Na Rai ni iVolatabu

E tu Beka e Veivanua na Kalou?

E VEIGANITI dina me tukuni ni Kalou e kaukaua duadua, qai kila na ka kece ga. Ia, vei ira e so nira via vakamacalataka na uasivi ni Kalou, era kaya ni tiko o koya ena veivanua kece ga.

Na imatai ni rua na vakasama e tokona na iVolatabu. (Vakatekivu 17:1; Iperiu 4:13; Vakatakila 11:17) Io, na Kalou e kaukaua duadua, qai kila na ka kece ga, ena vakasama ni sega ni dua na ka e rawa ni vunitaki vua. Ia, e tu beka e veivanua na Kalou? E dua dina beka na kabula e tiko na vanua e vakaitikotiko kina?

E Tiko e Vei na Kalou?

Ena vica na tikinivolatabu e dau vakatokai na “lomalagi” me “yasana . . . sa tiko kina” na Kalou. (1 Tui 8:39, 43, 49; 2 Veigauna 6:33, 39) E dua na ivakamacala ena iVolatabu e kaya vaka oqo me baleta na cecere ni Kalou o Jiova: “Ena tiko vata vakaidina li na Kalou kei ira na tamata e vuravura? raica, ko lomalagi, kei lomalagi ecake sara, ko ni sa sega ni yalani rawa kina.”​—2 Veigauna 6:18.

“A Yalo na Kalou,” e kaya na iVolatabu. (Joni 4:24) O koya gona, e vakaitikotiko mai lomalagi, e sega ni vakaitikotiko e vuravura. Ni vakamacalataka na iVolatabu ni “lomalagi” na yasana e tiko kina na Kalou, e dusia tiko ga oya na cecere ni vanua e vakaitikotiko kina ni vakatauvatani kei na vanua eda vakaitikotiko kina na tamata. O koya e bibi, e vakavulica na iVolatabu ni cecere sara na nona itikotiko na Kalou, e cecere cake sara mada ga mai na noda lomalagi kei na vuravura. Io, e tiko ena dua na vanua dina.​—Jope 2:1-2.

E Kabula na Kalou

A vakaibalebaletaka tiko o Jisu na itikotiko i Jiova ena gauna e kaya kina vei ira nona tisaipeli: “Sa vuqa na tikina e na vale nei Tamaqu. . . . Ni ka’u sa lako me’u vakarautaka na tikina me nomudou.” (Joni 14:2) A lako e vei o Jisu? A “curu ki na lomalagi dina ga, me rairai edaidai e na mata ni Kalou e na vukuda.” (Iperiu 9:24) Eda vulica e ke e rua na tikina bibi me baleti Jiova na Kalou. Kena imatai, ni tiko dina na nona itikotiko, kei na kena ikarua, e kabula, e sega ni igu e veicaginayaki tu ga e veivanua kece.

Oya na vuna e vakavulici ira kina nona imuri o Jisu mera masu vaka oqo: “Tama i keimami mai lomalagi,” mera masu vua e dua na kabula, o Jiova, e tiko ena dua na vanua vakayalo, e vakatoka na iVolatabu me lomalagi. (Maciu 6:9; 12:50) E lakolako vata na ivakavuvuli oqo kei na sala era vakavulici kina na tamata ni Kalou mera masu ena sivia e 1,500 na yabaki. Na ivola makawa duadua e uqeti vakalou e tiko kina na masu oqo: “Mo ni rai sobu mai na nomuni tikotiko tabu, mai lomalagi, ka vakalougatataki ira na nomuni tamata.”​—Vakarua 26:15.

Na Yalo Tabu e Rawa ni Yacovi Ira na Tamata Kece kei na Vanua Kece

Dina ni cavuta na iVolatabu ni vakaitikotiko dina ena dua na vanua na Kalou, ia e duidui na ka e tukuna me baleta na yalo tabu, oya ni tiko e veivanua. E taroga na daunisame o Tevita: “Me’u lako tani kivei me’u yali kina mai na yalomuni? Se me’u dro kivei me’u kakua ni tiko e matamuni?” (Same 139:7) E so era veilecayaki ena tikina vaka oqo, ra qai nanuma ni Kalou e tiko e veivanua. Ia, ni dikevi na tikina yavolita kei na so tale na tikinivolatabu, e matata kina ni yalo tabu i Jiova​—se na igu yavala kaukaua​—e rawa ni sobura mai na nona itikotiko ina dua ga na vanua e lomalagi kei vuravura.

Me vaka e dua na tama e dodoka mai na ligana me vakaceguya qai tokona na luvena, na liga i Jiova​—se na yalo tabu​—e rawa ni yacova e dua na vanua ga e lomalagi se na vuravura me vakayacora kina na nona inaki. O koya gona, e rawa ni kaya na daunisame: “Kevaka ka’u sa taura na taba ni mataka, ka la’ki tiko mai na sauka ni wasawasa; ena tuberi au ga mai kea na ligamuni, ka tauri au na ligamuni matau.”​—Same 139:9, 10.

O Rawa ni iTokani ni Kalou

Nona yalomalumalumu o Jiova e vakalaivi ira kina vakayalololoma na tamata mera vakamacalataka na ka e baleti koya kei na nona itikotiko ena sala eda na kila kina. Ena sala oqo kei na so tale, e rawa ni kainaki kina ni “vakamalumalumutaki koya me raica na ka mai lomalagi kei na ka e vuravura!” (Same 113:6) Ia, ena sega ga ni rawa ni taucoko na noda vakamacalataki koya na Kalou.

O Jiova e sa rui lagilagi, sa rui cecere, sa rui totoka, e sega ni dua na ivakamacala vakatamata me vakamacalataki koya vakavinaka. Dina ga ni vakamacalataka na iVolatabu ni dua na vanua dina na nona itikotiko mai lomalagi, ia sa na sega tu ga ni rawa meda kila vinaka na tamata na ituvaki vakayalo oya.​—Same 139:6.

Ia, eda lomavakacegu nida sa bau kila rawa e so na ka me baleta na ituvaki dina i Jiova, me vaka na noda kila ni sega ni dua na igu yavala kaukaua wale ga e veicaginayaki tu e veivanua kece e lomalagi kei vuravura. Kuria oya, e dua dina na kabula o koya, e tiko tale ga na vanua e vakaitikotiko kina, qai kilai tani ni dau loloma qai yalovinaka. Na kilaka oqo e dolava vei keda na tamata e dua na ka e uasivi vakaoti​—oya ni rawa nida veiwekani vakavoleka sara kei koya na Turaga Sau ni lomalagi kei vuravura ena noda bula taucoko.​—Jemesa 4:8.