E Gauna Vinaka Meda Vakalevutaka Noda Cakacaka ena Vula ni iVakananumi!
1. Na cava meda vakalevutaka kina na noda cakacaka vakaitalatala ena vula ni iVakananumi?
1 O rawa ni vakaitavi vakalevu ena cakacaka vakaitalatala ena vula ni iVakananumi sa roro mai qo? Eso na dautukutuku era na vakayagataka na nodra gauna ni livi se sereki. Tekivu ena 2 Epereli eda na vakaitavi ena cakacaka lavotaki ni nodra sureti na tataleitaki mera tiko ena iVakananumi ena 17 Epereli. Ni oti na iVakananumi, eda na saga meda vakabulabulataka na nodra tataleitaki o ira era a tiko ena siga oya, qai sureti ira tale ga ina vunau lavotaki ena vakayacori ena macawa ni 25 Epereli. E levu gona na vuna vinaka meda vakalevutaka kina na noda cakacaka vakaitalatala ena vula ni iVakananumi.
2. Na sala vinaka cava e rawa nida vakalevutaka kina na noda cakacaka vakaitalatala?
2 Painia Veivuke: E dua na sala vinaka meda vakalevutaka kina na noda cakacaka vakaitalatala na noda painia veivuke. Nida dau osooso kece ena vinakati meda lalawa vakailiu, veisautaka tale ga na noda ituvatuva meda painia kina. (Vkai. 21:5, NW) De dua eda rawa ni vakuai keda mai na so na ka eda dau cakava e veisiga e sega soti ni bibi. (Fpai. 1:9-11) Vakacava mo tukuna vei ira tale eso ena ivavakoso na nomu vinakata mo painia, de na uqeti ira tale ga mera painia veivuke?
3. Na cava e rawa ni tuvanaka na vuvale mera vakalevutaka kina na nodra cakacaka vakaitalatala?
3 Ena vinaka mo dou veivosakitaka ena yakavi ni nomudou Sokalou Vakavuvale tarava na nomudou isausau vakavuvale. (Vkai. 15:22) Ke dou veitokoni ena rawa ni painia eso na lewenivuvale ena dua na vula se sivia. Ia vakacava ke o vakadeitaka ni sega ni rawa ni yaco qori? E rawa ni tuvanaka na vuvale me ratou vakalevutaka nodratou cakacaka ni ratou vunau ena so na yakavi se ni ratou cakacaka vakabalavu ena muanimacawa.
4. Na veivakalougatataki cava o na vakila ni o vakalevutaka na nomu cakacaka vakaitalatala ena vula ni iVakananumi?
4 E kauaitaka o Jiova na ka kece eda cakava nida qaravi koya, e marautaka tale ga na noda vakuai keda. (Iper. 6:10) Na noda solika vei Jiova, vaka kina vei ira tale na so e dau vakavu marau. (1 Vei. 29:9; Caka. 20:35) O rawa ni vakalevutaka nomu cakacaka ena vula ni iVakananumi, o qai vakila kina na marau kei na veivakalougatataki?