Wase e 9
Gauna a se Gone Voli Kina ko Jisu ena Nona Vuvale
ENA gauna a tubu voli kina mai Nasareci ko Jisu, a se koro lailai oya ka sega ni rogo. E koto ena veidela ni vanua ka vakatokai ko Kalili, e sega soti ni yawa mai Jeserieli na Buca rairai totoka.
E yabaki rua beka ko Jisu ena gauna e rau kauti koya kina eke mai Ijipita ko Josefa kei Meri. E rairai se luve i Meri duadua ga ena gauna oqo. Ia e sega soti ni dede. Sa ratou qai sucu ko Jemesa, Josefa, Saimoni, kei Jutasa, ka so talega na luve i Meri kei Josefa era yalewa. Sa qai so tale na taci Jisu kei na ganena era sega ni lailai sobu mai na lewe ono.
Era tu talega na weka i Jisu. Eda sa kilai Joni tiko na tavalena ka qase vua, e vakaitikotiko ena vica vata sara na kilomita e Jutia. Ia e tiko volekati Kalili ko Salome, e rairai rau veitacini kei Meri. A vakawatitaki Sepete ko Salome, o koya gona, e rau tavalei Jisu kina ko Jemesa kei Joni na luvedrau tagane. Eda sega ni kila se bau levu na gauna e tiko vata kei iratou na vo ni cauravou oqo ko Jisu ena nona tubu cake mai, ia e qai veivolekati sara nodratou veiwekani ena dua na gauna e muri.
E cakacaka vakaukauwa sara ko Josefa me qaravi iratou na nona vuvale sa ratou lewe levu mai. E cakacaka vakamatai o koya. Ko Josefa e susugi Jisu me vaka e luvena dina, sa qai vakatokai ko Jisu me “luve ni matai.” A vakavulici Jisu ko Josefa me matai talega, ka vulica vinaka sara o koya. Na vuna era qai kaya kina e muri na tamata ena vuku i Jisu, “ni matai ko koya oqo.”
Na vuvale i Josefa e taravaki cake ena sokalou vua na Kalou ko Jiova. Nodrau muria na i Vunau ni Kalou e rau solia vei luvedrau ko Josefa kei Meri na veivakatavulici vakayalo ‘ni ratou tiko ena nodratou vale, ni ratou lako voli e sala, ni ratou koto sobu, ena gauna eratou duri cake kina.’ E tiko mai Nasareci e dua na valenilotu, ia eda rawa ni kila ni dauvakawasoma nona kauti iratou nona vuvale ko Josefa me ratou laki sokalou e kea. Ia e sega ni vakabekataki ni ratou daureki vakalevu sara ena ndratou daulako vakawasoma ki na valenisoro i Jiova mai Jerusalemi. Maciu 13:55, 56; 27:56; Marika 15:40; 6:3; Vakarua 6:6-9.
▪ E sega ni lailai sobu mai na lewe vica na taci Jisu kei na ganena, ia o cei na yacadratou e so vei iratou?
▪ O cei na lewe tolu eratou kilai levu ni ratou tavalei Jisu?
▪ Na cakacaka cava e qai qarava ko Jisu, ia ena vuku ni cava?
▪ Na veivakavulici bibi cava e dauvakarautaka ko Josefa vei iratou na nona vuvale?