Vakavatukanataki na Loloma—Ena Vakacoko Vakaitamera
E LEVU na ka e sega ni dau tarai Richard Vara, e dua e buta vinaka tu ena nona cakacaka vakaedita ni Houston Chronicle. Ia, ena yabaki sa oti e dua na ka a vakadrukai koya. “Au sa qai raica vakadua!” e kaya ena qoroqoro. “Au sega sara ga ni vakabauta.” Duavata tale ga kei koya o Lee P. Brown, na turaganikoro kei Houston, e Texas, mai Mereke. E kaya: “Au diva ga mera raica kece na lewe i Houston na ka oni sa rawata. Sa veivakadrukai dina.” Na cava erau vakaibalebaletaka na turaga oqo? Na sasaga ni vakacoko era cakava na iVakadinadina i Jiova e Houston. Na cava soti e okati kina? Na cava a vakavuna, kei na cava sa rui veivakadrukai kina? Meda kila, da tekivu sara mada mai na kena itekitekivu.
Na Waluvu Ca Duadua
Ena itekitekivu ni vula o June 2001, a ravuta na vanua tautauvata ena tokalau ceva kei Texas na cagilaba kaukaua o Allison. A salavata mai kei na uca vakaitamera. Ena loma tiko ga ni dua na siga, ena Vakaraubuka, 8 June, a dua na mita taucoko na levu ni wai sa luvuci Houston—na ikava ni korolevu duadua e Mereke.a Sega ni bera na luvu ni veisitoa, valenivolavola kei na vica vata na udolu na vale. E coka na dobui ena veitolonisala ni motoka ena korolevu oqo, ra luvu kina na motoka kei na lori lelevu. Ni sa rui cere na wai, e dredre mada ga ina lori ni bokobuka kei na so tale na lori era vakayagataki ena veivakaleleci mera takosova e so na sala sa luvu tu. Sa ra qai vakayagataki na elikoputa kei na lori ni mataivalu.
Sa draki vinaka tale ena Moniti, 11 June, ia e matata ni dua na ravuravu levu sa biuta no mai o Allison. Era mate e lewe 22, okati kina e lewe rua na iVakadinadina i Jiova: o Jeffrey Green, e dua na qase lotu Vakarisito kei na nona daku o Frieda Willis.b Kuria, e rauta ni 70,000 na vale era vakacacani ena waluvu, e rawa ni tukuni ni oqo na leqa tubukoso e ca duadua me tara e dua na korolevu. Ni isau vakailavo ni vakacaca i Allison e volekata na $5 na bilioni, na cagilaba oqo e levu duadua na ka e vakacaraka ena ivolatukutuku kei Mereke.
Era Tasoro Mai na Bolecakacaka
Ra sega ni vakabauta na lewenivanua na ka sa yaco. Kaya kina e dua na dauveivuke: “E suasua na nodra idavodavo. E suasua na nodra ibe ni fuloa. Ra qai kuitaki na nodra iyaya vakamareqeti.” E levu tale ga vei ira na rauta na 16,000 vakacaca na iVakadinadina i Jiova era vakaitikotiko e Houston, e vakacacani na veika era taukena. Okati tale ga kina e walu na Kingdom Hall kei na vica vata na drau na vale. So na vale e vica na sedimita na cere ni wai e luvu kina; e so tale e yacova sara ga na delavuvu na cere ni wai. Rauta gona ni sivia e 80 na ivavakoso ni iVakadinadina i Jiova e tarai ira na vakacaca ni cagilaba. Ia, e sega nira biu wale na vakaleqai oqo. Ena loma ga ni vica na siga era sa tasoro mai na bolecakacaka mera mai veivukei. A rawa vakacava oya?
Ni se bera mada ga ni lutu na wai ni waluvu, era sa tekivu yavala na qase ni ivavakoso vakarisito ni iVakadinadina i Jiova e Houston. Kaya e dua na qase: “Keimami talevoni vei ira na mataveitacini, qai sikovi ira sara ga e vale me kilai kina na levu ni vakacaca sa yaco. Me qai Moniti, 11 June, sa volai oti tu na kedra levu era na vinakata na veivuke, iwiliwili ni vale e vakacacani kei na levu ni ka e vakacacani kina. A vakau sara ina itikotiko liu ni iVakadinadina i Jiova e Brooklyn, mai Niu Yoka.” Ni oti ga e vica na siga, sa vakaduria sara e dua na komiti ni vakacoko na valenivolavola ni tabana ni iVakadinadina i Jiova mai Mereke. Ratou lesi e walu na qase ni ivavakoso e Houston me ratou lewe ni komiti, qai soli tale ga vei iratou na ilavo qaqa me ratou cicivaka kina na sasaga ni vakacoko. Na cava soti e okati ena nodratou ilesilesi? Sega wale ga ni namaki me na vakavinakataki na nodra vale na iVakadinadina—e sivia e 700 era vakacacani—me ratou saga tale ga mera vakacegui na yalorarawa!
‘Me caka beka vakacava na itavi vakaitamera oqo?’ eratou veinanuyaka na lewe ni komiti vou oqo e vakatokai na Komiti ni Vakacoko ni iVakadinadina i Jiova e Houston 2001. Dau yacova na bogilevu na nodratou cakacakataka toka na ituvatuva me muri, ratou sa qai kerea na nodra veivuke e sivia na 160 na ivavakoso ni iVakadinadina e Houston raraba. “E bera ga na neitou kerekere yani,” e kaya na jeameni ni komiti. “Sivia e 11,000 na iVakadinadina era bole mera solia na nodra gauna kei na nodra kila, mera veivuke e sega ni saumi.”
Bera ga na Tubu ni Vukoa ena Kedra Levu na Bolecakacaka
Ni lutu ga na wai ni waluvu era sa tekivu yavala na bolecakacaka ena lomanivale era vakacacani. Era cecega na ibenivalagi lubetu kei na ka kece e vakadukara na deniwaluvu, ra basuka na fuloa, lalaga, kovate era curumiwai kei na katuba sa vakalakala tu. “E sega ni keimami kauaitaka ga na vakavinakataki ni nodra vale na mataveitacini,” kaya e dua na bolecakacaka, “keimami qarauna tale ga me kua ni veidewavi na mate.” E vinakati gona me vakawainimatetaki rawa na lomanivale, ni sega ni dede sa na tekivu tauvi vukoa na lalaga kei na lomanikovate.
Me rawa nira kila na vakawainimatetaki vinaka ni lomanivale, era kerea e so na iVakadinadina mera lai vulica na kena icakacaka ena Federal Emergency Management Agency (FEMA), e dua na tabana ni matanitu e dauveiqaravi ni yaco na leqa tubukoso. Ni oti oya, sa qai nodra itavi yadua na vuli oti mera vakatavulica e lewe yatini na bolecakacaka, ena nodra kauti ira sara ga ina vale e vakacacani mera lai raica na kena vakawainimatetaki. Ia, ena siga e tarava sa na nodra itavi na lewe tini era se qai vakavulici ga mera lai vakavulica e lewe yatini tale. Kaya kina e dua vei ira na bolecakacaka: “Ena loma ga ni vica na siga, sa ra lewe vica vata na drau era sa kila na icakacaka ni vakawainimatetaki ni vale.” Ni bera ga na tubu ni vukoa ena kedra levu na bolecakacaka! O ira sa cegu mai na nodra cakacaka saumi kei ira na itabagone era sereki tu ena vuli, e nodra itavi na cakacaka ena siga, ena bogi sa tu o ira mera lai tomana na itavi. Ena loma ga ni ono na macawa, sa savasava vuka tale tu qai vakawainimatetaki oti na vale kece ni iVakadinadina i Jiova era a vakacacani.
Dua ga na iTikotiko Liu, Vitu na Tabana Lalai
A volia na komiti ni vakacoko e dua na ibinibini kauvaro levu kei na iyaya ni taravale. Ia, era na maroroi beka e vei? E kaya e dua vei iratou na lewe ni komiti: “Ni rogoca na manidia ni dua na kabani na neitou leqa, e sega ni bera na nona solia wale na valeniyaya ni nona kabani—e rauta ni 5,000 na mita vakarivirivi na kena levu!” Mani maroroi rawa kina na iyaya ni taravale, ia a vakayagataki tale ga e dua na tutuna me valenivolavola. Sa vakadeitaki sara me sa liutaki mai e kea na cicivaki ni sasaga ni vakacoko, ra qai cakacaka kina e rauta ni 200 ina 300 na bolecakacaka ena siga, bogi kei na muanimacawa.
Ni veiyawaki na yasana era veituyaki kina na vale era vakacacani, mani nakiti me vakaduri na tabana lalai ena vitu na Kingdom Hall, me wasewasei kina na yasayasa me ratou dui qarava. Ra bula na bolecakacaka ena tabana lalai kece oqo ena veimuanimacawa. (Yalovinaka, raica na kato “Bula na Cakacaka ena Veitabana Lalai.”) Levu vei ira na bolecakacaka oqo era sa cakacaka vata oti ena tara ni Kingdom Hall ena yasayasa oya. Ni levu mada ga na matai era bolecakacaka era lewe ni 11 vakadua na Komiti ni Taravale e Arkansas, Louisiana, Oklahoma, kei Texas.c Ena veitabana lalai yadua, e nodra itavi na vakaivola ena taravale, boroboro, dausema paipo, kei na cakacaka tale e so mera vakavulici ira na kena vo ni bolecakacaka.—Yalovinaka, raica na kato “Porokaramu ni Vuli Cakacaka.”
iTuvatuva kei na Tugatugani ena Kompiuta
Era muria na bolecakacaka e dua na ituvatuva ni taravale e vitu na kena ikalawa. Na ikaukau iyaya me baleta na vale yadua e tara e va na kena isobusobu, qai tolu ga na muanimacawa e tikici me vakavinakataki se tara vakaoti kina. Ena sala oya, ena vakacavari vinaka kina na sasaga ni vakacoko ena loma ga ni ono na vula.
Me rawa ni sauvi na isausau, e vakaduria na komiti e 22 na taba ni cakacaka, okati kina na tabana e qarava na nodra vakavaletaki na bolecakacaka, voli ni iyaya kei na kena vakavodoki. Ia, e veivuke ena tabana yadua na itukutuku matailalai era tugana ina kompiuta na bolecakacaka. Ni bera ni tekivu na vakavinakataki ni vale, e tini na siga na nodra tugana tiko na bolecakacaka na itukutuku oya ena kompiuta. “Sa dua na tugatugani,” e kaya e dua na niusiveva. Ni qai cava na tini na siga, sa dua na ibinibini itukutuku levu sa tugani rawa. Kena ibalebale, ni sega ni bera ga na kena rawa ni laurai ena kompiuta na gauna era dui galala kina na lewe 11,000 na bolecakacaka mera mai cakacaka, na cakacaka era dui matai kina, kei na sala ni veitaratara kei ira. E totolo wale tale ga na kena rawa ni laurai na cakacaka se vo ena vale era vakavinakataki tiko, ke gadrevi se sega na ivola ni veivakadonui ni taravale, kei na itukutuku matailalai kece me baleti ira na vale era vakacacani. Sa bau yaga dina na itukutuku tugani oqo, ni vakatokai sara ga me “itini ni sasaga ni vakacoko.”
Ra Vakadrukai, Ra Marau
Ni sa sega ni tubu tale na vukoa qai mamaca na lomanivale, sa qai nodra itavi na kenadau ni vakavinakataki lomanivale mera lai cakacakataka na levu ni ka ena vinakati me baleta na nodra cakacaka. “Era cakacakataka sara mada ga na levu ni ivako ena vinakati,” e kaya e dua a gusudra tiko. “E qarauni matua me kua ni vakamaumautaki na ilavo se iyaya e cautaki.” Ena gauna vata oya, era lai saga mai e so tale na bolecakacaka na ivolatara ni veivakadonui ni vakavinakataki vale mai vei ira na kena vakailesilesi vakamatanitu.
Oti oya era sa qai sureti na vuvale e vakacacani na nodra vale mera gole ina itikotiko liu ni komiti, mera lai digidigi mai na vica na mataqali ibenivalagi, kovate kei na iyaya tale e so e tu kina me isosomi ni nodra iyaya sa ca. Era vakadrukai na vakaleqai ena levu ni ka e vakarautaki vei ira, e levu e tuturu sara ga kina na wainimatadra. Ra bau soli ivakasala tale ga na bolecakacaka era kenadau ni inisua kei ira na kila na veika e dau lavaka na matanitu ena cakacaka vaka oqo. Sa qai tuvai na tikinisiga me vakavinakataki kina na veivale yadua, qai nodra itavi na bolecakacaka era vakalori mera talaca na iyaya ena siga sara ga e gadrevi kina. E dua na turaga e sega ni iVakadinadina i Jiova, e kaya vua na watina iVakadinadina: “Au sa drukataki ira dina na nomu lotu. Ni qai oti ga na nodra itavi e dua na ilawalawa, sega ni bera na nodra sa vakarau tu na ilawalawa e tarava. Era vaka ga na qasikalolo!”
E cakacakataki me taura e tolu na muanimacawa me vakavinakataki kina e dua na vale. “Ia e so na gauna e rawa ni lima se walu na muanimacawa,” e kaya na jeameni ni komiti. Ni levu na gauna era dau raica na bolecakacaka ni na vinakati me veisautaki sara ga na lalaga ni vale. Kaya e dua na matai: “So tale na gauna sa dau kania tu na duru ni lalaga na nuve, kena ibalebale ni keimami na saga taumada mera vakamatei. Vakavuqa gona me keimami tekivu sara ga ena vakavinakataki ni duru ni lalaga. Ni qai lai oti e dua na vale, sa taucoko vakaoti sara tu ga.” E dua vei ira a vakavinakataki na nona vale e gusudra kece na kena vo, ni kaya vua e dua na turaga a sikovi koya yani: “E veisivi sara na ituvaki ni noqu vale ena gauna oqo, niu vakatauvatana kei na ituvaki au volia kina!”
Totolo na Vakarau Kakana
Era veisautaka e dua na ilawalawa bolecakacaka e dua na vale ni maroroi iyaya e sema toka ina dua vei ira na Kingdom Hall, me caka kina na vakasaqa, me qai veikauyaki na kakana ina vanua kece ni cakacaka. Ra solia vakailoloma yani kina na iVakadinadina i Jiova e Mereke taucoko na katoniwaililiwa, misini ni sava iyaya, sitovu, kei na iyaya tale e so ni vakasaqa. Ena veisiga Vakarauwai kei na Sigatabu, eratou lewe 11 na daunivakasaqa, qai rauta e lewe 200 tale mera veivuke ena vakarautaki kei na vakabutari ni kakana me rauti ira na vica vata na udolu na bolecakacaka. Kaya na tacida tagane a liutaka na tabana oqo: “Sa rauta ni 19 na yabaki na dede ni neimami vakaitavi ena vakarautaki kakana ni dau caka na tarataravaki ni Kingdom Hall, ia na kena oqo sa qai levu duadua.”
Ni sa vakarautaki oti na kakana, ena tawa ena 120 taucoko na kena itawatawa lelevu. Sa qai vakavodoki ina 60 na lori era dau tu vakawawa mera usa kakana, e dua na iwase ena lai vakasoburi ina itikotiko liu, na kena vo ina tabana lalai kece. Ia, mai na veivale kece e vakacagau tiko kina na cakacaka, e dau talai e dua na bolecakacaka me lai kauta mai na kedra na nona ilawalawa cakacaka ina tabana lailai sa lesi tu me lako kina. Nira kana ga ena vanua ni nodra cakacaka, e totolo kina na tekivu tale ni nodra itavi nira kana oti.
Vakacavari Vinaka na iTavi!
Ena Epereli 2002, sa ra qai vakaotia kina na lewe 11,700 na bolecakacaka na cakacaka ni vakacoko balavu duadua era se qai bau vakaitavi kina na iVakadinadina i Jiova. E rauta ni 1,000,000 taucoko na aua era vakayagataka na bolecakacaka ena vakavinakataki se taravaki vou tale ni 8 na Kingdom Hall kei na 723 na vale. E tuturu na wainimatana e dua vei ira na vakaleqai, e gusudra tale ga na kena vo, ena nona kaya ena vakavinavinaka: “Au vakamuduotaki Jiova, kei ira na bolecakacaka ena cakacaka levu ni veivuke era sa cakava. Sa veivakacegui dina nida lewe ni dua na mataveitacini dau veilomani vaka oqo!”
[iVakamacala e ra]
a O Niu Yoka, Los Angeles, kei Chicago, e levu cake kina na iwiliwili ni lewenivanua. Rauta na 3,500,000 na lewe i Houston, e levu cake vei Lepanoni mai na Tokalou e Loma.
b E rauta nira lewe 1,300 na itokani i Jeffrey kei Frieda era a soqo vata ena vunau ni nodrau veibulu. A veivakacegui sara vakalevu vei Abigail, na lewenivale i Jeffrey, e tuaka i Frieda tale ga.
c Na Komiti ni Taravale e dau qarava na tara ni nodra veivalenisoqo na iVakadinadina i Jiova.
[Kato/iYaloyalo ena tabana e 23]
BULA NA CAKACAKA ENA VEITABANA LALAI
Sa qai vitu na kaloko ena mataka ni Vakarauwai, ena Tabana Lailai Naba 4, ena vuaicake kei Houston. Era gunu kofi ra qai kana panikeke na bolecakacaka, salavata kei na veitalanoa kei na nodra veidredrevaki nira lai sotasota ena Kingdom Hall. E so era ciciva mai e vica vata na drau na kilomita mera tiko kina e kea. Ni qai veimama na vitu, sa vakadirorogo na Kingdom Hall, ni sa tekivutaka na veivosakitaki ni tikinivolatabu ni veisiga na tacida tagane e liutaka na tabana lailai oya. E kacivaka tale ga ni na vulici tiko Na Vale ni Vakatawa ena mataka ni Sigatabu ena veimama na vitu, ni bera nira qai veitosoyaki ena cakacaka. E uqeti ira kece mera na vakaitavi, ia qai vakatau ga vei ira ke ra via vakamacala ena vosa vakavalagi se vakasipeni. E vakasavuya tale ga na loloma e vakau mai ena itikotiko liu ni iVakadinadina i Jiova e vuravura, e cabolo na vakasausau ena nodra marautaka na bolecakacaka.
Ni oti oya, sa qai vakamacalataka na veika sa rawati tiko ena cakacaka ni vakacoko, qai vakavinavinakataki ira kece ena nodra lomasoli ni veivuke. A taroga sara: “E dua beka e sega ni kila na cava me cakava nikua, se me lako e vei?” Sega ni dua e laveliga. “Me vica beka na keda ivakarau kakana me kau mai?” Sega ni bera nira laveliga kece, qai salavata kei na katuvu ni dredre. Mai cabori yani e dua na masu me tini kina na veivosaki, sa ra maqusa sara na 250 na bolecakacaka—na tagane, yalewa, gone kei na qase—mera lai tekivu cakacaka vakaukaua ena loma ni siga kece oya.
E vakamuri na ituvatuva oqo ena vo ni ono na tabana lalai, vaka kina ena itikotiko liu ni komiti. Ia, ena gauna vata e caka tiko kina oya, era sa na ogaoga tiko na daunivakasaqa—me rawa ni qai sigalevu tutu sa buta na kuro, me rauti ira na 2,000 na bolecakacaka. Macala nira sa na walokai sara tu ga!
[Kato/iYaloyalo ena tabana e 24]
POROKARAMU NI VULI CAKACAKA
Ni vakacagau tiko na veivakacokotaki, e cici vata tale tiko ga kei na nodra veivakavulici ena so na taba ni cakacaka o ira na bolecakacaka era vakaivola, vei ira na sega ni vakaivola. So era vulica na icakacaka ni vakawainimatetaki ni vale, na kena vakalalagataki, na coba kovate. E so tale era vulica na boroboro kei na palasitataki ni vale. Ni caka tiko na vuli, e tauri ena vidio qai lai vakaraitaki ena tabana lalai kece mera vuli cakacaka kina na vo ni bolecakacaka. Kaya e dua na lewe ni komiti ni vakacoko: “Ni caka na vuli vaka oqo, e vakadeitaka ni na tiko sara e cake na ivakatagedegede ni cakacaka.”
[iYaloyalo]
Ra veivakavulici na kenadau
[Kato ena tabana e 26]
“CAKACAKA DINA NI KALOU”
“Era dau vakatoka na leqa tubukoso na kabani ni inisua me cakacaka ni Kalou,” e kaya e dua vei iratou na lewe ni komiti ni vakacoko. E tomana tale: “Ia, sa rawa ni tukuni ni sa qai cakacaka dina ni Kalou, o ira na bolecakacaka era oga tu oqo ena vica vata na vula. Na noda mataveitacini sa dua dina na ka veivakurabuitaki!” Ena gauna kece ni veivakacokotaki oqo, e rauta nira lewe 2,500 se sivia na bolecakacaka era dau lai veitokoni ena veimuanimacawa. Kaya na jeameni ni komiti: “Era vakadaroya na nodra gade na bolecakacaka oqo, veiveisautaka na nodra ituvatuva vakavuvale, ra lokulekataka e so na ka ena nodra bula, me rawa ga nira lai veitokoni ena dua vei ira na cakacaka ni vakacoko levu duadua era bau colata na iVakadinadina i Jiova.”
Ni dede na gauna ni vakacoko, e gadrevi kina vei ira na bolecakacaka na yalo ni cabori ira. E dua vei ira se cakacaka sara mai na kena itekivu me yacova ni oti, e cakacaka saumi tale tiko ga, qai rauta ni 50 na aua dua na macawa na nona cakacaka. Ia, e vakayagataka e rauta ni 40 na aua ena veimacawa ena cakacaka ni vakacoko. “E solia vei au na igu o Jiova,” e kaya o koya. “Ra tarogi au e so era kilai au, ‘O saumi kina?’ Au tukuna vei ira, ‘E ka wale vei au na ilavo ena noqu cakacaka oqo.’” Ena veimuanimacawa, ni ratou cegu mai na nodratou cakacaka saumi e dua na vuvale mai na yasayasa o Louisiana, eratou ciciva e rauta ni 800 na kilomita me ratou lai veivuke ena cakacaka ni vakacoko, ratou qai cici lesu tale i vale. Levu era cakacaka ena matakalailai me yacova na karobo, ra qai dui lesu ina nodra itikotiko. Dua na ilawalawa matai, eratou lewe 30, e rauta ni vitu ina tini na aua na yawa ni nodratou cici ina vanua ni cakacaka, eratou kaya: “Ka marautaki dina vei keitou.” Dua tale na bolecakacaka e dau suka mai na nona cakacaka saumi ena veimama na tolu ena yakavi, qai lai veivuke vei iratou na komiti ni vakacoko me yacova na tini na kaloko ena bogi. Dau qai veivuke tale ga ena veimuanimacawa. “Au taleitaka vakalevu,” e kaya.
Io, o ira oqo kei ira kece na vo ni bolecakacaka, era lomasoli na veivuke ena vuku ni veilomani vakaveitacini—na ka e vakatakilakilataki ira na lotu Vakarisito dina. (Joni 13:35) Ni sikova oti na turaganikoro e Houston na nodratou itikotiko liu na komiti ni vakacoko, e vakavuna sara ga me kaya vei ira e dua na ilawalawa iVakadinadina: “Oni vakabauta ni dodonu meda cakava na ka e kaya na Kalou meda cakava. Sa laurai sara ga ena ka oni cakava oqo.”
[iYaloyalo ena tabana e 22]
Luvu o Houston, 9 June, 2001
[Credit Line]
© Houston Chronicle
[iYaloyalo ena tabana e 23]
Vuki me uciwai na sala ni motoka
[iYaloyalo ena tabana e 23]
Luvu na veivale
[iYaloyalo ena tabana e 25]
So vei ira na vica vata na udolu na iVakadinadina era bolecakacaka
[iYaloyalo ena tabana e 26]
E sivia e duanaikava na milioni na ivakarau kakana era vakarautaka na vakasaqa!
[iTaba ni Credit Line ena tabana e 26]
NOAA