iVakalasa ni Vale se Dau Vakadavedra?

DAUVOLAVOLA NI YADRA! MAI POLADI

E CICI voli e dua na turaga ena nona vakaukaua yago qai katilaki koya e dua na koli cudrucudru, ni tini mate sara ga kina. Dua na goneyalewa e vakamatei koya ga na nona koli loaloa levu. E dua na koli levu qai vakarerevaki, e sega ni kilai se o cei e taukena, e katilaka vakaca e dua na gone yabaki ciwa ni rau rai tu na nona itubutubu. Oqo e vica ga na ivakaraitaki ni leqa e yaco tiko e Poladi e vakavuna na koli era vakalasami e vale.

Me tarova na yaco ni leqa vaka oqo, e tiko ga na mataqali koli era vakatara e so na vakailesilesi me maroroi, me soli vata tale ga na kena ivola ni veivakadonui. Ia e kaya o Barbara Zaleska, e dua na lewe ni isoqosoqo na Polish Kennel Association, ni ivola ni veivakadonui e dodonu me baleta na itaukei ni koli, sega ni baleta na koli, “ni vakatau ga vua na kena itaukei na nona yaco e dua na koli me vakadomobula se manoa, veitalia se mataqali koli vakacava.”

Ia, e so na koli era vakavulici ga mera veivakamatei. Vei ira na vakavulica na koli vaka oqo, e tukuni ni iwalewale era vakayagataka e okati kina na nona laumoku na koli, vakuai me kua ni kana, qai tiki tale ga ni nona vuli me basuraka e dua na matakau me vaka sara ga ni sa veivakamatei tiko. Sega ni yaco ga e kea, ena biu me vala kei ira na koli malumalumu sa macala nira na mate ga. Ni sa vakavulici oti sa na rawa ni lai vakacurumi ena vakavala koli, e dua na ka era taleitaka na dau veimauilavo kei ira na dau sarava na qito e dave kina na dra.

Ia e matata na ka e kaya na iVolatabu ena rai ni Kalou me baleta na nodra vakalolomataki na manumanu. E kaya: “Na tamata yalododonu sa maroroya na bula ni nona manumanu: ia na nodra yalololoma na tamata ca na lomaqa.” (Vosa Vakaibalebale 12:10) Me vakadonui keda gona na Kalou, me kua nida vakalolomataki ira na manumanu. Eda marau nira na sega tale vakadua ni vakavulici na manumanu mera vakadavedra, me ka ni qito se cava tale, ena vuravura vou ni Kalou.​—Same 37:9-11.