Wase 15

Noda Mai Lewe ni Matanitu ni Kalou

1, 2. Na cava e gadrevi me rawa ni lewe ni matanitu ni Kalou e dua?

O VIA BULA tawamudu li e vuravura ena ruku ni lewa ni matanitu ni Kalou? Na tamata e vinaka tu na nona vakasama ena kaya, Io! Ena rekitaki kina na veika totoka. Ia mo vakila na veika oqori, ena sega ni rawa ni o kaya wale tu ga: ‘Au via lewe ni matanitu ni Kalou.’ E levu tale tu na ka e gadrevi.

² Me vaka mada oqo, kaya mada ke o sa via laki lewe ni dua tale na matanitu. Me rawa oqo, ena gadrevi mo sauva na veika eratou kotora mai na dauveiliutaki ni matanitu o ya. Ia ni se bera sara oqori, ena vinakati mada mo kila rawa e liu se cava so na ivakatagedegede gadrevi. Ena sala vata ga oqo, ena vinakati tale ga mo kila na veika e gadreva na Kalou vei ira era na via lewe ni nona matanitu. Ni oti o ya, o sa na qai muria na veika gadrevi oqori.

GADREVI NA KILAKA

3. Na cava e dua na ka me rawati me qai rawa kina vua e dua me lewe ni matanitu ni Kalou?

³ E dua na ivakatagedegede bibi me rawata e dua e via lewe ni matanitu ni Kalou o ya me kila na kena “vosa.” E kilikili oqo. Ni so na matanitu vakatamata era dau namaka tale ga vei ira era via laki lewe ni vanua yani me ra kila na kedra vosa. Ia na “vosa” cava me ra vulica o ira na via bula ena ruku ni lewa ni matanitu ni Kalou?

4. Na “vosa savasava” cava e dodonu me ra vulica na tamata ni Kalou?

⁴ Raica mada na ka e kaya o Jiova ena nona Vosa na iVolatabu: “Ni’u na qai vukica na nodra vosa na veimataqali me vosa savasava, me ra masu kecega ki na yaca i Jiova, ka me ra qaravi koya e na lomavata.” (Sefanaia 3:9) Na “vosa savasava” oqo na dina ni Kalou e volai ena iVolatabu. E vakabibi ga me ka dina me baleta na Matanitu ni Kalou. O koya gona, ke o gadreva mo lewe ni Matanitu ni Kalou, e dodonu sara ga mo vulica “na vosa” oqo ena nomu mai kilai Jiova kei na i tuvatuva me baleta na nona Matanitu.​—Kolosa 1:9, 10; Vosa Vakaibalebale 2:1-5.

5. (a) Na cava e dodonu me da kila me baleta na matanitu ni Kalou? (b) Na cava me da kila me rawa ni da bula tawamudu kina?

⁵ E so na matanitu vakatamata edaidai era dau namaka vei ira era via laki lewena yani na nodra matanitu me ra bau kila tu e so na ka me baleta na matanitu o ya, vaka kina na veika e vauca na kena cicivaki. Ena dodonu tale ga mo kila na veika vaka o ya me baleta na matanitu ni Kalou ke o via lewena. Na kilaka oqo ena rawa ni kena i tinitini na bula tawamudu. A kaya o Jisu ena nona masu vei Tamana: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.”​—Joni 17:3.

6. (a) Na taro cava soti e dodonu me ra sauma rawa o ira na via lewe ni matanitu ni Kalou? (b) O rawa li ni sauma?

⁶ Ke o sa vulica na wase kece sa oti ni ivola oqo, sa na dua na i wase levu sara ni kilaka bibi oqo o sa na kila rawa. E dina beka o ya? E rawa li ni o vakadinadinataka oqo ena nomu saumi ira na taro oqo: E vei na i matai ni gauna a tukuna kina na Kalou na nona inaki me baleta e dua dina na matanitu, na Matanitu ni Kalou? O cei e so vei ira na tamata ni Kalou era a namaka tu me ra lewena e vuravura? E le vica era na veiliutaki se ra na tui ena matanitu ni Kalou? Era na veiliutaki mai vei na tui oqo? O cei soti era a digitaki taumada me ra tui ni matanitu ni Kalou? A vakadinadinataka vakacava o Jisu ni na tui vinaka? Ia, mo lewe ni matanitu ni Kalou, e sega ni rauta wale ga na nomu kila na veika e baleta.

GADREVI NA ITOVO SAVASAVA

7. E dau duidui vakacava na veika e namaka na matanitu vakatamata vei ira na lewena?

⁷ Na veimatanitu edaidai era dau namaka e dua na ivakatagedegede ni bula vei ira na nodra lewe ni matanitu vou. Me kena ivakaraitaki, era na kaya beka ni tagane e dodonu me dua ga na watina, kei na yalewa me dua ga na watina. Ia e duidui na lawa ni so tale na matanitu. Era vakatarai na lewena me sivia e dua na watidra. Na i tovo cava e namaki vei ira na via lewe ni matanitu ni Kalou? Na cava e kaya na Kalou ni kilikili me baleta na vakawati?

8. (a) Na cava na i vakatagedegede ni Kalou me baleta na vakawati? (b) Na cava na veibutakoci, ia na cava e kaya kina na Kalou?

⁸ Ena i vakatekivu a kotora na ivakatagedegede dodonu ni vakamau o Jiova ena nona vakarautaka me dua ga na wati i Atama. A kaya na Kalou: “Sa na biuta kina na tamana kei tinana na tagane, ka kabita na watina: a rau na lewe dua ga.” (Vakatekivu 2:21-24) A vakamacalataka o Jisu ni oqo na ivakatagedegede dodonu vei ira na lotu Vakarisito. (Maciu 19:4-6) Ni rau sa mai “lewe dua ga” na veiwatini, sa na vakavelavelataki na nodrau vakamau ke dua vei rau e veiyacovi kei na dua tale. Na ivalavala oqo e vakatokai na veibutakoci, ia ena lewai ira na dauveibutakoci na Kalou.​—Iperiu 13:4; Malakai 3:5.

9. (a) Na cava na rai ni Kalou me baleti ira na dauveiyacovi ni ra sega tu ni vakamau? (b) Na cava na veidauci?

⁹ Ena yasana kadua, e vuqa era dau tiko vata ga me vaka na veiwatini, ra dau qai veiyacovi ia era sega ni vakamau. Ia a sega ni nakita na Kalou me ka ga ni vakatovotovo na nodrau veivolekati vaka oqo e dua na tagane kei na dua na yalewa. O koya gona, na nodrau tikovata e rua erau sega ni vakamau e ivalavala ca ena mata ni Kalou, o koya a tauyavutaka na bula vakawati. E vakatokai oqo me veidauci. Na veidauci na veiyacovi kei na dua drau sega ni vakamau. E kaya kina na iVolatabu: “Ni sa loma ni Kalou oqo, . . . mo dou kakua ni dauyalewa [“dauveidauci,” NW].” (1 Cesalonaika 4:3-5) Ena cala gona vua e dua e sega ni vakamau me veiyacovi kei na dua tale.

10. Na cava e so tale na i valavala ni veiyacovi e tabu ena lawa ni Kalou?

¹⁰ E vuqa na tagane kei na yalewa era dau veiyacovi ga vakataki ira—na tagane kei na tagane na yalewa kei na yalewa. Era dau tukuni me ra veimoceri vakatagane se vakayalewa. So na gauna era vakatokai na dauveimoceri vakayalewa me ra Lesbians. Ia e kaya na Vosa ni Kalou ni cala na ka era cakava, ni “velavela sara.” (Roma 1:26, 27) E tabu tale ga ena lawa ni Kalou na veiyacovi kei na manumanu. (Vunau ni Soro 18:23) O koya e via bula ena ruku ni lewa ni matanitu ni Kalou me kua ni vakayacora na i valavala vakasisila vaka o ya.

11. (a) Na cava na rai ni Kalou me baleta na gunuvi ni yaqona ni vavalagi? (b) Na veika vakacava e vakaleqa na bula me ra kua sara ni tara o ira na via lewe ni matanitu ni Kalou?

¹¹ Na gunuvi vakarauta ni waini, na bia, se yaqona ni vavalagi e sega ni tabu ena lawa ni Kalou. Ni iVolatabu sara mada ga e vakaraitaka ni waini e gunuvi vakalailai e vinaka ena yago. (Same 104:15; 1 Timoci 5:23) Ia e tabu ga ena lawa ni Kalou na mateni, se lakova na soqo ni marau lialia e dau ia kina na i valavala vakasisila. (Efeso 5:18; 1 Pita 4:3, 4) Era sega wale ga ni dau qara na mateni ena yaqona ni vavalagi e so edaidai, era dau taurivaka tale ga e vuqa na waigaga ni veivakamatenitaki ena i naki vata ga oqo. Era dau vakatavako se ra kana maruwana me ka ni lasa wale tu ga, ia e so tale era kania na vua ni betel se draunikoka. Na veika oqo e vakadukadukalitaka na yagodra, e vakaleqa tale ga na nodra bula. O koya gona, ke o vinakata mo lewe ni matanitu ni Kalou, mo kua sara ni tara na veika dau veivakaleqai oqo.​—2 Korinica 7:1.

12. (a) Na cava e so na cakacaka tawadodonu e veisaqasaqa kei na lawa ni Kalou? (b) Na cava me cakava e dua e dau nona i valavala tu na veika oqo me na vakadonui koya kina na Kalou?

¹² Na matanitu vakatamata era sega ni vinakati ira na daubasulawa me ra laki lewe ni nodra matanitu. Ia o Jiova e cecere sara na nona ivakatagedegede. Ni vinakata o koya me da i “valavala dodonu e na ka kecega.” (Iperiu 13:18) Ke dua e sega ni muria na lawa ni Kalou, ena sega ni vakatarai me bula ena nona matanitu. Edaidai era dau rairai dodonu wale tu ga e le vuqa, ia era dau beca e vuqa sara na lawa. Ia e sega ni dua na ka e tabonaki ena mata ni Kalou. E sega ni dua e rawa ni vakaisini koya. (Iperiu 4:13; Vosa Vakaibalebale 15:3; Kalatia 6:7, 8) O koya gona, e vakadeitaka vinaka tu o Jiova ni na sega ni lewena na nona matanitu o ira era beca na nona lawa me vaka na kena e vauca na lasu kei na butako. (Efeso 4:25, 28; Vakatakila 21:8) Ia e dau yalovosovoso na Kalou. Ke dua gona na daucaka cala e tinia na nona i vakarau ca me qai caka vinaka, ena vakadonui koya na Kalou.​—Aisea 55:7.

13. Me ra raica vakacava na lawa ni matanitu vakatamata na dauveiqaravi ni Kalou?

¹³ Ia vakacava ga na kena muri na lawa ni matanitu vakatamata? Ena gauna kece ena tu kina na matanitu ni tamata, e namaka na Kalou vei ira na nona dauveiqaravi me ra vakamalumalumutaki ira vei ira na “veiliutaki e na matanitu.” Me na saumi ga na ivakacavacava vei ira, veitalia ke sa mani rui sivia, veitalia tale ga ke sega ni duavata e dua ena sala e vakayagataki kina na ivakacavacava. Me na muri tale ga na lawa ni matanitu. (Roma 13:1, 7, VV; Taito 3:1) Ena vakavo wale ga kevaka ena veicoqacoqa kei na lawa ni Kalou na nona muria e dua na lawa vakatamata. Sa na qai vakabau e ke na ka a kaya o Pita kei iratou na vo ni i apositolo, “Sa kilikili kei keitou me keitou talairawarawa vua na Kalou, me kakua ga vei ira na tamata.”​—Cakacaka 5:29.

14. Eda na vakaraitaka vakacava ni tiko tale ga vei keda na rai ni Kalou me baleta na talei ni bula?

¹⁴ E raica na bula na Kalou me ka talei sara. E dodonu me ra kila oqo o ira era via lewe ni nona matanitu. Na lawa ni Kalou e vakatabuya na laba. Ia na veicati e dau tini ki na laba. Kevaka gona e na cata tiko ga na wekana e dua, ena sega vakadua ni na lewe ni matanitu ni Kalou. (1 Joni 3:15) E bibi kina me muri na ka e kainaki ena iVolatabu ena Aisea 2:4, a ya me kua na lave i yaragi me ra labati kina na wekada. E vakaraitaka na Vosa ni Kalou ni bula sara mada ga ni gone e se qai kunekunetaki tiko ena katonigone i tinana e ka talei sara vei Jiova. (Lako Yani 21:22, 23; Same 127:3) Ia ena veiyabaki, era dau vakalutumi e vica vata na milioni na gone. Na kena vakarusai oqo na bula e veisaqasaqa kei na lawa ni Kalou, baleta ni o koya e tiko e loma ni kete i tinana e bula tiko, e sega kina ni dodonu me vakarusai.

15. Na i vakaro cava so nei koya na Tui ni Kalou me ra muria o ira kece era via lewe ni Matanitu ni Kalou?

¹⁵ Ia e levu tale na ka e gadrevi vei ira na via lewe ni matanitu ni Kalou, ni sega ni yalani wale ga ena nodra tinia na caka cala se i valavala dukadukali. Me ra saga sara tale ga me ra caka vinaka vei ira na tani ena yalo ni veinanumi dina. Me ra muria na ivakavuvuli vakalou e vakarautaka na Tui o Jisu Karisito, a ya: “Na ka vaka­aduaga dou sa vinakata me ra kitaka vei kemudou na tamata, dou kitaka vaka talega kina vei ira.” (Maciu 7:12) Sa navuca na ivakarau ni veilomani o Karisito. A solia sara ga na nona bula ena vukudra na kawatamata, a qai vakaroti ira na nona i muri: “Mo dou veilomani; me vaka ka’u sa lomani kemudou.” (Joni 13:34; 1 Joni 3:16) Ena ka marautaki dina na bula ena ruku ni lewa ni matanitu ni Kalou baleta ni na kune kina na veilomani kei na veikauwaitaki dina vaka oqo.​—Jemesa 2:8.

16, 17. (a) Na cava soti na vuna vinaka me da veisautaka kina na noda bula me da sauva rawa kina na i vakatagedegede ni Kalou? (b) Ena vuku ni cava eda nuidei kina ni rawa ni da veisau?

¹⁶ E vakaraitaka na iVolatabu ni o ira era via lewe ni matanitu ni Kalou e dodonu me ra veisautaka na nodra bula me ra na sauva rawa kina na ivakatagedegede gadrevi. (Efeso 4:20-24) O sa sasagataka tiko li na veisau oqo? E sega ni dua tale na sasaga e sivia na kena oqo! Baleta na cava? O na sega ni bula vinaka wale ga me vica na yabaki ena ruku ni dua na matanitu vakatamata. E sega, ni o na bula tawamudu sara ga, me bulabula vinaka tu ga na yagomu ena vuravura parataisi ena ruku ni dua na matanitu e liutaka na Kalou!

¹⁷ Ena gauna sara mada ga oqo, ena nomu sauva na ivakatagedegede gadrevi, o na bula mamarau cake kina. Ia ena rairai vinakati vei iko na veisau. Sa ra veisau e vuqa sara era a dau veicati tu e liu, se kocokoco. Sa ra veisautaka tale ga na nodra ivakarau e vuqa era a dauveidauci tu e liu, dauveibutakoci, dauveimoceri vakatagane se vakayalewa, daumateni, daulaba, daubutako, o ira na bobula ki na waigaga ni veivakamatenitaki, kei ira na dauvakatavako. Era vakayacora rawa oqo ena nodra sasaga dina vakaukauwa me salavata kei na veivuke ni Kalou. (1 Korinica 6:9-11; Kolosa 3:5-9) O koya gona, kevaka ena dredre na nomu veisau mo sauva rawa kina na ivakatagedegede ni Kalou, kua ni yalolailai. O na rawata!

YALODINA KI NA MATANITU NI KALOU

18. Ena sala lavotaki cava e namaki keda na Kalou me da vakaraitaka kina na noda tokona vakayalodina na nona matanitu?

¹⁸ E sega ni dodonu me kurabuitaki ni na gadreva na Kalou o Jiova me ra tokona vakayalodina na lewa ni nona matanitu o ira era vinakata me ra lewena. Ni oqo tale ga na ka e dau gadreva na matanitu vakatamata vei ira na lewena. Ia ena sala lavotaki cava e namaka kina na veitokoni vakayalodina na Kalou? Ena nodra lave iyaragi beka me ra valataka nona matanitu na lewena? Sega. Me vakataki Jisu Karisito ga kei ira na nona imuri taumada, e dodonu me ra mata se daukacikacivaki yalodina ni Matanitu ni Kalou. (Maciu 4:17; 10:5-7; 24:14) E loma i Jiova me na kila na tamata kece se cava sara mada na nona matanitu, kei na sala cava ena walia kina na leqa ni kawatamata. O sa bau vota li na ka o vulica mai na Vosa ni Kalou vei ira na wekamu, nomu i tokani, kei ira na tani? E loma ni Kalou mo vakayacora.​—Roma 10:10; 1 Pita 3:15.

19. (a) Na cava me da namaka kina na veitusaqati ni da tukuna yani vei ira na tani na matanitu ni Kalou? (b) Na taro cava soti mo na sauma?

¹⁹ A gadrevi na yaloqaqa vei Karisito kei ira na nona i muri taumada me ra tukuna rawa kina na veika ni Matanitu ni Kalou vei ira na tani, ni ra dau tusaqati. (Cakacaka 5:41, 42) E dina tale ga oqo edaidai. Na vuravura oqo e lewa tu na Tevoro e cata na kena vunautaki na i tukutuku vinaka ni Matanitu ni Kalou. Na taro gona oqo: O to e vei? O na tokona li vakayalodina na matanitu ni Kalou? E loma ni Kalou me na vunautaki sara vakalevu na nona Matanitu ni se bera na i cavacava. E vakacava, o na vakaitavi kina?

[iYaloyalo ena tabana e 128]

O ira era na qai lewe ni matanitu ni Kalou, e dodonu me ra kila na veika e baleta

[iYaloyalo ena tabana e 131]

O ira na lewe ni matanitu ni Kalou e dodonu me ra levea na cakacaka e so e sega ni vakadonuya na Kalou

[iYaloyalo ena tabana e 133]

O ira na lewe ni matanitu ni Kalou e dodonu me ra tukuna vei ira na tani na veika e baleta