O na Vorata Vakacava na Veitemaki?

ITUVAKI DREDRE

“Era dau vinakata noqu naba ni talevoni eso na goneyalewa, nodra inaki ga na ‘veiyacovi.’ Au sega ni via solia qai biubiu totolo. Ia au dau vakasamataka tale tu, ‘Vakacava keu a solia noqu naba?’ So vei ira sa bau matavinaka dina. Au dau nanuma gona: ‘Cava meu kua ni solia kina?’”—Carlos,a 16.

Vakacava e dredre mo vorata na veitemaki vakataki Carlos? Ke vaka kina, na ulutaga qo ena vukei iko mo vorata.

KA MO KILA

Eda dau temaki kece—o ira mada ga na uabula. E levu na sala eda dau temaki kina. Sa uabula tu na yapositolo Paula ena nona vola: “E vu dina mai lomaqu noqu marautaka na lawa ni Kalou, au qai raica ni dua tale na lawa e tiko ena veitikiniyagoqu e veivala tiko kei na lawa ni noqu vakasama qai vakabobulataki au ina lawa ni ivalavala ca.” (Roma 7:22, 23) Sega vakadua ni soro o Paula se mani vakacava na kaukaua ni nona temaki—o rawa tale ga ni cakava qori! Cava mo bobula kina ina nomu gagadre? (1 Korinica 9:27) Ke o vorata na veitemaki ni o se gone, o na sega ni sotava e levu na leqa ena gauna qo, ena vukei iko tale ga ni o sa uabula.

Vakabulabulataka na gagadre vakayago na tabana ni itukutuku. E tukuni ena iVolatabu na “gagadre vakaitabagone” e dau kaukaua. (2 Timoci 2:22) Ia e vakabulabulataki na gagadre qori ena iyaloyalo, porokaramu ena retioyaloyalo, ivakatagi, kei na ivola era sa tu nikua me baleti ira na itabagone, mera nanuma kina ni donu nodra vakamalumalumu ina veitemaki. Kaya mada ke rau vakaraitaki tiko ena iyaloyalo e dua na tagane kei na dua na yalewa erau sa ‘veidomoni tiko,’ erau na tini veiyacovi ga ena dua na gauna. Ia e kaya na iVolatabu ni o ira na tagane kei na yalewa yalomatua era saga mera ‘vakatabui ira tiko ga mai na gagadre vakayago.’ (1 Pita 2:11) Kena ibalebale qo ni o rawa ni vakatulewataka mo vorata na veitemaki. O na cakava vakacava?

KA O RAWA NI CAKAVA

Kila nomu malumalumu. Ke o kila vinaka nomu malumalumu, ena vukei iko mo vorata na veitemaki. Qo e vaka ga nomu saga tiko mo cakava na ka e donu, ni na taqomaki iko mo kua ni sikalutu ina ka o dau malumalumu kina. Cava soti mo qaqarauni kina?—iVakavuvuli vakaivolatabu: Jemesa 1:14.

Vakasamataka na veika ena rawa ni yaco. Dau vakasamataka na ituvaki o rawa ni temaki kina. Vakasamataka rawa tu na sala mo vorata kina.—iVakavuvuli vakaivolatabu: Vosa Vakaibalebale 22:3.

Tudei ena ka e donu. E tukuni ena iVolatabu ni gauna e temaki kina o Josefa me veibutakoci, e kaya: “Au na qai cakava rawa vakaevei na ka ca vakaidina oqo, kai valavala ca vua na Kalou?” (Vakatekivu 39:9) Na matavosa “qai cakava rawa vakaevei” e vakaraitaka ni dei o Josefa ena ka e donu kei na ka e cala. Vakacava o na cakava tale ga qori?

Digia na ilala vinaka. O na sega ni temaki ke o digi ira na ilala era vakadeitaka mera cakava na ka e donu vakataki iko. E kaya na iVolatabu: “Ena vuku mai ko koya sa malele vata kei ira na vuku.”—Vosa Vakaibalebale 13:20.

Qarauna na ituvaki e dredre mo drotaka rawa. Kena ivakaraitaki:

• Ke o tagane kua ni tiko taudua kei na dua na yalewa, ke o yalewa kua tale ga ni tiko taudua kei na dua na tagane.

• Kua ni vakayagataka na Internet ena gauna se vanua o rawa ni temaki kina mo sara iyaloyalo ca.

• Kua ni maliwai ira e laurai ena nodra ivosavosa kei na nodra ivalavala nira sega ni vakabibitaka na itovo savasava.

iDusidusi cava o na muria mo kua kina ni temaki?—iVakavuvuli vakaivolatabu: 2 Timoci 2:22.

Kere veivuke ena masu. E kaya o Jisu vei ira nona tisaipeli: “Dou yadra, dou masu tiko mo dou kua ni temaki.” (Maciu 26:41) E vinakata o Jiova mo vorata na veitemaki, e rawa tale ga ni vukei iko. E kaya na iVolatabu: “Ni na sega ni vakalaiva moni sotava na ka ni veivakatovolei oni na sega ni taqea rawa. Ni oni vakatovolei, ena vakarautaka tale ga na sala moni vosota rawa kina.”—1 Korinica 10:13.