iVola Mai na iLawalawa Dauvakatulewa

Vei Kemuni na Taci Keitou Lomani:

Na Tamada vakalomalagi o Jiova e vatuka sara ga ni loloma. E tukuna na iVolatabu: “Ni Kalou ga na loloma.” (1 Joni 4:8) E Kalou Kaukaua Duadua o Jiova, ia e sega vakadua ni tukuni ena nona Vosa, “Ni Kalou ga na kaukaua.” E yavutaka sara ga o Jiova na nona veiliutaki ena loloma. Qori e vakavolekati keda vua!

E marautaki ni o Jiova e sega ni vakasaurarataki keda meda qaravi koya. E sega ni dau veiliutaki vakasaurara. E vinakata meda qaravi koya nida lomani koya mai vu ni lomada. Nida cakava qori, eda sa vakaraitaka tiko nida vinakata na nona veiliutaki, nida vakabauta ni dodonu qai veiliutaki tale ga vakayalololoma. E vakadinadinataki qori ena itekitekivu ni bula ni kawatamata.

A sega ni vakasaurarataki Atama kei Ivi me rau talairawarawa vua, a solia ga vei rau na galala ni vakatulewa. Ke rau lomani koya dina, rau doka tale ga na ka e cakava ena vukudrau, erau na vorata na sasaga i Setani me rau talaidredre.

Ena dua na gauna e muri, a cavuta o Mosese ena nona vosa ni tatau vei ira na Isireli: “Raica, ka’u sa tauca e matamuni edaidai na bula kei na ka vinaka, na mate talega kei na ca.” (Vkru. 30:15) A soli vei ira na tamata na galala mera vakatulewataka na ivakarau ni bula mera muria. A tukuna tale ga o Josua vei ira na Isireli: “Kevaka sa ca vei kemuni mo ni qaravi Jiova, mo ni digitaki koya edaidai kemuni na qarava.” Sa ra qai tukuna na lewenivanua vei Josua: “Me yawa sara vei keimami me keimami laivi Jiova.” (Josua 24:​15, 16) E va tale ga qori na noda rai nikua. Nida lomani Jiova, e “yawa sara” noda via laivi koya.

Ena loma ni ivavakoso, eda kila vinaka na ka e okati ena galala ni vakatulewa. Era lesi na qase ni ivavakoso mera veivakasalataki se veivakadodonutaki sara, ia era na sega ni vakacolasau se lewai ira na mataveitacini se nodra vakabauta. E vola na yapositolo o Paula: “Keitou sega ni lewa na nomuni vakabauta, keitou nomuni itokani vakacakacaka ga moni marau kina, ni oni dei tiko ga ena vuku ni nomuni vakabauta.”​—2 Kor. 1:24.

Eda dau marau nida cakava e dua na ka mai vu ni lomada, eda sega ni vakasaurarataki kina! E vinakata o Jiova me yavutaki ena loloma na noda caka vinaka. E laurai ena vosa uqeti i Paula ni bibi qori: “Keu solia na ka kece au taukena mera vakani kina eso tale, au solia tale ga na noqu bula meu rogo kina ia e sega vei au na loloma, e sega sara ga ni yaga vei au.”​—1 Kor. 13:3.

Dua na ka na marau i Jiova, e vakalagilagi tale ga ni raica na noda qaravi koya na vica vata na milioni na mataveitacini nida lomani koya mai vu ni lomada!

O Jiova tale ga e lomani ira vakalevu na nona tamata, oni wili kina na gone kei na itabagone oni vakaraitaka na nomuni lomani koya, oni sega ni lomana na vuravura kei na kena marau. Moni kua ni guilecava ni keitou lomani kemuni tale ga vakalevu.​—Luke 12:​42, 43.

Ena yabaki sa oti, na nomuni lomani Jiova o kemuni raveitacini, qase kei na gone, oni vakayagataka kina e 1,748,697,447 na aua ena vunautaki ni itukutuku vinaka. Na loloma e uqeti kemuni na le 7,782,346 moni vakaitavi ena cakacaka vakaitalatala ena veiyasa i vuravura. Eda marautaka nira le 268,777 na ka vou, era vakaraitaka na nodra yalataki ira vei Jiova ena nodra papitaiso qai levu vei ira qori era itabagone. Na kena ivakatautauvata, era papitaiso e veimacawa e rauta ni le 5,168. Sa bau veiuqeti dina qori!

Ena iotioti ni veisiga qo, ena vinakati meda vosota na tamata ni Kalou e levu na leqa, ituvaki dredre, veitusaqati, tauvimate, eso era na vakila tale ga na tatara ni bula vaqase. Ia eda vakadeitaka nida na sega ni “suka tale” se “soro.” Keitou lomani kemuni kece vakalevu.​—Iper. 10:39; 2 Kor. 4:16.

Tacimuni,

iLawalawa Dauvakatulewa ni iVakadinadina i Jiova