Tovolea e Dua na iWalewale e Rawarawa — Watchtower LAIBRI ENA INTERNET

Tovolea e Dua na iWalewale e Rawarawa

Na noda kauaitaki ira na tamata ena uqeti keda meda kila na ka era gadreva, da qai vakaraitaka vei ira ni Matanitu ni Kalou ga ena walia na leqa eda sotava tu nikua. (Fpai. 2:⁠4) E levu na dautukutuku era dikeva ni iwalewale e laulau oya na nodra sureta na itaukeinivale mera vakamacala ena iyaloyalo ni Parataisi ena noda ivola, me vaka na vakatutu e tuvani tu ena yasana imatau ni tabana oqo. E rawa nida vakayagataka na iwalewale oqo:

◼ “Cava beka nomuni nanuma, era na marautaka na vuvale kece na ituvaki totoka vaka oqo ena dua na siga?”

◼ “Eda vinakata kece mera marautaka na luveda na bula ena vuravura vaka oqo. Na cava beka e gadrevi me rawa ni yaco kina oqori?”

◼ “Oqo e vakaraitaka na ka ena yaco ni sa vakayacori na loma ni Kalou e vuravura me vaka ga e yaco tiko mai lomalagi. Oni raica beka e dua na ka e duidui mai na ka eda sotava tu nikua?”

◼ “Oni via bula ena ituvaki vaka oqo? [Waraka me sauma.] Ena rawa beka ni yaco ena noda itabagauna?”

Rogoca vinaka na ka e tukuna o itaukeinivale, qai taroga tale e dua se rua na taro mo kila kina na nona nanuma. Ke so era kaya nira sega ni via bula ena ituvaki vaka oqori, se ra sega ni vakabauta ni na yaco dina, kua ni totolo sara ni nanuma nira sega ni tataleitaki. Tarogi ira vakamatau se cava e vaka kina oya na nodra rai. Na ka era tukuna e rawa ni vakaraitaka na nodra kauaitaka vakabibi na leqa lelevu eda sotava tu na kawatamata.—⁠Isik. 9:⁠4.

Ni o sa kila na ka e kauai kina o itaukeinivale, moica na nomu ivakamacala me veiganiti. Vakamacalataka e dua na itukutuku ni Matanitu ni Kalou e tara sara ga na ka e gadreva. Vakamacalataka e dua se rua na tikinivolatabu e ganiti koya. (Raica na vakatutu ena yasana imatau.) Me raica sara ga o koya na ka e kaya na Vosa ni Kalou. Ke tataleitaki, solia na ivola qai vakaraitaka vua ni o na lesuvi koya. Lai tomana na veika drau a veitalanoataka ena veisiko sa oti.

[Kato ena tabana e 4]

E so na iYaloyalo ni Parataisi

iVola na Qasenivuli: tabana 251-4

iVola na Kila: tabana 4-5, 188-9

Brochure na Loma ni Kalou: tabana 11, 13

iVola na Qarava na Kalou: tabana 92-3

[Kato ena tabana e 4]

Na Veika era Kauaitaka na Tamata

Veidabui, veivakalaboci

Aisea 9:6, 7; 2 Pita 3:13

Basulawa, itovo voravora

Same 37:10, 11; Vosa Vakaibalebale 2:21, 22