Veitokoni na ‘Kalou ni Veivakacegui’

LEVU na ituvaki rarawataki a sotava o Tui Tevita qai levu na ‘nanuma ni lomana.’ Ia a sega ni lomalomaruataka ni kilai keda vinaka na Dauveibuli. “I Jiova, ko ni sa dikevi au, ka kilai au,” e vola. “O ni sa kila na noqu tiko sobu kei na noqu tu cake, o ni sa kila na nanuma ni lomaqu ni sa yawa tiko. Ni sa sega e dua na vosa e na gusuqu, sa sega ni kilai deivaki kece sara ga vei kemuni Jiova.”​—Same 139:1, 2, 4, 23.

Eda vakadeitaka tale ga ni Dauveibuli e kilai keda vinaka kei na leqa ni lomabibi ena noda vakasama kei na yagoda ivalavala ca. E kila na vu ni lomabibi, na sala meda valuta kina na ituvaki eda sotava tiko, kei na kena iwali tawamudu. E sega tale ni dua eda rawa ni nuitaka me vukei keda, na “Kalou ga, e veivakacegui, e veivakayaloqaqataki, e veivakabulabulataki qai vakamarautaki ira na lomabibi.”​—2 Korinica 7:6, The Amplified Bible.

Ia era na via kila na lomabibi na sala ena vukei ira kina na Kalou nira rarawa.

E kauaitaki ira beka era lomabibi na Kalou?

E kauaitaki ira vakalevu nona dauveiqaravi era lomabibi, e vaka sara ga e tiko kei ira ‘sa ramusu qai malumalumu na yalodra, me vakabula na yalodra sa yalomalumalumu, qai vakabula na lomadra sa bibivoro.’ (Aisea 57:15) E veivakacegui noda kila ni “voleka ko Jiova vei ira sa ramusu na yalodra; ka sa vakabulai ira sa dasila na lomadra”!​—Same 34:18.

Ena vakacegui ira vakacava na lomabibi na Kalou?

E rawa vei ira na qarava na Kalou mera torovi koya e “daurogoca na masu” ena veigauna kece, ni rawa ni vukei keda meda valuta na lomabibi kei na ituvaki leqataki. (Same 65:2) E uqeti keda na iVolatabu meda talaucaka na lomada vua: “Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka. Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.”​—Filipai 4:6, 7.

Vakacava ke da nanuma ni sega ni rogoci keda na Kalou nida beci keda?

Ena vuku ni lomabibi, eda na rairai nanuma kina ni sega ni yaga na noda sasaga meda vakamarautaka na Kalou. Ia e kila vinaka na Tamada vakalomalagi na rarawa ni lomada, “sa nanuma ga ni da sa kuvu-ni-soso.” (Same 103:14) Ke “vakacalai keda . . . na yaloda,” meda ‘vakadeitaka e yaloda’ ni “cecere cake na Kalou mai na yaloda.” (1 Joni 3:19, 20, VV) E rawa sara ga ni nomu qaqanimasu eso na tikinivolatabu me vaka na Same 9:9, 10; 10:12, 14, 17; kei na 25:17.

Vakacava ke da sega ni masu rawa nida sa rui rarawa vakalevu?

Eso na gauna ena sega ni matata na noda vosa nida rarawa vakalevu, ia kua ni soro! Meda toro voleka tiko ga vua na “Tama ni loloma, kei na Kalou ni veivakacegui kecega,” ni kila vinaka na lomada kei na ka eda gadreva. (2 Korinica 1:3) O Maria, sa tukuni oti mai, e kaya: “Eso na gauna niu veilecayaki vakalevu, au sega sara ga ni kila na ka meu masulaka. Ia e kila na kequ ituvaki na Kalou, ena vukei au.”

E sauma vakacava na Kalou na noda masu?

E sega ni tukuna na iVolatabu ni Kalou ena kauta laivi kece na noda leqa ena gauna qo. Ia e vakayaloqaqataki keda meda vosota na “ka kecega”​—okati kina na lomabibi. (Filipai 4:13) “Ni yacovi au na lomabibi ena imatai ni gauna,” e kaya o Martina, “au masuti Jiova me vukei au vakatotolo baleta niu nanuma niu na sega ni vosota vakadede. Ena gauna qo, au lomavakacegu meu masu ena veisiga me vakayaloqaqataki au.”

E dau veivakayaloqaqataki na iVolatabu vei ira na lomabibi. O Sarah, sa yabaki 35 na nona vosota tiko na lomabibi, e vakila ni yaga na wili iVolatabu wasoma. E kaya: “Au vakavinavinakataka na veiqaravi vakavuniwai e caka vei au. Ia au raica ni yaga vakayago, vakayalo tale ga na wilika na Vosa ni Kalou. Sa matau sara vei au na wilika.”

Ena Oti Vakadua na Lomabibi!

Ni se bula e vuravura o Jisu Karisito, e vakaraitaka na kaukaua e solia vua na Kalou ni vakabulai ira na tauvimate bibi. A tu vakarau me vakacegui ira na rarawa tu ena tauvimate. E kila tale ga na ca ni rarawa. Ena bogi ni bera nona vakamatei vakaloloma, “sa cabora oti na kerekere [na Karisito], kei na masumasu, kei na tagi vakararawa, ni sa vakawai na matana, vua sa rawata me vakabulai koya mai na mate.” (Iperiu 5:7) A gauna rarawataki dina qori vei Jisu, ia eda kalougata kina ena gauna qo ‘ni rawa [vei Jisu] me vukei ira na dau veretaki.’​—Iperiu 2:18; 1 Joni 2:1, 2.

E tukuna na iVolatabu ni inaki ni Kalou me vakaotia vakadua na ituvaki rarawataki kece e dau vakavuna na lomabibi. E yalataka: “Ka’u sa bulia na lomalagi vou kei na vuravura vou; ia ena sega ni nanumi na ka eliu, ena sega ni curu tale ki na lomamudou. Ia dou reki ka marau ka sega ni mudu e na ka ka’u sa cakava.” (Aisea 65:17, 18) Na “lomalagi vou,” na Matanitu ni Kalou ena liutaka na “vuravura vou,” o ira na yalododonu era na bula e vuravura. Ena qai uasivi kina na nodra bula vakayago, na ituvaki ni lomadra, kei na nodra bula vakayalo. Sa na oti vakadua na tauvimate kece.