Na Veirawai ni iTukutuku ni Veivoli
DAUVOLA YADRA! MAI POLADI
E kabi dei toka na matai Tomek ena tivi, dua na ka nona kurabui. A vakarorogo vinaka sara ni sa kaburaki mai na itukutuku ni veivoli: “Ni tokara qo na luvemu tagane, ena kaukaua, dauqito, ra qai qoroi koya nona icaba. Mo volia!” E cici sara vei Tamana qai vagugutaka na ivakatagi ni itukutuku ni veivoli a rogoca oya. A tukuna sara: “Ta, volia dua na noqu!”
◼ Na cava era dau vinakata kina na gone na ka e kacivaki ena itukutuku ni veivoli? “Nira taukena na veika qori e so, era vinakata tale ga me dua na nodra. Era vinakata mera taleitaki ira tiko ga nodra itokani,” e vakamacalataka e dua na qasenivuli ena mekesini ni Poladi na Rewia. Nira cikeva e dua na ka na gone, tagi, se vakaveveku mata, sa ra dau rawai totolo e so na itubutubu mera volia na iyaya e vinakata na luvedra.
Na cava e veirawai kina na itukutuku ni veivoli e baleti ira vakatabakidua na gone? Na ka e tukuni kina “e sega ni vakabibitaka na isau, vinaka ni iyaya kei na kena yaga,” e tukuna e dua na vuniwai ni vakasama, o Jolanta Wąs. Na inaki ni itukutuku ya me “uqeta na yalo.” E kaya o Wąs: “Era na sega ni vakadikeva sara vakalevu na gone na italanoa ena itukutuku ni veivoli. . . . Era sega ni veidutaitaka na itukutuku qori kei na itukutuku dina era kila tu.” Ke ra saga mada ga mera veidutaitaka, ena lailai sara na ka era kila mera raica kina na yaga ni iyaya e volitaki tiko.
O na taqomaka vakacava na luvemu me kua ni rawai ena itukutuku ni veivoli? Kena imatai, “mo dau veivosaki vakalevu kei luvemu qai vakamacalataka vua ni nona taleitaki e dua e sega ni vakatau ena mataqali vava [se isulu] e tokara,” e vola na Rewia. Mo vakavulici luvemu me kila ni se rawa tiko ga ni marautaka nona bula vagone ke sega mada ga ni taukena na iyaya ni vakatatalo vovou. Kena ikarua, mera kila tiko na itubutubu na kena veirawai na itukutuku ni veivoli vei ira na luvedra. Na kena iwali ga oya me kua ni “dusimaki keda na itukutuku ni veivoli me baleta na ka ena vinaka vei ira na luveda,” e tukuna o Wąs.
Kena iotioti, ena yaga vei ira na itubutubu kece na ivakasala ena iVolatabu. E vola na yapositolo o Joni: “Na ka kecega sa tu e vuravura, na gagadre ca ni yago, na gagadre ca ni mata, kei na dokadokai keda e na ka ni bula oqo, sa sega ni tubu maivei Tamada, mai vuravura ga.”—1 Joni 2:15, 16.
Sega li ni o vakadinata ni levu na itukutuku ni veivoli e kena inaki me uqeta na ‘gagadre ni mata,’ qai uqeti ira na lalai kei ira na uabula mera ‘dokadokai ira ena ka ni bula qo’? E tomana kina na yapositolo o Joni na nona ivakasala: “Ko vuravura sa lako tani yani, kei na kena gagadre talega; ia ko koya sa cakava na ka sa vinakata na Kalou, sa tu dei ga ka sega ni mudu.”—1 Joni 2:17.
O ira na itubutubu era dau veivosaki vakalevu kei luvedra ena veika yaga, e rawa nira tuberi ira ena ivakavuvuli vakalou kei na ivalavala yaga. (Vakarua 6:5-7) Ena sega kina nira rawai vakatotolo na gone ena itukutuku ni veivoli e dau veirawai ni vuravura ca qo e kena inaki mera uqeti na itubutubu mera volia na ka vei ira.