iVakatawa Dauveilakoyaki—iTokani Dau Cakacaka ena Dina

Era dau tiko ena ivavakoso vakarisito ena imatai ni senitiuri na ivakatawa dauveilakoyaki, era vakasikova na ivavakoso mera vakaukauataki ira. Era soli ira sara ga, ra qai sega ni lomakocokoco, oqo mera vukei ira kina na lewe ni ivavakoso mera ia na ivalavala sa kilikili kei ira sa nona na Kalou.​—Cakacaka 11:23, 24; 14:21, 22; 15:32; 20:2, 31-35; Filipai 2:20-22, 29; 1 Cesalonaika 2:5-12.

Era vakila tale ga na ivavakoso ni iVakadinadina i Jiova edaidai na yaga ni nodra veisiko na ivakatawa dauveilakoyaki. Ra sa yalomatuataka na tagane oqo na nodra cakacaka vakavunau na iVakadinadina i Jiova, kei na nodra itavi vakaivakatawa. Era vagalalataki ira mai na cakacaka saumi kei na icolacola vakavuvale mera soli ira kina ina cakacaka vakaitalatala vakatabakidua. Vei ira na sa vakawati, ra sa dau vakaitavi tale ga na yalewa kei na watidra ena cakacaka vakaitalatala vakatabakidua.

Ena lesi vua na ivakatawa ni tabacakacaka e rauta ni 18 ina 25 na ivavakoso me qarava ena nona tabacakacaka. Ena sikova vakarua na ivavakoso yadua ena tabacakacaka ena dua na yabaki, ia ni oti e rua se tolu na yabaki, ena lesi ina dua tale na tabacakacaka. Ni caka oqo, ena yaga vei ira na ivavakoso na nodra kila kei na nodra rawaka na duidui ivakatawa ni tabacakacaka.

Na ivakatawa ni tabacakacaka ena dikeva na ituvaki vakayalo ni ivavakoso kei na veika sa caka tiko kina. Ena vica na nona vosa ina ivavakoso, ena bose tale ga kei ira na qase kei na dauveiqaravi vakaitalatala me macala kina se ra na vakavinakataka vakacava na nodra itavi ena ivavakoso.

Ena loma ni macawa, o koya kei watina, ke vakawati, erau na tomani ira na iVakadinadina ena ivavakoso e sikovi tiko ena cakacaka vakaitalatala me rau vukei ira mera vakavinakataka na nodra cakacaka. Ena sikovi ira tale ga na tataleitaki vou o koya kei watina me vakauqeti ira ena nodra vakabauta. De o na via kerea tale ga mo sikovi vaka kina.

E via vaka tale ga kina na nona ivakatagedegede vakayalo kei na nona kila na ivakatawa ni tikina. E sikova na tabacakacaka yadua, na itavi e qarava kina e lakolako vata kei na soqo ni tabacakacaka e dau vakayacori. O koya tale ga kei watina erau na veitomani ena cakacaka vakaitalatala kei ira na iVakadinadina ena ivavakoso ni tabacakacaka e sikova tiko. Na vakavakarau kece e caka me baleta na porokaramu ni soqo ni tabacakacaka ena dikeva o koya, ena vica tale ga na nona vosa ena soqo ni tabacakacaka, wili kina na ivunau soqovi levu.

Nira sa vakacavara na ivakatawa dauveilakoyaki na nodra veisiko ina dua na ivavakoso se tabacakacaka, era na lai sikova tale e dua ena nodra muria e dua tiko ga na ituvatuva, me yacova ni sa sikovi na ivavakoso kece se tabacakacaka ena loma ni vula ono beka; oti oya, era tekivu veisiko tale.

Ena levu na vanua, era vodo motoka se vodo ena sala ni veilakoyaki ni matanitu na ivakatawa dauveilakoyaki. Ena so tale na vanua, era na vodo basikeli beka se taubale sara ga. E sauma na iSoqosoqo na nodra veilakoyaki na ivakatawa dauveilakoyaki, e vakarautaka tale ga e dua na ilavo lailai mera volia kina kei watidra na iyaya lalai e so ena yaga vei ira. Dau vakalevu ga mera vakarautaka na lewe ni ivavakoso yadua vei koya kei watina nodrau icili kei na kedrau.

Na taba ni cakacaka oqo e vinakati dina kina na yalosolisoli. Era guta na ivakatawa dauveilakoyaki kei na dui watidra mera qarava na ivavakoso ia mera kua ga ni lai vakavuicolacola tale vakalevu vei ira.​—1 Cesalonaika 2:9.

• Na cava na inaki ni nodra sikova na ivavakoso vakarisito na ivakatawa dauveilakoyaki ena imatai ni senitiuri?

• Era mai rawata vakacava na ivakatawa dauveilakoyaki mera soli ira ina tabana ni cakacaka vakaitalatala oqo?

• Vakamacalataka na nodra itavi na ivakatawa ni tabacakacaka kei na ivakatawa ni tikina, kei na ivalavala ni nodra veitokiyaki.

[iYaloyalo ena tabana e 20]

Vosa tiko na ivakatawa ni tikina ena dua na soqo ni tabacakacaka

[iYaloyalo ena tabana e 21]

Veivakaroti na ivakatawa ni tabacakacaka ena icakacaka ni vunau e veivale, bose kei ira na qase ni ivavakoso, sikovi ira na tataleitaki era se vuli iVolatabu tiko, vunau ena ivavakoso