Meda Vakabauta na Le Tolu Vakalou?
E sivia e rua na bilioni era tukuna nira lotu vaKarisito. Levu vei ira qori era lewena na lotu e vakavuvulitaka na Le Tolu Vakalou—ni Tamana, Luvena kei na yalo tabu e dua ga na Kalou. Na gauna cava e mai taurivaki kina na ivakavuvuli ni Le Tolu Vakalou? E tokona beka na iVolatabu na ivakavuvuli qori?
ENA imatai ni senitiuri S.K., a vakacavari kina na volai ni iVolatabu. Ni oti e rauta e rua na senitiuri ena 325 S.K., a vakaturi eso na ivakavuvuli ena dua na bose mai Nicaea sa qai vakayagataki ena ivakavuvuli ni Le Tolu Vakalou. Na siti o Nicaea e tiko mai Esia Lailai sa kilai tu nikua me o Iznik, mai Taki. E tukuna na New Catholic Encyclopedia ni ivakavuvuli e vakaturi ena bose mai Nicaea e veivosakitaki kina na ibalebale ni ‘ivakavuvuli vaKarisito,’ wili kina na nodrau veiwekani na Kalou kei Karisito. Ni se qai oti ga e dua na senitiuri na volai ni iVolatabu, na cava me dikevi tale kina na nodrau veiwekani na Kalou kei Karisito? E buawa beka na ka e tukuna na iVolatabu me baleta na ulutaga bibi qo?
E KALOU O JISU?
Era veiletitaka o ira era kaya nira lotu vaKarisito na nodrau veiwekani na Kalou kei Karisito ena gauna e veiliutaki tiko kina o Empara Constantine. Vakacava e Kalou dina o Jisu, se a buli koya na Kalou? A leqataka o Constantine de na vakaleqa na nona veiliutaki na ulutaga e veiletitaki qori, mani kacivi ira kece na iliuliu ni lotu ena dua na bose mai Nicaea. Ia a sega ni nona inaki o Constantine me kila na dina ni ulutaga qori.
“Vei keda sa dua bauga na Kalou, na Tamada.”—1 Korinica 8:6, Ai Vola Tabu
A tukuna vei ira na vica na drau na bisovi mera duavata, ia a dreve na nona sasaga. Mani vakatura ina matabose mera vakabauta ni o Jisu “e duabau ga” (homoousios) kei Tamana. Na vosa Le Tolu Vakalou era bulia na vuku ni Kirisi sa qai mai ciqomi me ivakavuvuli ni lotu vaKarisito. Koya gona ni cava na ikava ni senitiuri sa tete na ivakavuvuli qo me yacova mai nikua, wili kina na ivakavuvuli ni ikatolu ni kalou na yalo tabu.
VUNA MO KAUAI KINA
A tukuna o Jisu nira na “sokalou . . . vakayalo vei Tamada o ira era sokalou dina, ena yavutaki tale ga ena dina.” (Joni 4:23) E volai ena iVolatabu na ka dina qo. (Joni 17:17) E tukuni beka ena iVolatabu ni ratou dua ga na Kalou na Tamana, na Luvena kei na yalo tabu?
E sega ni bau kune ena iVolatabu na vosa “Le Tolu Vakalou.” O Jisu tale ga a sokaloutaka na Kalou, qai sega ni tukuna ni rau tautauvata. (Luke 22:41-44) Ena gauna mada ga a vakaturi kina o Jisu ena yago vakayalo, a kacivi iratou tiko ga na nona imuri “taciqu.” (Maciu 28:10) Vakacava era okati tale ga na imuri i Jisu mera taci koya na Kalou Kaukaua Duadua? Sega! Era na okati ga mera luve ni Kalou ke ra vakabauti Karisito, na Luvena vakamareqeti. (Kalatia 3:26) Vakatauvatana mada eso na tikinivolatabu qo kei na ivakavuvuli a vakaturi ena bose mai Nicaea.
Masu ni Vakabauta (Nicene Creed):
“Keimami vakabauta . . . e dua ga na Turaga o Jisu Karisito . . . oya ni duabau ga kei Tamana, Kalou mai na Kalou, Rarama mai na Rarama, Kalou dina mai na Kalou dina.”
Ka e kaya na iVolatabu:
Uuasivi cake vei au [Jisu] ko Tamaqu.”—Joni 14:28.a
“Au [Jisu] sa lako cake vei koya sa Tamaqu, ka Tamamudou; vei koya sa noqu Kalou, ka nomudou Kalou.”—Joni 20:17.
“Vei keda sa dua bauga na Kalou, na Tamada.”—1 Korinica 8:6.
“Me ia na vakavinavinaka vua na Kalou, na Tama ni noda Turaga ko Jisu Karisito.”—1 Pita 1:3.
“Sa tukuna na veika oqo na Emeni [Jisu], . . . ai vakatekivu ni cakacaka ni Kalou.”—Vakatakila 3:14.b
a Neitou na matanivola kala. Na tikinivolatabu kece e tauri mai na Ai Vola Tabu.
b E vakamacalataki ena ivola, Na Cava Sara Mada e Kaya na iVolatabu? e rua na ulutaga qo: “Na Cava Sara Mada e Kaya na iVolatabu me Baleti Koya na Kalou?” kei na “O Cei o Jisu Karisito?” Ke o vinakata e dua na ivola qo, o rawa ni kerea e dua na iVakadinadina i Jiova se wilika ena www.pr418.com.