iYaloyalo Vakasisila

E vakacala na iVolatabu na iyaloyalo vakasisila?

“O koya e vakaraica tiko ga na yalewa ena nona garosa, e sa veibutakoci oti kei na yalewa ya e lomana.” ​—⁠Maciu 5:⁠28.

VUNA MEDA KAUAI KINA

Nikua sa takalevu qai tu vakarawarawa na iyaloyalo vakasisila. E bibi mo kila na rai ni Kalou me baleta na iyaloyalo vakasisila ke o via vakamarautaki koya, mo marau tale ga.

KA E KAYA NA IVOLATABU

E sega ni cavuta vakadodonu na iVolatabu na iyaloyalo vakasisila. Ia na kena saravi e veisaqasaqa sara ga kei na levu na ivakavuvuli vakaivolatabu.

Kena ivakaraitaki, e tukuna vakadodonu na iVolatabu ke dua na tagane vakawati e “vakaraica tiko ga na yalewa” e sega ni watina, qai bucina na gagadre me rau veiyacovi, ena rawa ni lai veibutakoci. Na ivakavuvuli ena tikinivolatabu qori e baleti ira na vakawati se dawai era “vakaraica tiko ga” na iyaloyalo vakasisila, ra qai bucina e lomadra mera veiyacovi dukadukali. Na itovo va qori e sega sara ga ni taleitaka na Kalou.

E cala beka na sara iyaloyalo vakasisila ke sega ni tini ina veiyacovi dukadukali?

“O koya gona, moni vakamatea na gagadre ni veitikiniyagomuni . . . na veidauci, na ivalavala tawasavasava, na garogaro, na gagadre ca, kei na kocokoco.”​—⁠Kolosa 3:⁠5.

KA ERA TUKUNA ESO

Eso na dauvakadidike era sega ni vakabauta ni na tini ena veiyacovi dukadukali na saravi ni iyaloyalo vakasisila. Ke dina mada ga na vakasama qori, vakacava e vakadonuya na Kalou na kena saravi?

KA E KAYA NA IVOLATABU

E vakamacalataka na iVolatabu ni sega ni dodonu qai vakasisila na “veiwali ca.” (Efeso 5:​3, 4) Ke sa va qori, sa qai wacava sara na iyaloyalo vakasisila. Na iyaloyalo vakasisila sa tu nikua e saravi sara ga kina na veiyacovi, veiyacovi vakatagane se vakayalewa se so tale na iwalewale ni veiyacovi. Koya gona, na garovi ni kena na saravi na iyaloyalo ni veiyacovi dukadukali, e vakacudrui koya vakalevu na Kalou ni vakatauvatani kei na veiwali ca.

Era se veibataka tiko ga na dauvakadidike na nodra rawa ni lai vakayacora na tamata na ka era tatadrataka ena ka era sarava ena iyaloyalo vakasisila. Ia na iVolatabu e tukuna ni veivakaleqai vakayalo na saravi ni iyaloyalo vakasisila, e vakacudrui koya sara ga na Kalou. E veivakasalataki kina na iVolatabu: “O koya gona, moni vakamatea na gagadre ni veitikiniyagomuni . . . na veidauci [kei] na garogaro.” (Kolosa 3:⁠5) Era sega ni vakamatea tiko na gagadre va qori o ira era sarava na iyaloyalo vakasisila, era vakabulabulataka ga.

Na cava ena tarovi iko mai na sara iyaloyalo vakasisila?

“Dou vakasaqara na ka vinaka, ka segai na ka ca . . . Dou cata na ka ca, ka vinakata na ka vinaka.”

​—⁠Emosi 5:​14, 15.

KA E KAYA NA IVOLATABU

E vakamacalataka na iVolatabu ni so vei ira na dauveiyacovi vakasisila, daumateni, kei na daubutako era sa muduka na nodra ivalavala torosobu. (1 Korinica 6:​9-11) Ena sala cava? Oya na nodra bulataka na ivakasala vuku ena Vosa ni Kalou, era vulica tale ga mera cata na ka ca.

Eda rawa ni cata na iyaloyalo vakasisila nida vakasamataka vinaka na leqa ena kauta mai na ivalavala torosobu qori. E laurai ena dua na vakadidike a tabaka na Utah State University, ni so vei ira era dau sara iyaloyalo vakasisila era “lomabibi, sega ni dauveimaliwai, vakaleqai na nodra veiwekani,” ra qai sotava eso tale na leqa. Kena ikuri, eda sa raica mai ni cata na Kalou na saravi ni iyaloyalo vakasisila. E rawa tale ga ni vakavuna e dua tale na leqa levu, oya ni na tagutuva sara ga noda veiwekani kei na Dauveibuli.

E rawa ni vukei keda na iVolatabu meda lomana na veika vinaka. Na levu ga ni noda wilika na iVolatabu, na titobu tale ga ni noda lomana na ivakatagedegede savasava e volai kina. Na loloma qori ena uqeti keda meda cata sara ga na iyaloyalo vakasisila, eda na duavata tale ga kei na daunisame, a vola: “Au na sega ni viritura e mataqu e dua na ka ca.”​—⁠Same 101:⁠3.