O Bau Kila?
Na cava na lawa ni vakatotomi, e yaga vei cei?
▪ Era vakaroti na dauteitei ena Lawa a soli vei Mosese mera kua ni tamusuka kece na vuata ni nodra vanua. Koya gona, o ira na dau tamusuki sila mera vakavoca na tutu ni nodra were. O ira na dau tomi vuanivaini mera kua ni tomika na vuanivaini e qeqera tu, se ra lesu tale mera lai kauta mai na kena a se sega ni matua ena imatai ni gauna. Vei ira era samuta na nodra vuniolive, na vuana e vo tu ena tabana mera kua tale ni samuta. (Vunau ni Soro 19:9, 10; Vakarua 24:19-21) Nira na qai tomika se ra lai kauta mai na vo ni veika e tamusuki qori o ira na dravudravua, luveniyali, yada, kei ira na vulagi.
Na lawa ni vakatotomi e yaga vei ira kece na Isireli. E uqeti ira kina na itaukeiniqele mera lomasoli, dauveinanumi ra qai nuitaka na veivakalougatataki ni Kalou. Ia vei ira na vakatotomi e vukei ira mera kua ni vucesa, ni cakacaka vakaitamera na vakatotomi. (Ruci 2:2-17) Na inaki ni lawa qo era na sega kina ni walokai na dravudravua se mera icolacola vei ira era tiko veitikivi. Era na sega ni nanuma nira tawayaga mera bula tu ga ena kerekere se na veivuke era sega ni bunotaka.
Na cava e lai kauta mai kina o Solomoni na kau ni valenisoro e Jerusalemi mai Lepanoni?
▪ E vakamacalataki ena 1 Tui 5:1-10 na nodrau veiyalayalati o Solomoni kei tui Taia o Airami. Rau vakadeitaka kina ni na vesuvesu vata me vaka na bilibili na kau sitari kei na junipa, qai vakacirimi e waitui mai Lepanoni me yaco i Isireli me tara kina na valenisoro.
Na kau sitari e dua na ivurevure ni ilavo levu ena Tokalau e Loma ena gauna makawa. Ni kau qo e dau vakayagataki wasoma mai Ijipita kei Mesopotemia me lalaga qai isa ni doka ni valenisoro kei na valenitui. E vakadinadinataki qo ena vanua e maroroi tu kina na itukutuku makawa ni vuvale vakatui, na volavola, kei na matavosa e ceuti ni a vakau mai ena veiyasai sauca kei Mesopotemia na sitari, so na gauna era butakoci se itoki ni ivalu. E dau vakayagataki na kau qo mai Ijipita me ta kina na waqa ni tui, kisinimate, kei na so tale na iyaya e vakayagataki ena veibulu.
E kilai tani na sitari ni Lepanoni ena kena dede, totoka, kena boi vinaka, qai sega tale ga ni kania na manumanu ni kau. Koya gona a vakayagataka na kau vinaka duadua o Solomoni me tara kina na valenisoro. Ena veiulunivanua mai Lepanoni e dau robota tu na vuni sitari lelevu, ena gauna qo sa vo ga e vica.
[iYaloyalo ena tabana e 15]
Usani na sitari ni Lepanoni, ivakatakarakara ceuti ni Asiria ena valenitui mai Sarikoni
[Credit Line]
Erich Lessing/Art Resource, NY