqa tawanamaki? Vakacava ke yaco ena dua na gauna me rau tiko taurua ga o rau na sega ni veiwatini nira yali tu na kena vo? Ena rivarivabitaki tale ga ni rau vakaitikotiko vata e rua rau sega ni veiwatini, ia e rau sa veivinakati tiko. E ka vakayalomatua gona me muduki na ituvatuva qo ni noda tiko vata ena dua na itikotiko.

E sega ni ka vakayalomatua tale ga vei ira na veisere mera vakaitikotiko vata tiko ga. Me vaka ni rau dau veitaleitaki tu e liu, ena rawa ni rau temaki me rau vakayacora na ivalavala vakasisila.​—Vkai. 22:3.

Dua tale na ka me nanumi oya nodra rai o ira na tiko tikivi keda. Me kauaitaki sara vakabibi nodra rai na tamata ena vanua eda vakaitikotiko kina, dina ke da mani nanuma ni sega ni dua na kena leqa. Eda sega ni vinakata me vakarogorogocataki na yaca i Jiova ena ka eda cakava. E tukuna o Paula: “Ni kua ni cakava e dua na ka mera tarabe kina na Jiu kei ira na kai Kirisi, kei ira tale ga na lewe ni ivavakoso ni Kalou, me vaka ga na noqu sega ni vakatarabetaki ira na tamata kece ena ka kece ga, au sega ni qara na ka e yaga ga vei au, na ka ga e yaga vei ira e levu, de dua era na vakabulai kina.”​—1 Kor. 10:​32, 33.

De dua ena dredre toka vei ira na via tokona na ivakatagedegede cecere i Jiova, nodra vaqara e dua na itikotiko e veiganiti. Ia e dodonu mera “vakadeitaka tiko ga na ka e vakadonuya na Turaga.” Mera vakadeitaka me kua ni dua na ivalavala tawasavasava me vakayacori ena nodra itikotiko. (Efeso 5:​5, 10) Ena vinakati mera kerea na lotu vaKarisito na veidusimaki vaKalou kei na nodra cakava na ka kece era rawata, mera taqomaki kina vakayago, nodra itovo kei na yaca i Jiova.