Tuvai Matau na iVavakoso Mera Vunautaka na Matanitu ni Kalou
Nona bula e vuravura o Jisu Karisito, e vunautaka na Matanitu ni Kalou ena veikorolalai kei na veikorolelevu. E vakavulici iratou nona tisaipeli qai talai ratou yani ena cakacaka vata ga. Ni se bera ni lesu i lomalagi, e vakaroti ira nona imuri mera vukei ira na tamata mai na veimatanitu kece mera tisaipeli. E tuvai matau na ivavakoso vakarisito mai na gauna e tauyavu kina ena cakacaka ni kena vunautaki na itukutuku vinaka. Se vanua cava ga era lako kina na tisaipeli, era na vunautaka na Matanitu ni Kalou.—Maciu 4:17, 23; 10:1-16; 28:19, 20; Luke 4:43, 44; 8:1; 10:1-9; Cakacaka 1:8; 4:31; 5:42; 8:12; 19:8; 28:23, 30, 31; Roma 10:9, 10, 14.
Ena nona parofisai o Jisu me baleta na ivakataotioti ni ivakarau ni veika, a kaya: “Ka na vunautaki mada na i Tukutuku Vinaka ni matanitu ki na vuravura taucoko, me i vakadinadina ki na veivanua kece ga, sa na qai yaco mai na i vakataotioti.” Na cakacaka vakavunau oqo e ilesilesi bibi sara ga ni ivavakoso vakarisito edaidai.—Maciu 24:14, VV; Marika 13:10.
Era tuvai matau na ivavakoso kece ni iVakadinadina i Jiova e vuravura mera vunautaka vakavinaka na itukutuku vinaka ni Matanitu ni Kalou. Me na caka gona vakamatau oqo, e dau lesia na valenivolavola ni tabana ni Watch Tower Society ena veimatanitu yadua na yalava mera vunau kina na ivavakoso yadudua. Sa ra qai vidavida tale vakalalai na ivavakoso na yalava e lesi, qai soli na ividavida oya vei ira e so era na raica mera talevi na itaukeinivale.—1 Korinica 14:33, 40.
Era na vosa ga vakalevu na iVakadinadina vei ira na tamata ena nodra lako yani ina veivale. Sa ra dau tuberi na iVakadinadina i Jiova ena nodra soqoni vakaivavakoso ena so na iwalewale mera tukuna kina vakalekaleka ena matanikatuba na itukutuku ni Matanitu ni Kalou, ena nodra vakayagataka nodra iVolatabu. Era kauta na iVakadinadina na ivola vakaivolatabu mera na solia vua na itaukeinivale e vinakata me vulica e levu tale na ka ena Vosa ni Kalou.
Me macala nira na rogoca na tamata kece ena nodra yalava na itukutuku bibi ni Matanitu ni Kalou, era na vola na iVakadinadina na vale era yali na kedra itaukei kei na itukutuku matailalai tale e so e vakaraitaka ni a sega ni rawa na vakamacala sara vakavinaka vei itaukeinivale. Ena dua tale na gauna, ena qai lesuvi na vale oya. Ke a tataleitaki o itaukeinivale, ena volai oya, ra qai lesu tale na iVakadinadina mera lai kuria nodra ivakamacala mai na iVolatabu. Ke vinakata o itaukeinivale, sa rawa sara ga ni vakavulici wasoma ena iVolatabu. E sega ni saumi na kena vakayacori oqo.
Era dau solia tale ga na ivoladraudrau na iVakadinadina i Jiova vei ira na tamata era lako voli e gaunisala. Ena sala oqo, era vosa kina vei ira na dau sega ni tiko e vale. E dau sasagataki dina mera rogoca na itukutuku o ira na via rogoca.—Cakacaka 17:17; Vakatakila 14:6, 7; 22:17.
Na cava era siko vale tiko ga kina na iVakadinadina ni laurai ni le levu era sega ni via kauai? Sa dau vakadinadinataki ni rawa ni veisau na ituvaki kei na loma i koya a sega ni via vakarorogo e liu, de sa na tiko e vale e dua na lewe ni vale ena taleitaka na itukutuku.
E kaya o Jisu vei iratou nona tisaipeli: “Dou vakasaqara taumada na matanitu ni Kalou, kei na nona yalododonu.” Nida vakasaqara taumada na Matanitu ni Kalou, eda na raica vakabibi na noda vunautaka na Matanitu ni Kalou. Vei ira gona na iVakadinadina i Jiova, e dua dina na usutu bibi ni nodra bula na cakacaka oqo.—Maciu 6:33; 2 Timoci 4:2.
• Na cakacaka cava i Jisu kei ira na lotu Vakarisito taumada a parofisaitaki ni na vakayacori tale ga ena noda gauna oqo?
• E tuvai matau vakacava na nodra cakacaka vakavunau na iVakadinadina i Jiova?
• Na cava era siko vale tiko ga kina na iVakadinadina nira sega ni kauai e le levu?
[iYaloyalo ena tabana e 16, 17]
iVakadinadina i Jiova era vunautaka tiko na Matanitu ni Kalou ena duidui matanitu
Thailand
Mexico
Necaladi
Korea
Curaçao
Ghana
Peritania
Ositerelia