Ni Takali e Dua na iTubutubu

ITUVAKI DREDRE

A se yabaki ono o Dami ena gauna a mate kina o nona ta ni tauvi koya na matenimona. Gauna e yabaki ciwa kina o Derrick, a mate o tamana ena mateniuto. A yabaki vitu o Jeannie ena gauna a mate kina o nona na ena kenisa ni katonigone.a

Eratou se gone na le tolu qori, sa takali e dua eratou dau veivolekati. Ke o lolositaka tiko na nona takali e dua drau dau veivolekati, ena yaga vakalevu vei iko na ulutaga qo.b Na cava eso na ka me kilai e liu me baleta na lolosi?

KA MO KILA

E levu tu na sala eda rawa ni vakaraitaka kina noda lolosi. Kena ibalebale na sala o vakaraitaka kina nomu rarawa ena rairai duidui mai na sala era vakaraitaka kina eso tale na nodra rarawa. E tukuni ena ivola Helping Teens Cope With Death: “E sega ni muri e dua na ivakarau se lawa ena gauna ni lolosi.” E sega ni vinaka tale ga mo kubuta lo nomu rarawa. Na vuna? Baleta . . .

E rawa ni yaco eso tale na leqa ke o kubuta lo nomu rarawa. E kaya o Jeannie e cavuti ena itekivu ni ulutaga qo: “Au nanuma keu vakaraitaka noqu rarawa, sa na qai rarawa ga vakalevu o taciqu. Ena gauna mada ga qo, au se kubuta lo tu ga noqu rarawa, ia e sega ni vinaka ya.”

Era duavata ena ivakamacala qori na kenadau. E kaya na ivola The Grieving Teen: “O na sega ni rawa ni kubuta lo tu ga na nomu rarawa. Ena qai vakaraitaki na rarawa qori ena so na gauna tawanamaki, kena ivakaraitaki ni o cudru katakata se ni o sa tauvimate.” O koya e kubuta lo na nona rarawa e rawa ni bobula ina gunu kei na wainimate gaga ni nanuma ena seavu kina nona rarawa.

Rawa ni vakavuna tale ga na veilecayaki na rarawa. Kena ivakaraitaki, era na rairai cudruvaka eso na nona “biuti” ira o koya sa mate. Eso tale era rawa ni beitaka na Kalou, era nanuma ni dodonu me tarova na mate. Levu tale ga ena rairai ora tu na lomadra ena so na ka era cakava se tukuna vei koya sa mate, sa na sega ni rawa mera kere veivosoti.

Io, e sega ni ka rawarawa na lolosi. Na cava ena vukei iko ni o lolosi mo rawa ni vakila na vakacegu?

KA O RAWA NI CAKAVA

Veitalanoa kei na dua. O na rairai nanuma ni vinaka mo tu taudua ga ena gauna o lolosi kina. Ia o na lomavakacegu ke o talaucaka na lomamu vua e dua na lewe ni nomu vuvale se itokani, ena sega tale ga ni vakamalumalumutaki iko na ituvaki o sotava.—iVakavuvuli vakaivolatabu: Vosa Vakaibalebale 18:24.

Vola na ka o vakila. Vola na veika e kilai kina na nomu itubutubu sa takali. Kena ivakaraitaki, na cava o taleitaka me baleti koya? Vola na nona itovo vinaka. Na itovo cava o na via vakatotomuri koya kina?

De dua ena ora na lomamu ena so na ka o vakasamataka. Kaya mada ke o sega ni guilecava rawa na ka mosimosi o tukuna vua na nomu itubutubu ni bera ni takali, vola na nomu rai me baleta na ka e yaco kei na vuna e va kina ya nomu rai. Kena ivakaraitaki, o rawa ni vola: “E ora na lomaqu ni keirau a veiba kei tamaqu ni bera ni takali.”

E bibi tale ga me donu nomu rai. E kaya na ivola The Grieving Teen: “Kua ni beitaki iko mo kaya ni o sega ni kila ni na takali totolo nomu ta se na, o se sega tu ni kere veivosoti vua. E ka vakalialia me nanumi nida na sega vakadua ni tukuna se cakava e dua na ka ena vinakati kina meda kere veivosoti.”—iVakavuvuli vakaivolatabu: Jope 10:1.

Qarauna na nomu bula. Saga mo vakacegu vinaka, dau vakaukauayago, kania tale ga na kakana bulabula. Ke sega ni lomamu na kana, kania tu mada ga eso na kakana mamada e yaga ina yago, me tauri iko toka me yacova ni o sa garova tale na kakana. Kua ni via vakaseavutaka nomu rarawa ena kakana kamikamica se alakaolo, qori ena vakalevutaka ga na leqa.

Talaucaka na lomamu vua na Kalou ena masu. E kaya na iVolatabu: “Biuta vei Jiova na nomu icolacola bibi, ena tokoni iko o koya.” (Same 55:22) E sega ni inaki ga ni masu mo vakacegui kina. Na masu e dua tale ga na sala drau veivosaki kina kei na Kalou “e dau vakacegui keda ena ka kece.”—2 Korinica 1:3, 4.

E dau vakacegui ira na rarawa na Kalou ena nona Vosa na iVolatabu. E vinaka mo dikeva na ka e kaya na iVolatabu me baleta na kedra ituvaki dina na mate kei na inuinui ni veivakaturi.c—iVakavuvuli vakaivolatabu: Same 94:19.