Na Rai ni iVolatabu

Ena Raibaleta Beka na Kalou Noda Malumalumu?

‘Au sega ni tamata ca! Au dau saga vakaukaua meu muduka na noqu ivalavala ca, ia sa lewai au tu na noqu malumalumu!’

E VAKA beka oqo na nomu rai, se na nona rai e dua o kila? E vuqa era vakabauta ni rairai na sega ni rawa me cavuraki laivi na malumalumu e sa vakawakana tu. So e sa nodra bula sara tu ga na kena vakayagataki na yaqona ni valagi, se yaqona ni viti, tavako, se wainimate gaga. So e lewa tu na nodra bula na kocokoco. E tiko tale ga e so e lewai ira tu na ivalavala vakasisila, era kaya nira bobula kina.

Na Maciu 26:41, e vakaraitaka ni kila vinaka tu o Jisu na noda malumalumu na kawatamata.a E vakamatatataki ena iVolatabu taucoko ni Kalou o Jiova kei Jisu erau dau yalololoma vua na tamata. (Same 103:8, 9) Ia eda namaka beka me raibaleta na Kalou na noda malumalumu kece?

O Mosese kei Tevita

Dikeva mada na ivakaraitaki i Mosese. A kilai o koya me “uasivi e na yalomalumalumu, vei ira na tamata kecega sa tiko e vuravura,” qai saga me vakaitovotaka tiko ga na ivalavala vinaka oya. (Tiko Voli mai na Lekutu 12:3) Nira lako voli na Isireli ena vanualiwa, vakavuqa era dau sega ni vakavinavinaka ra qai sega ni doka na Kalou kei ira era matataki koya. Ena ituvaki kece oqori, a vakamalumalumutaki koya o Mosese, qai qara ga na nona veidusimaki na Kalou.—Tiko Voli mai na Lekutu 16:12-14, 28-30.

Ia ni sa voleka sara tu ga ni mai cava na ilakolako balavu qai veivakaocai oya, a vakaraitaka o Mosese nona cudru ena matadra na Isireli kece qai beca tale ga na ivakaro ni Kalou. A vosoti koya, ia a raibaleta beka na Kalou na nona malumalumu? Sega. A kaya vei Mosese: ‘Ni o a sega ni vakabauti au, o na sega kina ni kauta na isoqosoqo oqo ina vanua ka’u sa solia vei ira.’ A sega ni yacova na Vanua Yalataki o Mosese. Sivi e 40 na yabaki na nona vosota voli mai me na rawata na veivakalougatataki oya, ia a qai sega wale ga ni yacova ena vuku ni nona malumalumu.​—Tiko Voli mai na Lekutu 20:7-12.

O Tui Tevita tale ga e dua na tamata ni Kalou a vakaleqai ena vuku ni nona malumalumu. Ena dua na gauna a rawai koya na nona gagadre ca qai lai tini veiyacovi sara kei na dua na yalewa vakawati. A qai bukiveretaka na nona vakamatei na wati yalewa. (2 Samuela 11:2-27) E muri, a qai veivutunitaka dina na nona ivalavala ca, qai vosoti koya na Kalou. A vakacacana o Tevita e dua na bula vakavuvale, a sega tale ga ni taqomaki koya o Jiova mai na nona sotava na kena ca. A yaco me tauvimate levu na luvena tagane lailai. Dina ni a kere veivuke o Tevita vei Jiova ena masu, ia a sega ni vukei. A mate na gone, qai yaco veitaravi na leqa ena nona vuvale. (2 Samuela 12:13-18; 18:33) A sauti Tevita na ca ni nona rawai ena vuku ni nona malumalumu.

Ena rua na ivakaraitaki oqo e laurai nida na saumitaro vua na Kalou ena vuku ni noda ivalavala. O ira gona era vinakata mera qarava na Kalou, e dodonu mera vakavinakataka na vanua era malumalumu kina vakayalo mera lotu Vakarisito vinaka cake. E vuqa era a cakava vaka kina ena imatai ni senitiuri.

Valuti na iValavala Ca

E rawa ni kainaki ni ivakaraitaki vinaka na yapositolo o Paula ina nona bula e dua na lotu Vakarisito. Ia, o kila beka ni a gadrevi tale ga vua me valuta tiko ga na nona malumalumu? A vakamacalataki vakavinaka na ivalu oqo ena Roma 7:18-25, se, me vaka e tukuni ena tikina e 23, na “veivala.” A sega ni soro kina o Paula, e kila ni na kaukaua tiko ga na idre ni ivalavala ca.​—1 Korinica 9:26, 27.

E so na lewe ni ivavakoso ni lotu Vakarisito mai Korinica makawa e sa dau nodra ivalavala ga mera cakacala. Na iVolatabu e kaya nira ‘daudara, dauyalewa, veimoceri vakatagane, daubutako, daukocokoco, daumateni.’ Ia e kaya tale ga nira “sa sili.” (1 Korinica 6:9-11) Ena sala cava? A vukei ira na kilaka dodonu, nodra veimaliwai kei na tacidra vakayalo, kei na yalo ni Kalou mera muduka kina na nodra ivalavala ca. Yaco me vakadonui ira na Kalou ena vuku ni yaca i Karisito. Io, a vosoti ira na Kalou, solia gona kina vei ira na lewaeloma e savasava.​—Cakacaka 2:38; 3:19.

A sega ni raica vakamamada o Paula kei ira na lotu Vakarisito mai Korinica na nodra gagadre cala. Era vorata, ra qai qaqa ni vukei ira kina na Kalou. Dina nira bula voli na dausokalou ena imatai ni senitiuri ena vanua e torosobu na kena itovo qai galeleti kina na veika ca, ia era vakacaucautaki ga ena vuku ni nodra itovo savasava. Vakacava o keda?

Namaka na Kalou Meda Valuta Noda Malumalumu

Nida valuta na noda malumalumu e sega ni kena ibalebale nida na kauta tani vakadua. Eda na sega beka ni soro ina noda malumalumu, ia eda na sega tale ga ni vakawabokotaka rawa. Nida sega ni uasivi, oqo na ka e rawa ni vakadredretaka na noda valuta e so na noda malumalumu. Ia, eda na sega ga ni soro. (Same 119:11) Na cava e rui bibi kina?

Baleta na Kalou e sega ni vakatara me ulubale ni noda dau cakaca na noda sega ni uasivi. (Juta 4) E vinakata vei keda o Jiova meda muria na ivakarau ni bula savasava. E kaya na iVolatabu: “Mo dou cata sara na ka ca; mo dou kabita sara na ka vinaka.” (Roma 12:9) Cava e vaka kina oqo na rai ni Kalou?

Dua na vuna, oya ni rawa ni veivakaleqai na noda laiva me rawai keda na noda malumalumu. Ni kaya na Kalatia 6:7: “Na ka kecega sa kaburaka na tamata ena tamusuka talega ko ya.” Levu na gauna era dau sotava na bula rarawataki dina o ira era vakalaiva me rawai ira na itovo era dau bobula kina, kocokoco, kei na veiyacovi vakaveitalia. Ia e se tiko tale e dua na vuna bibi.

Na ivalavala ca e dau vakacudruya na Kalou. E “tawasei” keda mai vei Jiova. (Aisea 59:2) Me vaka ni sega ni vakadonui ira era vakayacora tiko ga na ivalavala ca, e vaka oqo na nona veivakaroti vei ira: “Dou vui kemudou, vakasavasavataki kemudou; . . . dou kua ni caka ca.”​—Aisea 1:16.

E dau yalololoma na noda Dauveibuli. “Ni sa sega ni vinakata me rusa e dua, me yacova ga na veivutuni ko ira kecega na tamata.” (2 Pita 3:9) Ke da dau vakalaiva me rawai keda na noda malumalumu, ena sega ni vakadonui keda na Kalou. Ni sega ni dau raibaleta na Kalou na noda malumalumu, me kua gona nida vakalecalecava.

[iVakamacala e ra]