Na Rai ni iVolatabu
E Dodonu Mera iTalatala na Yalewa?
“AU KURABUITAKA qai rarawataka ni sega ni dua na veisau e bau caka vei ira na yalewa, vakabibi ena nodra lesi ena cakacaka vakalotu,” a vola e dua na yalewa lotu Katolika ina niusiveva na USA Today. Levu tale ga era duavata kei na rai ya. Ena so mada ga na lotu, era italatala na yalewa, era bete, bisovi ra qai rapai.
O ira na lotu e duidui tiko nodra rai—qo o ira era vakatabuya na yalewa mera italatala kei ira era vakadonuya mera vunau e valenilotu—era kaya nira sa muria tiko na iVolatabu. Ia na iVolatabu e sega ni duavata kei na rai ruarua ya. E dina vakacava qori? Me saumi qo, meda dikeva mada na sala e vakayagataka kina na iVolatabu na vosa “italatala.”
iTalatala ena iMatai ni Senitiuri
Na cava mada e kena ibalebale vei iko na vosa “italatala”? E levu era na totolo ga nodra vakasamataki ira sara na iliuliu ni lotu era tagane se yalewa ra liutaka tiko e dua na ivavakoso ena sokalou. Ia na iVolatabu e vakayagataka na vosa qo ena dua tale na kena ibalebale. Vakasamataka mada na yalewa lotu vaKarisito o Fipi, a tukuni koya na yapositolo o Paula me “ganeda, e dau veivuke vakalevu [italatala] ena ivavakoso e Kenikiria.”—Roma 16:1.
O nanuma ni o Fipi ena duri tu ena matadra na ivavakoso e Kenikiria me caka lotu? Ia na cakacaka cava a dau qarava o Fipi? Ena nona ivola vei ira e Filipai, a vola o Paula ni so na yalewa era “dau cakacaka vata kei au ena vuku ni itukutuku vinaka.”—Neitou na matanivola kala; Filipai 4:2, 3, Contemporary English Version.
E dua na sala bibi era vakatetea kina na lotu vaKarisito na itukutuku vinaka ena imatai ni senitiuri oya nodra cakava ‘e matanalevu kei na cakacaka vakavunau e veivale.’ (Cakacaka 20:20) O ira na vakaitavi ena cakacaka ya era italatala. Era wili kina na yalewa me vakataki Virisila, ni a tomani watina ena nodrau “vakamacalataka vakadodonu . . . na sala ni Kalou” vua e dua na turaga e bera ni papitaiso qai rerevaka na Kalou. (Cakacaka 18:25, 26) Me vakataki Fipi, e macala gona ni dua tale ga na italatala maqosa o Virisila me vakataki ira e levu na yalewa.
iTavi Dokai
E itavi lolovira beka na vunau e veivale, e sega soti ni bibi qai lesi ga vei ira na yalewa, mera lesi ga na tagane ina itavi bibi ni kena qaravi na ivavakoso? E sega ni dina qori, ni rua tiko na vuna. Kena imatai, e vakamatatataka na iVolatabu ni o ira kece na lotu vaKarisito—wili eke na tagane ra qarava na itavi bibi ena ivavakoso—e dodonu mera vakaitavi ena vunau e veivale. (Luke 9:1, 2) Kena ikarua, me vaka ga na gauna e liu, na vunau e veivale e sala duadua ga era vakayacora kina na lotu vaKarisito tagane kei na yalewa na ivakaro i Jisu, oya mera ‘vakavulici ira na lewe ni veivanua kece ga mera tisaipeli ra qai veivakavulici tale ga.’—Maciu 28:19, 20.
E tiko tale ga nodra itavi bibi eso na yalewa ena ivavakoso. A vola o Paula: “Me rakorako tale ga na nodra itovo na kenamarama. . . mera dau vakavulica na ka vinaka; mera lialiaci kina na yalewa gone mera dau lomani watidra, mera lomani luvedra.” (Taito 2:3, 4) Koya gona, na yalewa matua e kila vinaka na ivakarau ni bula vaKarisito, e nona itavi dokai me vukei ira na yalewa gone mera matua. E itavi dokai dina qori e bibi tale ga.
Veivakavulici ena iVavakoso
E sega ni tukuni ena iVolatabu nira tucake ena ivavakoso na yalewa mera veivakavulici. Ia e veivakaroti na yapositolo o Paula “mera galu na yalewa ena ivavakoso.” Na cava na vuna? A vola o Paula, me rawa ni caka na ka “me rakorako, me tuvanaki tale ga vakamatau.” (1 Korinica 14:34, 40) Me rawa ni cicivaki vinaka na ivavakoso, o Jiova e lesia e dua na ilawalawa me veivakavulici. Me nanumi tiko ni sega ni lesi na itavi vakaivakatawa ni ivavakoso vua e dua baleta ga ni tagane; e lesi ga vei ira na tagane era rawata dina na kena ivakatagedegede.a—1 Timoci 3:1-7; Taito 1:5-9.
E itavi lolovira beka e lesia na Kalou vei ira na yalewa? Sega. Nanuma tiko ni o Jiova e lesi ira ena dua na itavi dokai—qori nodra vakadinadinataki koya. (Same 68:11) Era maliwai ira na iVakadinadina i Jiova nikua na tagane kei na yalewa era dau vunau e veivale ra qai vukei ira e milioni mera veivutuni mera vakabulai tale ga. (Cakacaka 2:21; 2 Pita 3:9) E sega ni itavi lailai qori!
Na ituvatuva qo e rawati kina na bula veiyaloni vei ira na tagane kei na yalewa, rau qai dokai ruarua kina. Me kena ivakatautauvata: E rau cakacaka vata na matada kei na daligada me rawa nida takosova kina na gaunisala osooso. E tautauvata tale ga ni rau qarava na tagane kei na yalewa na inaki ni Kalou ena itavi rau dui lesi kina, na Kalou ena vakalougatataka na ivavakoso ena bula vakacegu.—1 Korinica 14:33; Filipai 4:9.b
[iVakamacala e ra]
a Nanuma tale ga ni vakaiyalayala na lewa i tagane ena ivavakoso. Ena vakamalumalumu vei Karisito, ena muria tale ga na ivakavuvuli vakaivolatabu. (1 Korinica 11:3) O ira gona era lesi ena itavi bibi ena ivavakoso mera na “veirogorogoci,” yalomalumalumu ra qai veitokoni.—Efeso 5:21.
b Nira doka na yalewa lotu vaKarisito na itavi e lesia na Kalou vei ira na tagane ena ivavakoso, era na ivakaraitaki vinaka ena veiqaravi vei ira na agilosi e lomalagi.—1 Korinica 11:10.
O DAU VAQAQA?
● Era veivakavulici vakacava na yalewa ena ivavakoso vaKarisito taumada?—Cakacaka 18:26.
● O cei era lesi mera qarava na ivavakoso?—1 Timoci 3:1, 2.
● E raica vakacava na Kalou na nodra cakacaka vakaitalatala na yalewa nikua?—Same 68:11.
[Tikina bibi ena tabana e 20]
“Sa solia na vosa na Turaga: Nira mataivalu levu na yalewa sa tukuna na itukutuku vinaka.”—SAME 68:11, NW