Yaca Vakaivolatabu ena Saqa Makawa

Ena 2012, e vakavu veitalanoa vei ira na dauvakadidike na kena laurai na tikitiki ni saqa qele sa 3,000 na yabaki na kena dede. Na cava era kauai kina vakalevu? Era kauaitaka na ka e volai toka kina.

Nira biuta vata na daukelikeli na tikitikina kece, era sa qai raica na volavola makawa vaKenani. E kaya: “Esipeali Peni [luvena tagane o] Peta.” Qo e imatai ni gauna mera raica kina na yaca qo na daukelikeli ena dua na volavola e ceuti ena gauna makawa.

Ia e dua tale ga na Esipeali e cavuti ena iVolatabu​—e dua vei ratou na luvena tagane o Tui Saula. (1 Vei. 8:33; 9:39) E kaya o Parofesa Yosef Garfinkel e dua vei ira na daukelikeli: “Na ka e talei kina ni yaca qo na Esipeali ni laurai ena iVolatabu, ia e laurai tale ga ena ka e kune ena vakekeli ni yaca qori e veidonui kei na gauna e veiliutaki kina o Tui Tevita.” Era nanuma eso ni yaca qori e baleta ga na gauna ya. Io, e vakadeitaki ni donu vinaka na ka e volai ena iVolatabu ena ka era vakadinadinataka na daukelikeli.

E cavuti ena iVolatabu na yaca Isiposeci me dusi Esipeali, sa mai sosomitaki “peali” na yaca “poseci.” (2 Sam. 2:10) Na vuna? Era vakamacalataka na daunivakadidike: “E sega ni cavuti ena II ni Samuela na yaca Esipeali ni tautauvata sara ga na yaca qori kei na yaca ni nodra kalou ni draki ca na kai Kenani o Peali, ia e maroroi na . . . yaca qori ena iVola na Veigauna.”