iTubutubu Le Dua, ia e Sega ni Tu Duadua

“Au taleitaka duadua ena noqu veiqaravi vakatina na nodrau dau lesu mai vale na luvequ me rau tukuna ni rau lomani au, rau mokoti au sara.”​—DORIS, ITUBUTUBU LE DUA, E RUA NA LUVENA.

E VAKATAUDEITAKI ira na itubutubu le dua na ka e kaya na iVolatabu: “Na gone era sa nonai solisoli na Kalou.” (Same 127:3) O koya gona, ke mani susu na gone ena vuvale itubutubu le dua, e se talei ga vua na Kalou. E vinakata tale ga na noda Dauveibuli me na tini vinaka na veisusu ena vuvale itubutubu le dua. Kaya kina me baleti koya na Dauveibuli na iVolatabu: “Sa vakabulai ira tiko era sega ni vakatamani kei na yada.” (Same 146:9) Mera nuidei gona na itubutubu le dua ni tu vakarau na Kalou me tokoni ira.

Sa dodonu ga me lomani, me taqomaki na gone qai maravu na ituvaki e susugi kina me rawa ni taucoko na nona tubucake, vakayago, vakayalo, me vakavinakataka tale ga na ivakarau ni lomana. E itavi dokai ni itubutubu yadua na nona vakayagataki koya na Kalou me veisusu.

Ia me tauci na vua ni veisusu, era vakadinata e levu na itubutubu le dua ni na vinakati na masu vagumatua, bulataki ni ivakavuvuli ni iVolatabu kei na vakararavi vakatabakidua vei Jiova. Oqo e salavata kei na veivakadreti ni Same 55:22: “Mo biuta vei Jiova na nomui colacola bibi, ena tokoni iko ko koya.”

Sa macala ni na drakidrakita ena so na gauna na bula ena vuvale itubutubu le dua, de na gadrevi beka e kea na nodrau veivuke o Tutu kei Bubu, se nodra veivuke na qase se so na itubutubu matua ena ivavakoso lotu Vakarisito. Ia, e dina nira tu vakarau na wekadra se o ira na nodra itokani vakabauta mera vukea na itubutubu le dua, e sega ni vakabekataki ni itavi ni veisusu e vakataqara na Kalou vua sara ga na itubutubu.a

E dina ni dredre na veisusu vua na itubutubu le dua, ia e ka marautaki ni levu era rawata vinaka na nodra itavi, nira yaco na luvedra mera tamata nuitaki, ra vakaitovo ra qai rerevaka na Kalou. E vakatarogi ira e so vaka oqo na Yadra! Koto oqo e so na ivalavala e laurai nira a vakamuria kece.

• iTuvatuva matau. Na itubutubu le dua e yaco me tauca na vua ni nona buno, e tuvana vakamatau na veika ena nona bula qai saga matua me cakacaka ena loma ni ituvatuva oya. Bibi e ke na lalawa kei na ituvatuva matau. E kaya na iVolatabu: “A nanuma ni lomana [se, “nona lalawa,” NW] na dautara ka sa vakauta ga ki na sautu.”​—Vosa Vakaibalebale 21:5.

• Dina ina nona itavi. Na itubutubu le dua e yaco me tauca na vua ni nona buno, e vakaliuca na bula ni nona vuvale. Ena dau bibi vua me biuta e liu na nodra gagadre na luvena, sega ni ka e gadreva ga o koya.​—1 Timoci 5:8.

• Rai vakayalomatua. Na itubutubu le dua e yaco me tauca na vua ni nona buno, e sega ni vakalailaina se vakalevutaka na leqa; e qara ga na kena iwali. E ciqoma na ituvaki dredre e sotava, e sega ni yalocataka se vakalomalomani koya, e saga sara ena nona igu me vosota.

• Dau veivosaki. Na itubutubu le dua e yaco me tauca na vua ni nona buno, e dau uqeta na veivosaki. E uqeta na veivosaki vakadodonu ena nona vuvale, mera talaucaka na luvena na lomadra kei na nodra vakanananu. Kaya e dua na tama itubutubu le dua me baleti iratou na luvena: “Au dau veivosaki vakalevu kei iratou. Gauna marautaki vei keitou ni keitou dau vakasaqara toka na ivakayakavi. Eratou dau tukutuku vei au ena gauna vaka oya.”

• Kua ni vakaweleweletaka na nomu bula vakataki iko. E dina ni osooso na nona bula e dua na itubutubu le dua, ia vei ira na sa tauca na vua ni nodra buno era kila ni bibi me kua ni weletaki na nodra bula vakataki ira, vakayalo, vakayago, me yadravi tale ga na ituvaki ni lomadra. Kaya o Ethel, e dua na itubutubu le dua sa veisere ia e rua na luvena: “Au dau saga meu tikica e dua na gauna me noqu ga. Me kena ivakaraitaki, ni vakavulici rau na gone ena ivakatagi e dua na noqu itokani, oya e solia vei au e dua taucoko na aua. Boko sara ga na retioyaloyalo au mai dabe vakanomodi yani.”

• Rai donu. Na itubutubu le dua e yaco me tauca na vua ni nona buno, e dau saga me dodonu na nona rai me baleta na bula, kei na nona itavi ni veisusu. Ke codrocodroa sara mada ga na bula, ena saga ga me dau raica na yasana vinaka. Vaka sara ga oqo na nona rai e dua na tina itubutubu le dua, ni kaya: “Au sa qai kila ni sega ni dodonu me yalolailai e dua baleta ga ni itubutubu le dua.”

Tauci na Vua ni Buno

E yaga beka na ivalavala era cavuti oqo? Io, nira tauca kina na vua ni nodra buno e levu na itubutubu le dua. O Gloria, e dua na tina mai Igiladi e cakacaka saumi tiko ia sa veisere, a susuga vinaka e rua na luvena tagane, dua na luvena yalewa. Ratou yaco tolutolu na luvena me ratou lotu Vakarisito cakacaka vakaitalatala vakatabakidua, ratou solia na nodratou bula ena kena vakabulabulataki na vulici ni iVolatabu. Ni tarogi o Gloria se rawata vakacava oya, e kaya: “Na imatai ni ka ni bolebole na neitou vuli iVolatabu vakavuvale, me taleitaki qai wasomataki. Au vinakata me ratou marau, lomavakacegu, qai taqomaki na luvequ me ratou kua ni butusevata na nodratou ilakolako. Au mani cakacaka kina ena bogi. Noqu inaki me ratou tiko e tikiqu na luvequ ena gauna kece e rawa. Ni bera niu lako i cakacaka, keitou dau masu i liu vakaveiluveni meu vakamoceri iratou rawa, qai mei iratou tiko mai o tinaqu lailai.”

A vukei iratou vakacava na luvena o Gloria me ratou kila na ka bibi me ratou vakaliuca? A tomana ena nona kaya: “Na noqu inakinaki levu duadua meu vakaliuca na veika vakayalo. A lailai na neitou ilavo, ia au vakaraitaka vakadodonu oqo vei iratou na gone. Na ka kece au kerea me ratou cakava, au na cakava tale ga, au raica ni ratou dau veitokoni sara vakavinaka.” Ni nanuma lesu na sala eratou a veivolekati kina vakaveiluveni, e kaya o Gloria: “Na kena usutu na cakacaka vata vakavuvale. E sega ni dua vei keitou e dau lai sogobutu toka ga ena nona rumu. Keitou dau vakasaqa, sasamaki, ukutaka vata na neitou vale. Dau veiraurau na veika keitou cakava. Au dau saga me tiko tale ga na gauna ni qito.”

O Carolyn, na itubutubu le dua e tina ni gonetagane lailai o Joseph, e marautaka na nona tubucake tiko me gone vinaka o Joseph. E rawata vakacava oqo? Kaya o Carolyn: “Keirau dau wili iVolatabu vata ni vakarau moce, au dau qai taroga vua se cava e vulica kina. Kuria oya, neirau dau veivosakitaka e so na parakaravu e veiganiti mai na ivolatabaki vakaivolatabu me keirau tovolea me keirau cakacaka kina. Dau vukei Joseph sara vakalevu oqo ke sotava e so na leqa, me vaka na nodra veisagai na gone mai koronivuli.” Vakadinata o Carolyn ni sega ni rawarawa na nona bula, ia e kila tale ga ni sega ni tu duadua. E kaya: “E ka ni sasaga, ia au vakila na nona vukei au o Jiova. Au vakayaloqaqataki vakalevu tale ga mai na ivavakoso vakarisito.”

Na nodra tauca na vua ni nodra buno e vica vata na udolu na itubutubu le dua me vakataki Gloria kei Carolyn, e vakadinadinataka ni o ira na itubutubu edaidai e rawa nira vakayagataka na ivakavuvuli ni iVolatabu sa vakilai tu mai ena veitabagauna na kena yaga, me dusimaki ira mera yaco na luvedra mera gone vinaka, ra qai kaukaua vakayalo. (Vosa Vakaibalebale 22:6) Io, e rawa nira tamata yaco na luvemu! Na veisusu taudua ena sotavi kina e levu sara na ka ni bolebole, ia e rawa ni dolava na sala mo dou veivukei, dou qai tubu vata kina vakaveiluveni. Ke da vakararavi vakatabakidua vua na Kalou da qai nuidei ni na vukei keda, oqo na sala vinaka duadua ena colata rawa kina na nona ivua na itubutubu le dua.​—Same 121:1-3.

[iVakamacala e ra]

[iYaloyalo ena tabana e 29]

A vukei iratou na luve i Gloria me ratou italatala vakarisito vakatabakidua na nodratou dau vuli iVolatabu vakavuvale. Eratou raica tiko oqo na nona ivola, kei na itaba ni luvena tagane qase sa daukaulotu tiko

[iYaloyalo ena tabana e 30]

O Carolyn kei na luvena o Joseph