E ‘Colata na Noqu iColacola e Veisiga’ o Jiova
E dau tauvi au e levu na mate, so mada ga e yaco vakasauri, eso na gauna au sa sega sara ga ni vosota rawa, ia au dau vakila na nona veivuke na Tamada vakalomalagi. Sa sivia qo e 20 na yabaki noqu marautaka voli mai noqu qaravi Jiova ena cakacaka vakapainia.
Au sucu ena 1956 qai tauvi au na mate na spina bifida, qo na kena sega ni bulicaki vinaka noqu suitu ena gauna au kunekunetaki kina. E vakaleqa sara ga na noqu nave, dredre meu lako qai tauvi au tale kina eso na mate.
Ni bera niu sucu, rau a vuli iVolatabu noqu itubutubu kei na dua na veiwatini daukaulotu iVakadinadina i Jiova. Au a sucu ena taoni o Usakos, mai Namibia, ena gauna au se gone kina, era le vica ga na dautukutuku era vakaitikotiko ena taoni qo. Me vaka ni sega na ivavakoso, keitou dau muria vakavuvale na ka e dau vulici ena gauna ni soqoni. Ena gauna au yabaki vitu kina, a vakayacori vei au e dua na veisele a vakatokai na urostomy, qo na kena biu e yagoqu e dua na paipo palasitika me rawa niu suasua kina. Niu yabaki 14, sa tauvi au na manumanusoni. Au mani sega ni vakaotia noqu vuli baleta ni rui yawa na koronivuli ni sekeneri, e gadrevi tale ga me rau dau qaravi au e veigauna noqu itubutubu.
Ia au vakatulewataka meu vaqaqacotaka na noqu veiwekani kei Jiova. E levu na noda ivola vaKarisito e se sega ni vakadewataki ena vosa vakaAfrikaan, na noqu vosa ni sucu. Au mani vulica na wilivola vakavalagi me rawa niu vulica na noda ivola. Niu sa yabaki 19, au dua sara na dautukutuku, au papitaiso tale ga. E levu na mate e tauvi au ena va na yabaki tarava, e vakararawataki au sara ga. E tarova tale ga na noqu gugumatua ena cakacaka vakavunau ena vanua au vakaitikotiko kina na noqu rerevaki ira na tamata, ni keimami veikilai ga.
Niu sa yabaki 20 vakacaca, keitou toki i Sauca Aferika, e imatai tale ga ni gauna meu soqoni ena dua na ivavakoso. Dua na ka noqu marau! Ia e gadrevi tale meu sele—qo me sele na ketequ me rawa niu valelailai vinaka kina.
Dua na gauna e muri, au rogoca nona vunau na ivakatawa dauveilakoyaki ni vosa tiko ena veika me baleta na cakacaka vakapainia. E uqeti au sara ga na ka e tukuna. Au kila niu dau tautauvimate, ia au sa vakadinadinataka mai nona dau vukei au o Jiova ena levu na ituvaki dredre. Au mani kerea meu painia tudei. Ia eratou sega ni vakadonuya na qase ni ivavakoso na noqu kerekere ena vuku ni mate e tauvi au tiko.
Au nanuma meu sa solia mada ga noqu vinaka taucoko ena vunautaki ni Matanitu ni Kalou. Ena nona veivuke o tinaqu kei na so tale, au rawata kina ena loma ni ono na vula na aua ni painia. Qori e vakadeitaka sara ga niu rawa ni painia, au rawa tale ga ni cakava na veiveisau me ganita na kequ ituvaki. Au mani kerea tale meu painia, a qai vakadonui meu dua na painia tudei ena 1 Seviteba, 1988.
Niu painia, au dau vakila vakalevu na veitokoni i Jiova. Au sega ni vakasamataka vakalevu na kequ ituvaki, au vakaogai au ga ena nodra vakavulici na ka vou ena ka dina, qori e itataqomaki, vukei au tale ga meu kaukaua vakayalo. Au marautaka sara ga na noqu vukea e levu mera yalataki ira ra qai papitaiso.
Au sega ni kila na cava ena yacovi au ena mate e tauvi au tiko. Ia e ‘colata na noqu icolacola e veisiga’ o Jiova. (Same 68:19) E sega wale ga ni vukei au meu vosota na kequ ituvaki, e vukei au tale ga meu marautaka noqu bula!