Au Lomavakacegu ena Gauna Sara ga au Vinakata Kina

AU SUCU ena siti o Szerencs qai susu ena koro o Tiszaladány ena vuaicake kei Hungary. Ena June 1991, au tomani ratou noqu itokani me keitou lai sili ena vanua e sega ni golevi vakalevu ena Uciwai na Tisza. Au lade niu nanuma ni titobu. Ia e cala noqu nanuma! E kamusu e tolu na sui ni domoqu, mavoa tale ga noqu suitu. Ratou vueti au noqu itokani ni ratou raica niu sega ni yavala.

E veiciciyaki noqu vakasama, au vakila niu sa tu ena dua na ituvaki leqataki. A qiriti sara na taba ni veivuke qai vueti au na waqavuka i valenibula, ratou qai saga na vuniwai me vakavinakataki na noqu suitu. Oti au lai vakabulabula ena koroturaga kei Hungary o Budapest. Au davo tu me tolu na vula, sega ni rawa niu yavalata na yagoqu vakavo ga na uluqu. Au se qai yabaki 20, ia sa sega ni rawa niu cakava vakataki au na ka. Qori e vakayalolailaitaki au sara ga, au vinakata meu mate.

Niu sa suka i vale, rau a vakavulici noqu itubutubu ena sala meu qaravi kina. Ia e tarabi vei rau na veiqaravi qai tuburi au na lomabibi ena yabaki tarava. A qai veisau noqu rai me baleta na kequ ituvaki ena gauna au laurai kina vei ira na kenadau.

Sa tekivu tale ga meu vakasamataka vakatitobu na veika e vauca na bula. E vakainaki beka? Na cava au sotava kina na ituvaki qo? Au mani wilika e levu na ivola niu vaqara na kena isau. Au saga meu wilika tale ga na iVolatabu, ia mai cegu ni sega ni matata vei au na ka e tukuni kina. Au vakataroga e dua na bete, ia e sega ni veivakacegui na nona isaunitaro.

Ena vulaitubutubu ni 1994, rau sikovi tamaqu mai e rua na iVakadinadina i Jiova, ia a kerei rau o koya me rau vakamacala vei au. Rau vakamacalataka na inaki ni Kalou me baleta nona na vukica na vuravura me parataisi, me vakaotia tale ga na tauvimate kei na rarawa. E totoka na nodrau ivakamacala, ia au se lomatarotaro tiko ga. Au ciqoma e rua na ivola e dau vulici kina na iVolatabu. Niu wilika oti, rau sureti au meu vulica na iVolatabu, au mani vakadonuya. Rau uqeti au tale ga meu dau masu.

Ena gauna ni vuli, rau dau vakayagataka na iVolatabu me saumi kina noqu vakatataro. Au vakadeitaka tale ga ni Kalou e kauaitaki au vakalevu. Ena 13 Seviteba, 1997, ni oti e rua na yabaki noqu vuli, au papitaiso ena tavu ni sisili e vale. Qori e dua na siga marautaki dina ena noqu bula.

Au toki i Budapest ena 2007 ena vale era dau qaravi kina na vakaleqai na ituvaki ni yagodra. Qori e vakarawarawataka noqu vakamacalataka na veika totoka au sa vulica mai. Ni vinaka na draki, au na vakayagataka noqu dabedabe qiqi livaliva meu vunau kina vei ira na tamata e tuba.

Na nodratou veivuke vakailavo e dua na vuvale keitou ivavakoso vata, au volia kina e dua na kompiuta e wilika na yavala ni uluqu. Qori e vakarawarawataka noqu qiriti ira e levu ni vakayagataki na internet, volavola tale ga vei ira na sega ni tu e vale nira veisiko yani noqu lewe ni ivavakoso. Na veika au cakava qo e vakavinakataka na iwalewale ni noqu dauveivosaki, e vukei au tale ga meu kua ni dau vakasamataka na kequ ituvaki.

E rawa tale ga meu tikova na soqoni vaKarisito. Era dau vukei au na taciqu meu cabe ena ikarua ni tabavale e caka kina na soqoni. Ni vakacagau na soqoni, mera vakamacala na vakarorogo, ena laveliga na taciqu e dabe tikivi au meu saumitaro. Ena taura noqu iVolatabu se ivola ni vuli meu vakamacala.

Au na mosi tu ga e veigauna qai vinakati me caka kece vei au na ka. Qori e dau vakayalolailaitaki au sara ga. Ia au lomavakacegu niu veitokani kei na Kalou o Jiova, au kila ni dau rogoci au niu talaucaka vua na lomaqu. E vakaukauataki au tale ga noqu wili iVolatabu e veisiga kei na nodra dau veivakauqeti na taciqu vakayalo. Na nodra veitokani, veivuke, kei na nodra dau masu ena vukuqu, e vukea me donu tiko ga noqu rai.

E vakacegui au o Jiova ena gauna sara ga au vinakata tu kina na veivuke. E vakanuideitaki au na inuinui ni na sega na tauvimate ena vuravura vou. Au rai vakanamata gona ena gauna au na ‘taubale, lade qai vakacaucautaki koya’ ena vuku ni loloma levu e vakaraitaka vei au.—Cakacaka 3:6-9.