iOtioti ni Tui Vinaka e Isireli

NI SE qai yabaki walu ga o Josaia sa mai tui sara ena rua na yavusa ena ceva kei Isireli. Era mai vukei koya gona kina e so na qase me vakatulewa ni sa rui gone.

Ni sa vitu na yabaki nona veiliutaki tiko sa qai tekivu vakasaqarai Jiova o Josaia. E muria na nodra ivakaraitaki na tui vinaka me vakataki Tevita, Jiosafati kei Esekaia. E vakaraitaka nona yaloqaqa ni se qai yabaki tini vakacaca ga.

Era sa ivalavala ca tu na Isireli ena dua na gauna balavu. Era qaravi kalou lasu, ra qai sokalou ina matakau. Sa qai lako yani o Josaia kei ira nona tamata mera kauta laivi mai na vanua na sokalou lasu. E bau cakacaka vakaitamera toka oqo ni levu sara ga era qaravi kalou lasu. O na rawa ni raici Josaia kei ira na nona tamata nira vorolaka tiko na matakau.

Oti oya sa qai lesia o Josaia e tolu na tamata me ratou vakatulewa ena kena vakavinakataki na valenisoro i Jiova. E kumuni mai na ilavo vei ira na lewenivanua, ratou qai vakayagataka na dau vakatulewa me saumi kina na veika ena vakayagataki ena taravale. Ena gauna era cakacaka tiko kina ena valenisoro, a kunea o Ilikaia na bete levu e dua na ivola bibi a sa yali tu mai vakabalavu. Oqo na ivola ni ivunau i Jiova a vola o Mosese.

Sa qai kau vei Josaia, qai kerea me wiliki vua. Ni vakarogoca tiko e kila sara ga mai kina nira sega ni muria dina tiko na ivunau i Jiova na Isireli. E rarawataka vakalevu na ka oqo o Josaia, qai dresulaka na nona isulu me vaka o sa raica tiko oqori. E kaya: ‘Sa cudruvi keda o Jiova, nira a sega ni muria na ivunau ena ivola qo o ira na tukada.’

Sa qai talai Ilikaia o Josaia me lai taroga se cava ena cakava vei ira o Jiova. E lai tarogi Ulita na parofita yalewa o Ilikaia. Sa qai kaya mai vua o Ulita na itukutuku mai vei Jiova me lai tukuna vei Josaia: ‘Ena rusa na koro o Jerusalemi kei ira kece na lewena nira qarava tiko na kalou lasu, era vakasinaita tale ga na vanua ena veika ca. Ena vuku ga ni nomu caka vinaka Josaia, ena sega ni yaco kina na veivakarusai oqo me yacova mada nomu mate.’