“Kerekere, o Rawa ni Tabaki Keirau?”

O Josué, e lewe ni vuvale e Peceli mai Mexico a sarasara tiko ena siti o Querétaro ni oti na ikarua ni siga ni soqo ni tikina. A mani sotava sara e dua na veiwatini mai Colombia o Javier kei Maru, rau kerei Josué me tabaki rau. Ni rakorako na isulusulu i Josué kei ratou na nona itokani iVakadinadina, rau mani taroga na veiwatini se ratou lesu mai ena dua na soqo ni tuvaitutu se dua tale na soqo bibi. E vakamacalataka sara o Josué nira tiko ena dua na nodra soqo na iVakadinadina i Jiova qai sureti rau tale ga na veiwatini me rau gole yani ena Sigatabu.

Erau via madua na veiwatini baleta na isulu erau dara tu e sega ni ganita na soqo ni tikina. Ia a solia vei rau o Josué na yacana kei na naba ni talevoni ni valenivolavola ni tabana e veiqaravi tiko kina.

E kidacala o Josué ni volavola mai o Javier ni oti e va na vula. Erau a lako ena soqo ni tikina na veiwatini, qo erau sa vinakata me sikovi rau yani o ira na iVakadinadina i Jiova e Mexico City, na vanua erau se tiko kina. Erau sa vulica sara na iVolatabu, rau lako tale ga ena soqoni. Oti ga e tini na vula erau sa dautukutuku sara. Erau mani toki e Toronto, Kenada, ia erau toso tiko ga vakayalo, yaco sara me rau papitaiso.

A ciqoma e muri o Josué e dua na ivola nei Javier, e vakamacalataka kina na ka e uqeti koya me ciqoma na ka dina. “Ni bera ni keirau lakova na soqo ni tikina, keirau sa veitalanoataka vakaveiwatini na neirau vinakata me keirau vukei vakayalo. Ni keirau raica na rakorako ni nomudou isulusulu, keirau kila ni dou lesu mai ena dua na soqo bibi. Ena soqo ni tikina, keirau qoroya na nodra veikauaitaki, qori nodra vakaraitaka na vanua me keirau dabe kina, neirau vukei me keirau vakamuria na wiliki ni iVolatabu, kei na nodra itovo na tiko ena soqo. Era sega ni kauaitaka na neirau dara tu na isulu ni saravanua.”

E vakadinadinataka o Josué na dina ni nona vosa na tui vuku o Solomoni! “E na mataka mo kaburaka na nomu sila, ia e na yakavi me kakua ni cegu na ligamu: ni ko sa sega ni kila se cava vei rau ena yaco, se na ka oqo se na ka ko ya, se na vinaka vakatautauvata ruarua.” (Dauv. 11:6) Vakacava o rawa ni kaburaka na itei ena nomu tu vakarau ena veigauna kece mo tukuna vei ira so tale na soqo ni tikina sa roro tiko mai se dua na ivunau? E rawa ni vakayagataki iko o Jiova mo vagolei ira na via kana ra qai via gunu tu vakayalo, me vakataki Javier kei Maru.​—Aisea 55:1.

[iYaloyalo ena tabana e 32]

Mai na imawi ina imatau: Alejandro Voeguelin, Maru Pineda, Alejandro Pineda, Javier Pineda, kei Josué Ramírez ena valenivolavola ni tabana e Mexico