Wase 14

O Cei e Lako ki Lomalagi, ia ena Vuku ni Cava?

1. Era na sauma vakacava e le vuqa na taro, O cei e lako ki lomalagi, ia ena vuku ni cava?

ERA DAU KAYA e le vuqa, ‘Na tamata vinaka kece era lako ki lomalagi.’ Ia, ni tarogi se cava era lako kina ki lomalagi, era na kaya: ‘Me keimami laki vakaitikotiko kei na Kalou,’ se, ‘O ya na i sau ni caka vinaka.’ Na cava e kaya na iVolatabu ena ka oqo?

2, 3. (a) Eda kila vakacava ni so era na lako ki lomalagi? (b) Na taro cava e gadrevi me saumi?

² E vakamatatataka na iVolatabu ni a vakaturi mai na mate o Jisu, oti sa qai lako ki lomalagi. E tukuna tale ga ni ra na kau kina e so tale. A tukuna o Jisu vei iratou na nona i apositolo yalodina ena bogi me mate kina: “Sa vuqa na tikina e na vale nei Tamaqu: kevaka sa sega, au sa tukuna vei kemudou. Ni ka’u sa lako me’u vakarautaka na tikina me nomudou. Ia kevaka ka’u sa lako ka vakarautaka na tikina me nomudou, au na lako tale mai, ka kauti kemudou vei au; mo dou tiko talega e na vanua ka’u sa tiko kina.”​—Joni 14:1-3.

³ A tukuna sara tiko ga e ke o Jisu vei iratou na nona i apositolo ni ratou na kau cake ki lomalagi me ratou laki tikovata kaya. A dau tukuna na i nuinui talei oqo o Paula vei ira na lotu Vakarisito taumada. Me kena i vakaraitaki a vola: “Eda sa lewe ni koro mai lomalagi koi keda; eda sa waraka maikina nai Vakabula, na Turaga ko Jisu Karisito.” (Filipai 3:20, 21; Roma 6:5; 2 Korinica 5:1, 2) Ena vuku ni yalayala vaka o ya, sa ra vakanuinui tu kina e lewe milioni me ra laki bula ki lomalagi. Ia era na lako beka ki lomalagi na tamata vinaka kece?

ERA NA LAKO BEKA KI LOMALAGI NA TAMATA VINAKA KECE?

4, 5. Na ivakadinadina cava e tu ni rau a sega ni lako ki lomalagi o Tevita kei Jope?

⁴ Sega ni dede toka na nona a vakaturi mai na mate o Jisu, a qai tukuna vei ira e dua na i lawalawa Jiu na i apositolo o Pita: “Ni’u sa tukuni Tevita na qase vei kemudou, ni sa mate ko koya ka bulu, ka sa tu ga vei keda na nonai bulubulu ka yacova na siga oqo . . . Sa sega ni lako cake ki lomalagi ko Tevita.” (Cakacaka 2:29, 34) O koya gona, na tamata vinaka o Tevita a sega ni lako ki lomalagi. Vakacava ga na tamata dodonu o Jope?

⁵ Ni sa rarawa voli o Jope a masuta na Kalou: “Ni vunitaki au mada e nai bulubulu, ka tabonaki au, me oti mada na nomuni cudru, ka lokuca vei au e dua na siga, ka nanumi au!” A kila tu o Jope ni kevaka e sa na mate, sa na sega ni vakila tale e dua na ka ena i bulubulu. A kila ni na sega ni lako ki lomalagi. Ia a nuidei tu ga ni a qai vakamacalataka: “Kevaka sa ciba na tamata, ena bula tale ko koya? Au na waraka na siga kecega sa loku vei au, me yaco mada na noqu vakamataliataki [gauna lokuci ena i bulubulu]. Ko ni na kaci mai, ka’u na rogo yani vei kemuni.”​—Jope 14:13-15.

6, 7. (a) Na cava e vakaraitaka ni o ira era a mate ni bera na Karisito era a sega ni lako ki lomalagi? (b) Na cava ena yaco vei ira na tamata yalodina kece era a mate ni bera na Karisito?

⁶ A tamata vinaka tale ga o Joni, o koya a papitaisotaki Jisu. Ia e kaya o Jisu: “Ko koya sa lailai sara e na matanitu vakalomalagi sa uasivi vei koya.” (Maciu 11:11) E vuna oqo ni sega ni lako ki lomalagi o Joni na Dauveipapitaiso. Ni a se bula e vuravura o Jisu, o ya e sivia e 4,000 na yabaki mai na nodrau a veivorati o Atama kei Ivi, a kaya kina: “A sa sega e dua na tamata sa lako cake ki lomalagi, ko koya ga sa lako sobu mai lomalagi, a Luve ni tamata, ko koya sa tiko mai lomalagi.”​—Joni 3:13.

⁷ O koya gona me vaka sara ga a kaya o ya o Jisu, me yacova mai na nona gauna, e se sega e dua me lako cake ki lomalagi ena 4,000 taucoko na yabaki ni nona bula e vuravura na tamata. O Tevita, Jope, kei Joni na Dauveipapitaiso era na vakaturi me ra bula e vuravura. O ira kece na tagane kei na yalewa yalodina era a mate ni bera na mate i Jisu a nodra i nuinui tu ga ni ra na bula tale e vuravura, sega ki lomalagi. Era na vakaturi me ra na maliwai ira na lewe ni matanitu ni Kalou e vuravura.​—Same 72:7, 8; Cakacaka 17:31.

VUNA ERA LAKO KINA KI LOMALAGI E SO ERA YALODINA

8. Na taro cava soti e rui bibi me saumi, ia ena vuku ni cava?

⁸ Na cava na vuna a lako kina ki lomalagi o Jisu? Na cakacaka cava me na laki cakava e kea? E rui bibi na i sau ni taro oqo. Oqo e baleta ni o ira na lako ki lomalagi era na vakayacora tale ga na cakacaka i Jisu. O ya sara ga na i naki ni nodra lako ki lomalagi.

9, 10. Me vaka e vakamacala kina o Taniela, o cei tale era na lewa vata kei Karisito ena matanitu ni Kalou?

⁹ Eda sa vulica mai ena vica na wase e liu ni na lewa na vuravura vou parataisi o Jisu ni sa tui ni matanitu ni Kalou vakalomalagi. Ni bera ni mai bula e vuravura o Jisu, sa tukuna makawa tu na iVolatabu ena i vola i Taniela ni na “soli . . . na lewa” vua na “Luve ni tamata.” Na “Luve ni tamata” o Jisu Karisito. (Marika 14:41, 62) E kaya tale o Taniela: “A nona lewa na lewa sa sega ni mudu, ena sega ni takali, kei na nona matanitu ena sega ni vakarusai.”​—Taniela 7:13, 14.

¹⁰ Ia e bibi me kilai tiko ni na sega ni lewa duadua ga na “Luve ni tamata” me vaka e laurai toka e ke ena i vola i Taniela. E kaya na iVolatabu: “Na matanitu kei na lewa . . . ena soli vei ira na yalosavasava nei Koya sa Cecere sara, a [“nodra,” NW] matanitu sa matanitu e sega ni mudu.” (Taniela 7:27) Na vosa “ira na yalosavasava” kei na “nodra matanitu” e vakaraitaka vei keda ni so tale era na lewa vata kei Karisito ena matanitu ni Kalou.

11. Na cava e vakaraitaka ni o ira na i muri taumada i Karisito era na lewa vata kei koya?

¹¹ A vakaraitaka o Jisu ena i otioti ni nona bogi kei iratou na nona i apositolo yalodina le 11 ni ratou na lewa vata kei koya ena matanitu ni Kalou. A kaya vei iratou: “Oi kemudou ga, dou sa dautiko vata kei au e na noqu vosota na dauveivakatovolei. Ia ka’u sa solia vei kemudou e dua na matanitu me vaka sa solia mai vei au ko Tamaqu.” (Luke 22:28, 29) Rau a qai okati o Paula kei Timoci ena veiyalayalati, se veidinadinati oqo ni matanitu ni Kalou. Ena vuku ni ka o ya, a vola kina o Paula vei Timoci: “Kevaka eda sa vosota na ca, eda na lewa vata kaya.” (2 Timoci 2:12) A volavola tale ga na i apositolo o Joni me baleti ira era “na tui me ra liutaki vuravura mai” vata kei Jisu Karisito.​—Vakatakila 5:9, 10; 20:6.

12. Na vakasama cava e tiko me baleta “na kawa” i Eparama e vakaraitaka ni na tiko e so tale me ra lewa vata kei Karisito?

¹² O ira gona na lako ki lomalagi era lako e kea me ra laki lewa vata kei Karisito ena matanitu ni Kalou vakalomalagi. O Jisu na “kawa” levu duadua ni vosa ni yalayala, ia e digitaka e so tale vei ira na kawatamata na Kalou me ra lewa vata kei Jisu ena matanitu ni Kalou. Ena sala gona oqo era yaco kina me ra tiki ni “kawa” o ya me vaka e kaya na iVolatabu: “Kevaka dou sa nei Karisito, dou sa qai kawa i Eparaama, kei nai taukei me vaka na vosa ni yalayala.”​—Kalatia 3:16, 29; Jemesa 2:5.

ERA LE VICA ERA LAKO KI LOMALAGI?

13. (a) Ena vuku ni cava era na sega ni lako kina ki lomalagi na gone dramidrami? (b) E vakamacalataka vakacava o Jisu na kedra i wiliwili era na taukena na Matanitu ni Kalou?

¹³ Sa macala vinaka tu ni o ira ga na i muri i Karisito sa vakatovolei oti, o ira ga oqo era na lako ki lomalagi me ra qai lewai vuravura mai. Sa kena i balebale oqo ni ra na sega ni kau cake ki lomalagi na gone dramidrami se gone lalai, ni ra se sega ni vakayabaki ena cakacaka Vakarisito me ra vakatovolei kina. (Maciu 16:24) Ia na gone vaka oqori era mate, e tu na i nuinui me ra vakaturi tale me ra bula e vuravura. (Joni 5:28, 29) E lailai gona na kedra i wiliwili na laki bula ki lomalagi ni vakatauvatani kei ira era na bula e vuravura ena ruku ni lewa ni Matanitu ni Kalou. A tukuna vei ira na nona tisaipeli o Jisu: “Kakua ni rere, na qele-ni-sipi lailai; ni sa vinakata sara na Tamamudou me solia vei kemudou na matanitu.”​—Luke 12:32.

14. Era le vica na lewe ni “qele-ni-sipi lailai” era na lako ki lomalagi?

¹⁴ Ena vakacava sara mada na kedra lewe lailai na i lawalawa o ya era na lewa ena Matanitu ni Kalou? Era na wili beka ga kina na i apositolo kei na i muri taumada i Jisu? Sega, e vakaraitaka na iVolatabu ni na vuqa tale era na okati ena “qele-ni-sipi lailai.” E kaya na iVolatabu ena Vakatakila 14:1, 3 (VV): “Au sa qai raica, e dua na Lami [o Jisu Karisito] sa tu cake tu e na ulunivanua [vakalomalagi] ko Saioni, ka ra sa tu vata kaya e lewe 144,000 na tamata . . . era sa voli oti [se kau] mai vuravura.” Vakasamataka ni ra le 144,000 ga na tamata era laurai e ke ni ra duri vata tu kei na Lami o Jisu Karisito ena Ulunivanua vakalomalagi o Saioni. (Iperiu 12:22) O koya gona me vaka e vakaraitaka na iVolatabu, e sega ni tamata vinaka kece e lako ki lomalagi, ia era le 144,000 ga, era tamata yalodina vakatovolei oti, era na kau me ra na laki lewa vata kei Karisito.

VUNA ERA A DIGITAKI KINA MAI VURAVURA

15. Na cava na vuna e digitaka ga kina na Kalou mai vei ira na kawatamata o ira era na lewa ena nona Matanitu?

¹⁵ Ia ena vuku ni cava me digi ira kina na i liuliu oqo na Kalou mai vei ira na kawatamata? Na cava me ra sega ni digitaki ga kina na agilosi me ra lewa vata kei Karisito? Na vuna ni a bolei e vuravura oqo na nona dodonu o Jiova me lewa. E ke ga e rawa ni vakatovolei kina na nodra yalodina na tamata vua na Kalou ena nona veisaqa na Tevoro. E ke ga a vakadinadinataka kina o Jisu nona yalodina vua na Kalou ni sa vakatovolei, a qai solia na nona bula me kedra i voli na kawatamata. Sa qai nakita gona o Jiova ni i lawalawa “qele-ni-sipi lailai” era na laki duavata kei na Luvena ena matanitu vakalomalagi, era na kau yani e vuravura. O ira oqo, ena nodra yalodina vua na Kalou, era vakalasuya na Tevoro ena nona veibeitaki ni ra qaravi Jiova wale ga na tamata ena i naki kocokoco. E donu vinaka kina me taurivaki ira oqo o Jiova me vakalagilagi kina o koya.​—Efeso 1:9-12.

16. Ena vuku ni cava me da na vakavinavinaka kina ni o ira era na lewa ena Matanitu era sa bula oti e vuravura?

¹⁶ Vakasamataka tale ga na kena totoka me ra dauveiliutaki o ira sa ra vakadinadinataka oti na nodra yalodina vua na Kalou e vuravura, e vuqa vei ira era solia sara ga na nodra bula ena vuku ni Matanitu ni Kalou. (Vakatakila 12:10, 11; 20:4) Era sega ni sotava na veivakatovolei oqori na agilosi. Era sega tale ga ni vakila na nodra leqa ni veisiga na kawatamata. Era na sega gona ni kila vinaka sara se i tuvaki cava mada e tu kina na tamata i valavala ca, me ra vakila tale ga na leqa eda sotava tiko na tamata. Ia o ira ga na le 144,000 era na kila, baleta ni ra sa sotava tale ga yani na leqa vata ga vaka oqo. E so vei ira era sa valuta rawa mai e so na i valavala ca e bibi sara, era kila vinaka kina na kena valuvaluti dredre. (1 Korinica 6:9-11) O koya gona era na kila vinaka na sala me ra na lewai ira kina na nodra lewe ni matanitu e vuravura.​—Iperiu 2:17, 18.

IVAVAKOSO NI KALOU

17. Na cava e vakaibalebaletaka tiko na vosa “i vavakoso”?

¹⁷ E tukuna vei keda na iVolatabu ni ulu ni i vavakoso ni Kalou na Karisito, ni o ira na lewena era vakarorogo vei Jisu. (Efeso 5:23, 24) Na vosa “i soqosoqo lewe ni lotu [“i vavakoso,” NW] ni Kalou” e baleti ira tiko e dua na i lawalawa lotu Vakarisito. (1 Korinica 15:9) Eda na vakatoka beka me i vavakoso Vakarisito na kena eda dau laki veimaliwai kina. E vaka tale ga oqo na noda wilika ena iVolatabu me baleta “na i vavakoso mai Leotisea,” kei na nona i vola na i apositolo o Paula vei Filimoni me baleta “na [“i vavakoso,” NW] sa dau soqoni tiko e nomu vale.”​—Kolosa 4:16, VV; Filimoni 2, VV.

18. (a) O cei era lewena na “i vavakoso ni Kalou bula”? (b) Na yaca cava tale e vakatokai kina na i vavakoso oqo ena iVolatabu?

¹⁸ Ia ni cavuti ena iVolatabu “nai soqosoqo lewe ni lotu [“i vava­koso,” NW] ni Kalou bula,” o ya e baleta vakatabakidua tiko e dua na i lawalawa era i muri i Karisito. (1 Timoci 3:15) Era vakatokai tale ga me ra “nodrai soqosoqo [“i vavakoso,” NW] na ulumatua era sa volai mai lomalagi.” (Iperiu 12:23) O koya gona “na i vavakoso ni Kalou” oqo era lewena tiko o ira kece na lotu Vakarisito e vuravura, e nodra i nuinui tu na bula vakalomalagi. Na kedra i wiliwili kece na i lawalawa era na lewena “na i vavakoso ni Kalou” e 144,000. Edaidai, e vica ga vei ira oqo era se bula tu e vuravura, e dua na kena vo. O ira na lotu Vakarisito era nuitaka me ra na bula tawamudu e vuravura era dau qara na nodra veidusimaki vakayalo na lewe ni “i vavakoso ni Kalou.” E dau vakatokai tale ga ena iVolatabu na i vavakoso oqo e le 144,000 na lewena me “goneyalewa, na wati ni Lami,” “na yago i Karisito,” “na vale tabu ni Kalou,” “na Isireli ni Kalou,” kei na “Jerusalemi vou.”​—Vakatakila 21:9; Efeso 4:12, VV; 1 Korinica 3:17, VV; Kalatia 6:16; Vakatakila 21:2.

NA KA VOU ENA INAKI NI KALOU

19. Na ka vou cava a vakacuruma mai na Kalou me vakayacori kina na nona i naki taumada me baleta na vuravura?

¹⁹ A sega ni veisautaka o Jiova na nona i naki me baleta na vuravura kei na kawatamata ni sa vakavurea o Atama na i valavala ca kei na mate ki na kawatamata. Ke a cakava o ya na Kalou, sa na kena i balebale ni sa sega ni rawa vua me vakayacora na nona i naki taumada. A nona i naki mai na i vakatekivu me parataisi taucoko na vuravura, me ra qai bula kina na tamata ena marau kei na bula vinaka. Na i naki o ya e se dei tu ga. Na ka vou wale ga a vakacuruma mai na Kalou, o ya na nona i tuvatuva me baleta e dua na matanitu vou me na vakayacora na nona i naki. Eda sa raica oti mai ni o Jisu Karisito, na Luvena, e dauveiliutaki levu ni matanitu oqo, ni ra na kau tale ga mai ena kedra maliwa na kawatamata e le 144,000 me ra lewa vata kei koya mai lomalagi.​—Vakatakila 7:4.

20. (a) O cei era lewena “na lomalagi vou” kei “na vuravura vou”? (b) Na cava e dodonu mo cakava me rawa ni o lewe kina ni “vuravura vou”?

²⁰ O ira na dauveiliutaki oqo mai lomalagi era na lewe ni “lomalagi vou” ena i tuvaki vou ni Kalou. Ke ra sa tiko gona na dauveiliutaki dodonu vaka o ya me ra lewa na vuravura, sa macala ga ni ra na tiko o ira me ra na vakarurugi ena nodra lewa. E tukuni ira oqo na iVolatabu me ra “vuravura vou.” (2 Pita 3:13; Vakatakila 21:1-4) Ena okati kina o Jope, Tevita, kei Joni na Dauveipapitaiso​—io, o ira kece na tamata yalodina era a bula ni se bera ni lako mai vuravura o Jisu. Ia e vuqa tale era na lewena “na vuravura vou,” oka kina o ira era na bulata yani na i cavacava ni i vakarau ca ni veika oqo. O na dua li vei ira na bula oqo? O gadreva li mo lewe ni matanitu ni Kalou? Ke vaka kina, e tiko na i vakatagedegede e dodonu mo rawata.

[iYaloyalo ena tabana e 121]

Era a lako li ki lomalagi na tamata vinaka oqo?

Tui Tevita

Jope

Joni na Dauveipapitaiso

[iYaloyalo ena tabana e 122]

Ena i otioti ni bogi i Jisu kei iratou na nona i apositolo, a kaya kina ni ratou na lewa vata kei koya ena matanitu i Tamana