“Raici Ira Mada na Manumanuvuka”

E LEVU e veiyasa i vuravura na manumanuvuka, rawarawa tale ga meda saravi ira. Era marautaka e levu mera saravi ira baleta na kedra ibulibuli, rokadra, nodra ivukivuki, kei na nodra dau sere.

De dua o dau saravi ira e veisiga mai nomu katubaleka. Me vaka e dua na maina e vaqara baca, se na secala ni tobo kena, se rau veimuri voli na ruve yalewa kei na ruve tagane, na kakabace e tara sova, se na bulbul ni vakani luvena.

O na rairai matasarasara ena nodra vakanawanawa tu e macawa na ikeli, ganivatu, kei na latui. Eso o na rairai qoroya: Me vaka na nodra veivalataka na siparo e dua na tiki ni kakana, se nona vakacesere e dua na tama ni kasaqa ni wedeva na kena isa, se na gutulei e dokoulu e waitui me toboka na kena. O na kurabui tale ga ena nodra vuka vata na belo se kacau nira toki ina dua tale na vanua. Io, sa vica vata na udolu na yabaki na nodra dau biuvanua eso na manumanuvuka qai kurabuitaki na nodra cakacakataka na vanua mera vukaca kei na gauna mera biubiu kina. E kaya mada ga na Dauveibuli: “Io, na belo ka vuka voli e cake sa kila na kena vula; kei na ruve, kei na belo loa, kei na kakabace, eratou sa nanuma na kedratou gauna me lako mai kina.”​—Jeremaia 8:7.

Manumanuvuka ena Gauna Vakaivolatabu

E dau cavuti vakalevu na manumanuvuka ena iVolatabu me vakavotuya e dua na vakasama bibi. Kena ivakaraitaki, e cavuta na Kalou vei Jope na ositeriji kei na totolo e tiko vua na manumanu qo: “Na gauna sa wavu tu vakadodonu cake kina ko koya, ena beca na ose kei koya sa vodoka.”a (Jope 39:13, 18) A tarogi Jope tale ga: “Sa vuka cake beka na manulevu e na nomu vuku, . . . Sa vuka cake beka na ikeli ni ko sa vakarota kina?” (Jope 39:26, 27) Cava eda vulica kina? Era cakava vakataki ira na manumanuvuka na veika vakatubuqoroqoro qori, era sega ni vinakata noda veivuke. Qori e vakadinadinataka na vuku ni Kalou.

A vola na Tui o Solomoni ni “domo ni ruve” e vakatakila ni sa tekivu na vulaitubutubu. (Sere i Solomoni 2:12) A cavuta na daunisame na kakabace me vakaraitaka nona vinakata me veiqaravi ena valenisoro ni Kalou. E kaya ena vuvu: ‘Na manumanuvuka mada ga e kunea e kea na nona vale kei na kakabace na nona sova, na vanua me susuga kina na luvena volekata na nomuni icabocabonisoro levu, i Jiova ni lewe vuqa.’​—Same 84:1-3, NW.

O Jisu mada ga e cavuti ira tale ga na manumanuvuka. Kena ivakaraitaki, dikeva mada na Maciu 6:26: “Raici ira mada na manumanuvuka, era sega ni teitei, tatamusuki, se kumuna na kedra ena lololo; ia e vakani ira na Tamamuni vakalomalagi. Oni sega beka ni uasiviti ira?” Na vosa vakatautauvata veivakauqeti qori e vakadeitaka vei ira na imuri i Jisu ni vakamareqeti ira o Jiova, koya gona mera kua ni lomaocaocataka na nodra bula e veisiga.​—Maciu 6:31-33.

Levu nikua era taleitaka mera dau saravi ira na manumanuvuka, e sega ni kurabuitaki qori nida dau qoroya na nodra ivukivuki, kedra irairai, nodra wedeva na kedra isa, kei na nodra dau sere. Kena ikuri, era vakavulici keda ena levu na tikina bibi me baleta na bula. Vakacava mo “raici ira mada na manumanuvuka”?