Na Rai ni iVolatabu

Era na Kama Beka i Eli na Tamata Ca?

O GERTRUDE, e dua na marama italatala ni lotu Penitiko e vakabauta na bukawaqa i eli. Ni tukuni vua ni sega ni vanua dina qo, e veisaqasaqa sara ga kei na ka e dau nanuma voli ni sa donu tu. E tukuna ke sega na kama i eli sa na sega ni totogitaki na veimataqali valavala torosobu. A dei tiko ga ena ka e vakabauta o Gertrude. E tukuna “sa na bau dredre meu qarava na Kalou ke ra sega ni kama i eli na tamata ca.”

Era na kama beka i eli na tamata ca me vaka ra vakavuvulitaka e levu na lotu? Ke sega, era na totogitaki vakacava?

iMatai ni iTotogi Vakalou

E tukuna na iVolatabu ni buli rau na imatai ni veiwatini o Atama kei Ivi na Kalou me rau uasivi. (Vakatekivu 1:27; Vakarua 32:4) A biuti rau ena dua na parataisi totoka qai vakarautaka vei rau na isolisoli ni bula tawamudu. Ia, a vakatabuya ga vei rau e dua na ka. E vakarota na Kalou: “E tara mo kana mai na kau kecega sa tu ena were: ia na kau sa kilai kina na ka vinaka kei na ka ca, mo kakua ga ni kana kina: ni ko na mate vakaidina e na siga ko sa kana kina.”​—Vakatekivu 2:16, 17.

E ka ni rarawa ni rau a sega ni talairawarawa ina ivakaro ni Kalou. Veiganiti kina nona totogitaki rau na Dauveibuli me rau mate. “E na buno ni matamu ko na kania kina na kemu kakana, ka yacova na siga ko na suka tale kina ki na qele; ni ko a buli maikina eliu: ni ko sa kuvu ni qele ga, ia ko na suka tale mo kuvu ni qele.”​—Vakatekivu 3:19.

Ke rau totogitaki i eli o Atama kei Ivi, sega ni vakabekataki ni na vakaroti rau kina na Kalou. A sega ga ni tukuna o koya e dua na ka me baleti eli. Rau na sega gona ni lai vakararawataki tiko. Ena sega ni bula tale tiko e dua na ka ni rau sa mate.

Ni vurevure ni bula, e kila vinaka na Dauveibuli na veika kece me baleta na bula kei na mate. E volai ena nona Vosa ni o ‘ira na mate era sa sega ni kila e dua na ka.’ (Dauvunau 9:5) Qo e vakaraitaka ni rau na sega ni lai vakararawataki tale tiko i eli o Atama kei Ivi ena gauna rau mate kina. Sega ni rau bula tale tiko se rau ‘vakila e dua na ka,’ ni rau sa na vuki tale me rau kuvu ni qele.

Eda na Vakararawataki Beka Nida Mate?

E tukuna na Roma 5:12: “Me vaka sa curu ki vuravura nai valavala ca e na vuku ni tamata e lewe dua, kei na mate e na vuku ni valavala ca; a sa yaco vakakina na mate ki na tamata kecega, ni sa cala na tamata kecega.” Ni vakadewa gona mai vei keda o Atama na mate, qai suka ina qele, e dusia qori ni sega tale ni lai totogitaki tiko i eli e dua e kawa ivalavala ca.​—1 Korinica 15:22.

Eda vauci kece ena lawa a soli vei Atama. ‘Na sau ni valavala ca na mate.’ Ni dua gona e mate sa “sereki mai nai valavala ca”. (Roma 6:7, 23) Ke da mate kece na tamata vinaka kei na tamata ca qai sega ni dua e totogitaki, sa qai vakacava na lewadodonu ni Kalou?

Lewadodonu ni Kalou

Mai na gauna a buli rau kina na imatai ni veiwatini na Kalou qai vakarota me rau vakatawai vuravura me rau qarava vinaka tale ga na veika era tu kina, e se dei toka ga ena inaki qori me baleti ira na yalododonu. (Vakatekivu 1:28) E tukuna nira: “Na taukena na vanua ko ira na yalododonu, ka tiko kina ka sega ni mudu.”​—Same 37:29.

Era na tawana gona na vuravura qo na yalododonu. Era na bulabula vinaka qai mamarau. Na ka a nakita taumada na Kalou mera taukena na yalododonu ena “yaco” dina ga. Ena qai yaco qo ni sa sosomitaka na vuravura ca qo e dua na vuravura vou.​—Aisea 55:11; Taniela 2:44; Vakatakila 21:4.

Era le bilioni era sa mate tu era lecava na ivakatagedegede ni Kalou, ia era na qai vakaturi mera dusimaki mera rawata na bula ena vuravura vou. (Aisea 11:9; Joni 5:28, 29) O ira na beca na lawa ni Kalou era na totogitaki ena “ikarua ni mate.” Na mate qori era na sega ni tucake tale kina.​—Vakatakila 21:8; Jeremaia 51:57.

Ni Kalou dauloloma o Jiova, ena sega ni veitotogitaki i eli. (1 Joni 4:8) Ena sega tale ga ni vakalaiva me tawamudu nodra veivakararawataki na daucaka ca. E vakadeitaka na Same 145:20: “Sa maroroi ira kecega era lomani koya ko Jiova: ia ena vakawabokotaki ira kecega nai valavala ca.” E ivakaraitaki dina ga ni loloma se vakaevei!

O DAU VAQAQA BEKA?

◼ Cava e yaco nida mate?​—Vakatekivu 3:19.

◼ E vakacava tu na kedra ituvaki na mate?​—Dauvunau 9:5.

◼ Ena totogitaki ira vakacava na daucaka ca na Kalou?​—Same 145:20.

[Tikina bibi ena tabana e 32]

“Ko ira na mate era sa sega ni kila e dua na ka.”​—Dauvunau 9:5

[iTaba ni Credit Line ena tabana e 31]

iTaba: www.comstock.com