Sala Mo Dina Kina ina Nomu Yalayala

ITUVAKI DREDRE

O bubului ena siga o vakamau kina. Na nomu vosa ni yalayala qori e kena ibalebale ni o na sega ni biuti watimu, drau na walia tale ga na leqa e dau yaco.

Ia na veiyabaki sa sivi sa mai vakaleqa tiko nomudrau bula vakawati na levu ni veiba. Vakacava o se dina tiko ga ena nomu bubului?

KA MO KILA

Kena iwali ga mo dina vua. Levu era rivarivabitaka nodra dina vua e dua. So era vakatauvatana nodra yalayala me vaka na ivesu ina nodra vakatulewa cala. Ia vakacava mo raica qori me vaka na ikelekele e ivakadei ina nomu bula vakawati. E kaya e dua na yalewa vakawati o Megan, “E yaga vakalevu na nomu dau dina vua na kemu isa. Ni yaco na veiba drau na dui kila tiko ni na sega ni dua e biubiu.”a Ena yaga sara vakalevu ina nomu walia eso na leqa ena nomu bula vakawati ke o kila ni dei vinaka tu na kemudrau ivau, dina ni dau yaco eso na leqa.​—Raica na kato “Dina ina Nomu Yalayala ni Vakawati.”

Na ka ga e bibi qo: Ke leqa tiko nomu vakawati, sa kena gauna qo mo solia kina na nomu dina kece, kua tale ni lomatarotaro tiko. O na cakava vakacava qori?

KA O RAWA NI CAKAVA

Vakasama tale vakavinaka. “Me tawamudu na vakawati.” Vakacava e vakanuideitaki iko na malanivosa qori, se vaka tale e kemu ivesu? O dau via biubiu ni yaco na leqa ena nomu bula vakawati? Mo rawa ni dina tiko ga vua na watimu, e bibi mo raica na nomu vakawati me tawamudu.​—iVakavuvuli vakaivolatabu: Maciu 19:6.

Dikeva lesu nomu bula. Ena rairai vakatau tiko ena nomu solia nomu dina taucoko ena veika o dau raica vei rau nomu itubutubu. Kaya e dua na yalewa vakawati o Lea: “Rau sere noqu itubutubu niu se gone, au leqataka niu na rawa kina ni raica vakamamada na noqu dina vua na watiqu.” Vakadeitaka ni na rawa ni vinaka na nomu bula vakawati. O na sega ni muria nodrau ivakaraitaki na nomu itubutubu!​—iVakavuvuli vakaivolatabu: Kalatia 6:4, 5.

Dikeva nomu ivakarau ni vosa. Ke drau veiba kei watimu, kua ni cavuta eso na vosa o na veivutunitaka me vaka “Au na biuti iko!” se, “Au na qara tale e dua e lomani au!” Ena sega ni vinaka qori ke o saga tiko mo solia na nomu dina taucoko ina nomu vakawati, ena sega ni wali kina na leqa, ia ena katakata ga nomudrau veivosaki. Kua ni cavuta na vosa mosimosi, de vinaka mo kaya ga va qo: “Daru cudru ruarua tiko. Cava me daru cakava me wali kina na leqa qo?”​—iVakavuvuli vakaivolatabu: Vosa Vakaibalebale 12:18.

Me laurai ni o ‘dina vei watimu.’ Dau biuta na itaba kei watimu ena nomu desi e valenicakacaka. Me wewenigusumu na marautaki ni nomu bula vakawati. Saga mo qiriti watimu e veisiga. Dau tukuna vakalevu na “keirau,” se o “yau kei watiqu.” O na vakadeitaka kina ni o dina tiko vei watimu, era na kila tale ga e levu.

Vuli ena nodra ivakaraitaki vinaka eso tale. Vuli vei ira na sa dede nodra bula vakawati, era kila na walia na leqa e basika. Tarogi ira, “Bibi vakacava vei iko na nomu dina vua na kemu isa, e yaga vakacava ina nomu vakawati?” E kaya na iVolatabu: “E vagatara na kaukamea na kaukamea, e vaka kina na tamata ni vagatara na wekana.” (Vosa Vakaibalebale 27:17) Me salavata kei na vakasama qori, me yaga mada ga vei iko na nodra ivakasala o ira na dau marautaka nodra vakawati.