O Bau Kila?

Na cava na nodra itavi na dauniyau ena gauna vakaivolatabu?

ENA gauna vakaivolatabu, e dau lewa na dauniyau na nona vale e dua tale se nona qele. Na vosa vakaIperiu kei na vosa vaKirisi e vakadewataki me “dauniyau,” e rawa ni dusia na dauveiqaravi e vakaraica se lewa na vale.

Ni tu vakabobula e Ijipita o Josefa na luvei Jekope, e lesi me nona dauniyau na nona turaga. E “biuta” na nona turaga na “ka kece e taukena me qarava o Josefa.” (Vkte. 39:2-6) Toso na gauna, ni sa dua na iliuliu qaqa kei Ijipita o Josefa, e lesia e dua na dauniyau me lewa na nona vale.—Vkte. 44:4.

Ena gauna i Jisu, era tiko ena koro lelevu o ira na itaukeiniqele, sega ni vanua era dau teitei kina. Era lesia gona eso na dauniyau mera raica na itavi era qarava e veisiga na tamata cakacaka ena iteitei qori.

O cei e rawa ni qarava na itavi vakadauniyau? E kaya e dua na dauvolaivola ni Roma ena imatai ni senitiuri, ni dauveiqaravi e lesi me dauniyau se vakaraica na ka e taukeni, me “vulica me dau cakacaka vinaka.” Kena ibalebale me “raica nira qarava vinaka na itavi na tamata cakacaka, me kua ni voravora na nona lewa.” E kuria: “Qo tale ga na ka e namaki vua—me kua ni nanuma ni sa kila na ka kece, me tu vakarau ni vulica eso tale na ka.”

E vakayagataka na Vosa ni Kalou na ivakaraitaki ni dauniyau me dusia eso na itavi ena ivavakoso vaKarisito. Kena ivakaraitaki, e uqeti keda na lotu vaKarisito na yapositolo o Pita meda vakayagataka na taledi e solia na Kalou meda “veiqaravi me vaka [nida] dauniyau vinaka ni loloma soli wale ni Kalou.”—1 Pita 4:10.

E vakayagataka tale ga o Jisu na ivakaraitaki ni dauniyau ena vosa vakatautauvata ena Luke 16:1-8. Kena ikuri, ena dua na parofisai i Jisu me baleta na nona sa Tui, e vakadeitaka vei ira na nona imuri ni na lesia na “dauveiqaravi yalodina e vuku,” se “dauniyau yalodina.” Na nona ilesilesi bibi na dauniyau qori me vakarautaka tiko ga na kakana vakayalo me baleti ira na imuri i Karisito ena gauna ni icavacava. (Maciu 24:45-47; Luke 12:42) Eda marau gona nida vakayagataka na ka e vakarautaka na dauniyau yalodina e veiyasa i vuravura me vaqaqacotaka na noda vakabauta.